Read ngakarimojong Yudis 3 Bible Online

Yudis 3 - ngakarimojong bible

Yudis 3

¹Apotu nai ŋituŋa ŋul kiyakiyasi ŋituŋa neni ka Oloperines akidyek iŋes a ŋuna ke ekisil temasi,

²“Isua ŋiketiyak a Nebukadinesar, erwosit ŋolo apolon nooi, ikilipi neni kon. Kitiya neni kosi daadaŋ ŋuna icamit iyoŋ.

³Toanyu, eyakasi kiŋaren kon ŋatuketa kosi, akwap kosi daadaŋ, ŋimanikorin kosi ŋulu a ŋikinyom a ŋulu esibito erau, ŋamesekin kosi, ŋaatuk kosi ka ŋiemae kosi; kitiya neni kec lopite ŋolo icamitor iyoŋ.

⁴Erae daŋ ŋitaunio kosi ka ŋituŋa daadaŋ ŋulu iboiyete a nen ŋipi kon, bua kitiya neni kec lopite ŋolo ikijoikinit iyoŋ.”

⁵Apotu ŋikilyok ŋulu eyakitae todolut neni ka Oloperines, tolimokis iŋes ŋakiro ŋun daadaŋ.

⁶Abu nai Oloperines tolot nakwap ŋina alodiyete anam, kaapei ka ŋasigarya keŋ kiwuanak ŋasigarya lotaunio ŋulu aya ŋaduketa ŋunajiet, ido ya ŋituŋa a ŋitaunio a ŋul ŋice toruworos ŋulu eriito ka iŋes.

⁷Apotu ŋituŋa ŋul kaapei ka ŋituŋa ŋulu eboiyete alorerya a ŋulu edunyatar ŋitaunio ŋul kijaut Oloperines imwomworete ka idoŋaete toramete ŋiburin.

⁸Kikote neni daŋ, abu Oloperines kinyas ŋakiboisyo kec ŋunakilipet, totubutubu ŋipirin kec ŋulu ke etal, anerae alimokinitae iŋes akinyasun ŋakujo daadaŋ a akwap a ŋin, ikotere ŋituŋa daadaŋ ilipete neni a Nebukadinesar bon ka atemar emaikina ŋaŋajepa kec daadaŋ ka ŋikabilae daadaŋ tonyarata iŋes akuj.

⁹Abu nai Oloperines tolot lowae ŋolo eteni Esidraelon diyete Dosan neni iteosi ka akope ŋina a Yudaya,

¹⁰tolom Oloperines kidiŋ Geba ka Sisepolis, torubakis iboiyete a nen elap daadaŋ ikotere ecununi akimuj aŋuna a ŋasigarya keŋ.