Read ngakarimojong Yudis 5 Bible Online

Yudis 5 - ngakarimojong bible

Yudis 5

¹Keponi tolimokinae Oloperines ekapolokiniton a ŋasigarya ka Asiriya atemar etemokinosi Ŋisirael aŋuna ke ejie ka agolo ŋapakio a ŋimoru neni epedoro akitor, aduko daŋ ŋaduketa ŋunajiet nakiboisyo daadaŋ ŋuna eya kidiama ŋikamukumukui ka awata ŋadipoe.

²Anaŋoit keŋ a ŋina apolon nooi abu Oloperines tonyarau ŋikapolokinitok a ŋituŋa a Moab ka ŋikarikok a ŋajoresyo a Ŋiamoni ka ŋikepukak a ŋituŋa a ŋulu eboiyete alodiyete anam

³kiŋit ikes tema, “Iyes Ŋikanaani, tolimokinae ayoŋ, ataŋae ŋituŋa ŋulu iboiyete anakwap a ŋina a ŋikamukumukui? Alutaunio iboiyoto ikes? Elal asigar kec etya ai ka ai eryamunitotor ikes apedor ka agogoŋu kec? Ŋae ipukat ikes ikwapei erwosit kec ka ŋae epolokinit asigar kec?

⁴Tosodi, kaanukiro eraakar ikes make alotuŋa a ŋulu iboiyete anakwapin a ŋuna alo To awout aponare akisiryam ayoŋ?”

⁵Abu nai Akior, ekarikon a ŋiamoni a daadaŋ tolimok Oloperines tema, “Elipi ikijoikis iyoŋ ekapolon kaŋ, ŋakiro ŋuna alimuni ayoŋ eketiyan kon, ido akalimokini ayoŋ iyoŋ ŋuna a kire a ŋuna a ŋituŋa a ŋul a ŋulu iboiyete anakwap a ŋina ke emoru a ŋina eyai diyete kon. Nyalimuni ayoŋ eketiyan kon ŋakiro ŋadi ŋuna erae alyokonu.

⁶Erae ŋituŋa ŋul ŋiletok a Ŋibabiloniyae.

⁷Koloŋ sek eboiyete ikes alo Mesopotamia, anerae pa acamito ikes akiwuap ŋakujo atapapaa kec a ŋulu aya Kalidean.

⁸Ikwapei aponiata ikes toŋero ŋipitesyo atapapa kec, kilipa neni ka Akuj a ŋina anakuj, Akuj ŋina apotu ikes toyenut alo Mesopotamia kiboiyoto a nen apaki ŋina aoyan.

⁹Abu nai Akuj kec tolimok ikes akimyekin akwap ŋina eboiyoto ikes toloto nakwap a Kanaan. Apotu ikes kiboiyosi Kanaan kitabar Akuj ikes egolid, a esilipa ka a ŋaatuk a ŋuna alalak.

¹⁰Ani epetakin eron akwap a Kanaan, apotu ikes totiyaaros Ijipit kiboiyoto a nen ŋirwa daadaŋ ŋulu ayakatar ikes akimuj a nen, apotu ikes tolalata nooi nyepedor akimarun.

¹¹Aŋun, abu erwosit a Ijipit toremokin ikes, abu todema ikes ŋiboro kec, ido kitiŋak ikes akiram ŋamatapali.

¹²Apotu ikes kikaloikis Akuj kec, ido abu Akuj kec kisican Ŋijipitian a ŋidekesyo a ŋulu amamu ekitoe itaŋaleuni ikes. Aŋun, apotu Ŋijipitian kiritasi ikes aneni kec.

¹³Abu nabo Akuj kitoon Anam ŋina Areŋan alokiŋaren kec,

¹⁴yaa ikes kitoryo lowae ŋolo a Sinai ka Kades-Barinea. Apotu ikes kiritasi ŋituŋa daadaŋ ŋulu eboiyete analoŋisat

¹⁵toloma nakwap ŋina a Ŋiamoni, ido a apedor kec a ŋina etiron apotu tomunyasi ŋituŋa daadaŋ ŋulu eboiyete alo Esibon, todoka a ŋolol Yorodan kikamasi akwap ŋina a ŋikamukumukui, kituruwosi ŋina kec.

¹⁶Apotu kiritasi alokiŋaren kec Ŋikanaani, Ŋiperisin, Ŋiyebusi, Ŋisekemiti ka Ŋigerigasi daadaŋ, ido kiboiyoto a nen apaki ŋina aoyan.

¹⁷“Apaki daadaŋ ŋina pa aseciata ikes neni ka Akuj kec eboiyete ikes emam ŋace, anerae erukito ikes ka Akuj ŋina eŋerit asecit.

¹⁸Nai ani imyekinete ikes ŋakiro ŋuna amaikina ikes akiwuap, aponi kilounae ikes jik alopitesyo a ŋulu alalak ka aponi torikoroe ikes nakwap ŋinagela. Aponi tomunaarae Akai ka Akuj kec, kikamasi ka toloma ŋimoe kec lotaunio kec.

¹⁹Nai tokona, aboŋokis ikes nabo akiwuap ŋakiro a Akuj kec ka aboŋut anakiboisyo a daadaŋ aŋuna sek arikoritae, akibois kec ŋina asegan eboikinosi daŋ nakwap ŋina a ŋikamukumukui, anerae amam sek ŋituŋa eboiyete a nen.

²⁰“Aŋun, tokona eketataman ka ekapolon kaŋ, ani kimuryak ŋituŋa ŋul toseca neni ka Akuj kec ka toyenunae iwon asecenu kec, epedoryo iwon akitipeiyor ka akiloun ikes.

²¹Ani pa kerae ikes ŋituŋa ŋulu esecito, emaikina iyoŋ ekapolon todepa ikes anerae eiuni ikes Ekapolon Akuj kec, ido eruworoe iwon ŋulu ikikyenatar ŋituŋa daadaŋ anakwap.”

²²Ani irikakini Akior akirworo ŋakiro ŋun, apotu ŋituŋa daadaŋ ŋulu awuasi irimokinito eema kidiŋ kisyakis akiŋuruŋura. Tolimut ŋikapolokinitok ŋasigarya ka Oloperines ka ŋituŋa daadaŋ ŋulu eboiyete alodiyete anam ka Moab atemar emaikina totubutuboe Akior toruwor ŋanyile.

²³Temasi ikes, “Nyikikuryaka isua aŋuna a Ŋisirael, erae ikes ŋituŋa ŋulu emamukatar agogoŋu, kori apedor ŋinajiet.

²⁴Aŋun, okoe ekapolon Oloperines, oloto kiŋaren, ido emunyari ajore kon ŋina alalan ikes daadaŋ.”