Read ngakarimojong Yudis 4 Bible Online

Yudis 4 - ngakarimojong bible

Yudis 4

¹Ani iirarete Ŋisirael ŋulu eboiyete alo Yudaya ŋakiro daadaŋ ŋuna kebu Oloperines ekapolokiniton ŋasigarya a Nebukadinesar a erwosit a ŋolo ka Asiriya kitiya neni a ŋakwapin ka epite ŋolo kebunio iŋes toŋataria ŋiboro ka kinyas ŋakais daadaŋ a ŋakujo,

²apotu ikes tokuryaketa aŋuna a Yerusalem ka aŋuna ka Akai ka Akuj kec;

³anerae keriŋa sek ikes eboŋunete anakwap aŋina arikoritae ikes ka ariŋa ŋituŋa a Yudaya ecunun iwapei, ariŋa daŋ ikes italeunete ŋiboro a etal, namuroet ka Akai ka Akuj ekaku a akinyasuno kec.

⁴Aŋun, apotu ikes kiyakiyasi ŋituŋa neni a ŋakiboisyo a daadaŋ a ŋuna a Samaria, Kona, Bes-Oron, Belemin, Yeriko, Koba, Aesora ka akadipaalat ŋina a Salem.

⁵Apotu ikes toloto atipei naitae a ŋikamukumukui toduko ŋakiboisyo ŋunajiet lorerya ŋulu aya nen ka tocunakis akimuj nakais ŋuna iŋadao akimuj, anerae ariŋa ikes irikakinete akilem, kitemokinos aŋuna a ejie.

⁶Abu nai Yoakim, erwosit ŋolo apolon nooi, ŋolo ayai Yerusalem apaki ŋin, kigir abaruwa neni a ŋituŋa a Besulia ka Betomesaim neni ayai kiŋaren Esidraelon kiteos ka adipo ŋina alodiyete Dosan,

⁷tolimok ikes aberar nadipoe a ŋimoru, anerae neni epedorete ŋimoe akitor aremyo Yudaya nen ka apatana akiretakin ituŋanan ŋini ecamit akitorun nen, anerae adidiŋ ŋapakio ŋun apedorete ŋituŋa ŋiarei bon akitor kaapei.

⁸Aŋun, apotu Ŋisirael kitiyata lopite ŋolo alimokinitor ikes Yoakim esacaradoti ŋolo apolon nooi kaapei ka ŋikatubok a Ŋisirael a daadaŋ apaki ŋina ayakatar ikes Yerusalem.

⁹Apotu Ŋisirael daadaŋ kikaloikis Akuj ka agogoŋ a daadaŋ, ido apotu kitiditeunos make ka kiredakis akiron nooi.

¹⁰Apotu ikes daadaŋ ka ŋaberu kec, ŋidwe kec, ŋaatuk kec ka ŋituŋa ŋulugelae daadaŋ ŋulu eboiyete ka ikes, ŋituŋa ŋulu ipaŋgatae, ŋipi ŋulu egyelunitae tonapa ŋiguniyae anacirin kec.

¹¹Apotu nai Ŋisirael daadaŋ, ŋikilyok, ŋaberu ka ŋidwe ŋulu eboiyete alo Yerusalem kilipa alokiŋaren Akai ka Akuj, kiwuanakis ekuron nakyes kec topetanakis ŋiguniyae ŋulu anapito ikes kiŋaren Ekapolon.

¹²Apotu daŋ ikes kinenonokis ŋiguniyae kec namuroet kigworos kaapei, ilipete nooi neni ka Akuj a Ŋisirael ikotere nyimyek ŋidwe kec erikoryo ka nyimyek ŋitaunio ŋulu apotu toruwor ŋulu kec inyasunio ka nyinyasi akibois ŋina asegan ka tomunaarae, ido tolelyana ŋituŋa ŋulu nyerae Ŋiyudayan.

¹³Abu Ekapolon kiira akigworo a Ŋisirael kisyoni ikes alocan kec, anerae apotu ŋituŋa kiredakis akiron ŋirwa ŋulu alalak anakwap a Yudaya a daadaŋ ka alo Yerusalem alokiŋaren akibois ŋina asegan ŋina a Ekapolon a ŋolo etiron.

¹⁴Abu Yoakim esacaradoti ŋolo apolon nooi kaapei ka ŋisacaradotin ŋulu aya Kai ka Akuj ka etiyanakinete Ekapolon inanakis ŋainakineta ŋuna epeyo ŋuna a ŋinakoloŋit, ŋainakineta ŋuna ikoŋitor ituŋanan ŋakiro ŋadi ka ŋainakineta a ŋituŋa ŋuna elemunit ituŋanan a acamit keŋ, enapito ŋiguniyae anacirin kec.

¹⁵Apotu ikes kigworo neni ke Ekapolon a agogoŋu kec a daadaŋ, ikotere isyoniere ŋituŋa a Isirael daadaŋ; etiyaete ŋisacaradotin ŋun ipurupurito ekuron nakyes kec.