Read ngakarimojong Yudis 6 Bible Online

Yudis 6 - ngakarimojong bible

Yudis 6

¹Ani ililiŋete ŋituŋa ŋulu eŋuruŋurasi alokiŋa atukot, tolimok Oloperines ekapolon a ŋasigarya ka Asiriya Akior alokiŋaren ŋituŋa ŋulugelae ŋulu acununa akirii ka iŋes tema,

²“Ŋae mono iyoŋ Akior ka iyes ŋasigarya a Epuraim ŋuna ikigyelitae aŋuna ke ejie, idwarete aneni kosi lopite ŋolo itiyaata iyes nakoloŋit na, ido ikilimokis isua atemar nyilot akitijikin ŋituŋa a Isirael, anerae eiuni Akuj kec ikes? Ai eyai Akuj ace mati Nebukadinesar? Iyakuuni Nebukadinesar ŋasigarya keŋ, ido tomunyasi ikes anakwap. Nyepedori Akuj kec aiun ikes,

³emunyaryo isua ŋulu ikirae ŋiketiyak a erwosit ikes esibit ituŋanan ipei emunyari. Nyepedorete ikes akitijiore ŋasigarya kosi ŋuna etirok ŋuna edokito ŋaŋolei.

⁴Ikimunari isua ikes, emerakinosi ŋimoru kec a ŋaokot kec, ilelebun ŋawat kec lomanikorin kec. Nyiŋolikinio isua tari ŋikukus a ŋakejen kec, emunyaryo ikes jik. Erwosit Nebukadinesar, ekapolon a akwap a daadaŋ alimu ŋun. Erwor iŋes, mam akirot keŋ ŋina nyiyookin.

⁵“Ani eruwor iyoŋ Akior, esigarit a Ŋiamoni ŋolo ikigyelitae, ilimu iyoŋ ŋakiro ŋun apaki ŋina nyiyookino, nyiŋolikini nabo iyoŋ ereet kaŋ ameun nakoloŋit na tari ŋina enyaŋarya ayoŋ ŋakiro a ŋituŋa a ŋulu apote alo Ijipit.

⁶Ani nai aboŋuni ayoŋ, ikicumyo iyoŋ losyepion a ekileŋ a ŋasigarya kaŋ ka a akwara a ŋiketiyak kaŋ, ido iperi iyoŋ aneni a ŋulu ewanitae.

⁷Tokona, ikiyayete iyoŋ ŋipi kaŋ ikinyakasi nakwap ŋina a ŋikamukumukui, ikiwuakis iyoŋ lotaun epei diyete ŋirotin.

⁸Nyitwani iyoŋ tari ŋina itwakyata kaapei ka ikes.

⁹Ani kire kigeno iyoŋ alotau kon atemar nyerikoryo ikes, nyialoloŋ nai! Erwor ayoŋ ka mam adio a ŋakiro kaŋ ŋina nyiyookino.”

¹⁰Abu nai Oloperines tolimok ŋipi keŋ ŋulu etiyanakinete iŋes alo eema keŋ, akikamun Akior yaasi iŋes Besulia ka inakis iŋes neni a Ŋisirael.

¹¹Aŋun, apotu ŋipi a Oloperines yaasi Akior torikosi iŋes kiŋa alomar yaasi nadipo, ido anadipo apotu kitipeiyosi nakwap ŋina a ŋikamukumukui todolut locowae ŋulu alokwap Besulia.

¹²Ani iŋolikinete ŋikilyok a etaun a ŋol ikes, apotu tolemut ŋiboro kec ŋulu ke ejie, tomotunos alotaun toloto kidiama emukura, kiretakis ŋulu atiŋito ŋadoya ikes nyitipeyosi lomukura, imasamasaete a ŋamoru.

¹³Aŋun, kedaut ikes akiŋop alokwap emukura apotu ikes toena Akior, kimyekis iŋes eperi anakeju a emukura, ido toboŋosi ikes neni a ekapolon kec.

¹⁴Apotu nai Ŋisirael totiyaunos alotaun kec, toryamut Akior, apotu tolacakis iŋes, ido yaasi tooma Besulia kipotokis iŋes neni a ŋikatubok ŋakiro a etaun.

¹⁵Alorwa a ŋul arae Usia lokoku a Mika a ŋolo alokabila a Simeon ka Kabris lokoku a Melikiel ikes arae ŋikatubok alo Besulia.

¹⁶Apotu ikes tonyaraut ŋikasikou a etaun nakibois apei, tomotunos ŋikilyok ŋulusorok ka ŋaberu natukot. Apotu ikes kiwuakis Akior kidiŋ ŋituŋa kec daadaŋ, ido abu Usia kiŋitiŋit iŋes ŋakiro ŋuna apotu kitiyakinos.

¹⁷Toboŋok Akior ikes ŋakiro, tolimok ikes ŋakiro ŋuna apotu kitiyakinos anatukot ka Oloperines ka ŋakiro daadaŋ ŋuna kebu Oloperines tolimu alokiŋaren ŋikarikok ka Asiriya ituro atemar itiyakini imanit Ŋisirael.

¹⁸Apotu nai Ŋisirael toryediko kilipa neni ka Akuj, kikalout ebasi,

¹⁹“Okoe Ekapolon Akuj ŋina anakuj, kiŋolik akituro kec, kisyoni ŋituŋa kosi anajamuwaro kec ka kiŋolik irimaana nakoloŋit na ŋireetin a ŋituŋa a ŋulu italeuno neni kon.”

²⁰Apotu nai ikes kisimukekis Akior ka kitopoloosi iŋes nooi.

²¹Abu Usia ya Akior anatukot, ya iŋes kai keŋ a elope, ido kitemok ŋasuban aŋuna a ŋikasikou, akoloŋit ŋin, apotu ikes kilipa neni ka Akuj a Ŋisirael akuwar kia kiŋarak ikes.