Read ngakarimojong Yudis 2 Bible Online

Yudis 2 - ngakarimojong bible

Yudis 2

¹Ŋirwa ke elap ŋatomoniarei ka ŋiarei elap ŋolo ke epei ekaru ŋolo a ŋitomon ka ŋikanikauni erworosi ŋituŋa alokai ka apukan a Nebukadinesar a erwosit ka Asiriya ŋakiro ŋuna acamitor Nebukadinesar akinyaŋar ŋakiro ŋuna apotu ŋituŋa a akwap a ŋina epukat iŋes, lopite ŋolo alimunitor iŋes elope.

²Abu Nebukadinesar tonyarak ŋituŋa daadaŋ ŋulu epukatotor iŋes ka ŋikapolokinitok a ŋituŋa, ido tolimok ikes akitiya, tolimok ikes ŋuna ayeunit iŋes akitiya, tolimok ikes ŋakiro daadaŋ a akituk keŋ a elope, tolimok aronis daadaŋ ŋina etiyata ŋituŋa a ŋakwapin a ŋun.

³Apotu ikes daadaŋ totubut atemar emaikina toarae ŋituŋa daadaŋ ŋulu apotu towout akiwuap ŋakiro a erwosit.

⁴Kedau Nebukadinesar ayeun ŋakiro keŋ, abu tonyarau Oloperines, ekapolokiniton a ŋasigarya keŋ ŋolo ewuapit erwosit anapolou, tolimok iŋes tema,

⁵“Ebala erwosit ŋolo apolon nooi, ekapolon a akwap a daadaŋ, ‘Tolot aneni kaŋ, ido toloto kaapei ka ŋikilyok lu ŋulu eyenete atemar ikigogoŋ, ŋasigarya ŋuna elosete a ŋakejen ŋalipyo ŋatomoniarei ka ŋuna alosete a ŋaŋolei ŋalipyo ŋatomon ka ŋaarei.

⁶Toloto kitijikis ŋituŋa ŋulu anakwapin aŋuna alo To, anerae apotu ikes toŋero ŋakiro kaŋ.

⁷Tolimok ikes kitemokis ŋalup ka ŋakipi, anerae abunit ayoŋ neni kec anaŋoit kaŋ, ido elelebikini ayoŋ ŋasigarya kaŋ akwap daadaŋ, ŋasigarya ŋuna ainakini ayoŋ apedor ŋina kinyasunet ikes.

⁸Ilelebun ŋituŋa kec ŋulu ewanan nayona ka naŋololin kec, tosodi ilelebun ŋawat a ŋulu etwakito naŋolol ŋina apolon,

⁹arikori ayoŋ ikes nakisaleta a akwap a daadaŋ.

¹⁰Emaikina iyoŋ tolot kikama akwap kec daadaŋ ikotere apedori ayoŋ abunore. Emaikina ikes tocamut atemar ilou iyoŋ ikes, ido imyekini iyoŋ ikes aŋuna kaŋ akitodol akoloŋit ŋina isicanere ikes.

¹¹Nai ŋulu ikipegakinete iyoŋ nyisyoni ikes kinyas akwap ŋin daadaŋ;

¹²anerae, ikwapei ayarya ayoŋ ka a apedor a apukan kaŋ ekoŋi jik atemar etiyakini ayoŋ elope ŋakiro ŋuna adau ayoŋ alimun.

¹³Iyoŋ Oloperines, toceite imyekini akitiya ŋakiro a ekapolon kon, nai kitiya daadaŋ lopite ŋolo akalimokinia ayoŋ iyoŋ emam adyakar, kitiya daŋ ŋun atipei.’ ”

¹⁴Aŋun, abu Oloperines torotok aneni a ekapolon keŋ, tonyarau ŋikapolokinitok daadaŋ a ŋasigarya a akwap ka Asiriya.

¹⁵Abu iŋes tocunak ŋasigarya ŋuna aseunitae aŋatuketa lopite ŋolo alimokinitor ekapolon keŋ iŋes. Tocunak iŋes ŋasigarya ŋalipyo amiat ka ŋatomoniarei ŋuna alosete a ŋakejen, ŋasigarya ŋalipyo ŋatomon ka ŋaarei ŋuna ameto ŋaŋolei ka totiŋito ŋikaleŋeleŋe,

¹⁶abu Oloperines kitemok ŋasigarya ŋun ikwapei asigar ŋina alalan elosi lojie.

¹⁷Abu daŋ Oloperines ya ŋikaala, ŋasigarya ka ŋaŋolei-Sigirya ŋuna edokete ŋituŋa ka iwokitere ŋiboro, ya daŋ ŋamesekin, ŋimoŋin ka ŋamee ŋuna ka akimuj,

¹⁸aya daŋ ŋamuja ŋuna etemokino aŋuna a ŋasigarya a daadaŋ ta egolid ka esilipa ŋolo alalan ŋolo alemuni iŋes alokai ka apukan.

¹⁹Torotok nai Oloperines ka ŋasigarya keŋ daadaŋ kiŋarenikis erwosit Nebukadinesar ka kielakin ŋagaari, ŋasigarya ŋuna elosete a ŋakejen ka ŋuna emeto ŋaŋolei akwap daadaŋ ŋina alo To.

²⁰Apotu daŋ toloto kaapei ka ikes ŋituŋa ŋulu agelegelya ŋulu alalak nooi esibito asuisui a emaase ka apuwa, alalak ŋituŋa ŋul nooi pa apedor akimarun.

²¹Apotu ikes toloto ŋirwa ŋiuni ameun alo Ninepe tari nadipo ŋina a Becitiles, toloma diyete emoru ŋolo eyai Kuju namukure ŋina a Celicia.

²²Anen, abu Oloperines ya ŋasigarya keŋ ŋuna alosete a ŋakejen daadaŋ, ŋasigarya ŋuna adokito ŋagaari kitipeiyosi nakwap ŋina a ŋikamukumukui.

²³Kinyas Oloperines Put ka Lud ka tomunaiya Ŋirasiti ka Ŋisimael ŋulu eboiyete alodiyete ekukor a aloŋisat alo Kwap ŋina a Ŋibabiloniyae.

²⁴Kiwuapak nai aŋolol Eupurate kitor Mesopotamia tomunaiya ŋitaunio ŋulu aya ŋaduketa ŋunajiet ŋulu aya diyete ayonae Ebiron akitodol tari nanam.

²⁵Abu daŋ Oloperines kikama akwap ŋina a Celicia ka toar ŋituŋa daadaŋ ŋulu apotu topegakis iŋes. Todolu nai lokukoru ŋolo alo Kwap a akwap a Yapes neni iteosi ka Araba.

²⁶Kirimokis ŋasigarya ka Oloperines akwap a Ŋimidian kidiŋ, kicunyasi ŋiemae kec ka toŋatasi ŋamesekin kec.

²⁷Totiyaar Oloperines a nen tolot nadipo ŋina a Damasko, arae ŋin apaki ŋina alemere ŋikinyom ŋulu esibito erau, apotu ŋasigarya ka Oloperines kicunyasi ŋimanikorin a Ŋimidian daadaŋ, tomunyasi ŋaatuk ka ŋamesekin kec, kikamasi ŋitaunio kec ka kinyasa akwap kec, toara ŋisorok daadaŋ a ekileŋ.

²⁸Tokuryaketa ka tobul ŋituŋa daadaŋ ŋulu eboiyete alodiyete anam aŋuna ka Oloperines. Tokuryaketa ka tobul nooi ŋituŋa a Sidon, Tiro ka ŋulu eboiyete alo Sur, Ocina ka daadaŋ ŋulu eboiyete alo Yamunia. Tokuryaketa ŋituŋa ŋulu eboiyete alo Asotus ka alo Asiriya aŋuna ka Oloperines.