Read ngakarimojong Yudis 7 Bible Online

Yudis 7 - ngakarimojong bible

Yudis 7

¹Akoloŋit ŋina atupakini, abu Oloperines tolimok ŋasigarya keŋ daadaŋ ka ŋikilyok daadaŋ ŋulu ariito ka iŋes arotokin analomar, toloto akirem Besulia ka akikamar ŋirotin ŋulu anakwap a ŋina a ŋikamukumukui ka akitijikin Ŋisirael.

²Aŋun, apotu ŋasigarya kec daadaŋ torotokis akoloŋit ŋin, arae ekimar a ŋasigarya kec a ŋuna alosete a ŋakejen ŋalipyo amiat ka ŋatomonikanikaarei ka arae ŋulu emeto ŋaŋolei ŋalipyo ŋatomon ka ŋaarei pa imaritae ŋiboro ŋulu ayakatar ikes ka ŋasigarya ŋuna alosete a ŋakejen ŋuna ewokito ŋiboro ŋul, arae ikes atoonyi a ŋituŋa ŋina alalan nooi.

³Apotu ikes kiboiyosi nakadipaalat ŋina alodiyete Besulia diyete ecowa, topetakin ikes ameun alo Dosan akitodol Balibaim ka ameun alo Besulia akitodol Ciyamon neni iteosi ka Esidraelon.

⁴Ani iŋolikinete Ŋisirael ŋasigarya ka Oloperines ŋuna alalak nooi, abu tobul ikes nooi, ido kirworikinos make ebasi, “Emunyarete tokona ikes ibore daadaŋ anakwap, emam ibore alomoru, kori anakadipaalae, kori lokamukumukui ŋini ipiyori ikes.”

⁵Kikote neni daŋ, apotu Ŋisirael daadaŋ tolemut ŋiboro kec ŋulujiet, tosodi kedaut akinokakin ŋakimya kidiama naduketa kec ŋuna aoyak, apotu ikes kiboikinos iteete akwap akuwar ŋin daadaŋ nakwaare.

⁶Ani epete ŋirwa ŋiarei, abu Oloperines ya ŋasigarya keŋ daadaŋ ŋuna adokito ŋaŋolei kiŋolikis Ŋisirael daadaŋ ŋulu eboiyete alo Besulia.

⁷Toreb Oloperines neni daadaŋ itoryo elomaryo lotaun a Besulia, tolot aanyun tari ŋilelyan ŋulu aryamunitotor ŋituŋa a etaun ŋakipi, abu iŋes kikama ŋilelyan ŋul ka kiwuak ŋasigarya ŋuna iyokiyete nen, ido toboŋo neni aya ŋasigarya keŋ.

⁸Apotu nai ŋikapolokinitok daadaŋ ŋulu a Ŋiedomi ka ŋikarikok daadaŋ ŋulu a Ŋimoabi ta ŋikapolok a ŋasigarya a ŋakwapin a ŋuna alodiyete anam, potu neni ka Oloperines temasi,

⁹“Okoe ekapolon, kiira ŋakiro ŋuna ikilimokinio isua iyoŋ, ido mam ŋasigarya kon ŋuna earyo.

¹⁰Ŋituŋa lu, Ŋisirael, nyikinyomito ŋakwaaras kec, nai ikinyomito ikes aoyau a ŋimoru a ŋulu iboiyoto ikes, anerae nyepatana akidol kidiama ŋimoru kec.

¹¹Aŋun, ekapolon kosi, nyitijik ikes lopite ŋolo sek icodonorere, kitiya iyoŋ ŋun mam ipei daŋ a ŋasigarya kon ŋini earyo.

¹²Torubak iboi aneni iboiyoto iyes, torubak iboiyete ka ŋikilyok daadaŋ ŋulu irukitotor iyoŋ ka kimyek ŋiketiyak kon kikamasi ŋilelyan ŋulu eleleunito anakeju a emoru,

¹³anerae neni eryamunitotor ŋituŋa a Besulia daadaŋ ŋakipi kec nen. Aŋun, emunyari akure ikes, ido einakinete ikes etaun kec neni kus. Apaki ŋinapei ŋin, elosyo isua kaapei ka ŋituŋa kosi daadaŋ etipeiyosi kidiama ŋimoru ŋulu eapiyete, ido kiboiyoroe nen, kiretakinae ituŋanan idio nyelomu alotaun.

¹⁴Iriyari akoro ikes kaapei ka ŋaberu kec ta ŋidwe kec, ido tari eriŋa nyeara ikes a ekileŋ, ilelebun ŋawat a ŋulu etwakito lorotin a ŋitaunio a ŋulu iboiyoto ikes.

¹⁵Aŋun, inyaŋari iyoŋ ŋakiro kec a aronis, anerae apotu ikes ikiŋero iyoŋ ka apotu nyikijaut iyoŋ a ekisil.”

¹⁶Apotu ŋakiro ŋun kitalakasi Oloperines ka ŋiketiyak keŋ daadaŋ, ido tolimu atemar kitiyae lopite ŋolo alimunitotor ikes.

¹⁷Aŋun, apotu ŋasigarya ŋuna a Ŋiamoni toloto kiŋaren erukito ka ŋuna ka Asiriya ŋalipyo ŋakan, apotu ikes kiboiyosi nakadipaalat, kikamasi neni aokere ŋakipi ka ŋilelyan a Ŋisirael.

¹⁸Kitipeiyosi nai Ŋiedomi ka Ŋiamoni kiboiyosi nakwap ŋina a ŋikamukumukui neni iteosi ka Dosan, kiyakiyasi ŋice a ŋasigarya kec lowae ŋolo alo Kwap ka ŋolo alo Kide, diyete Egirebe neni ayai diyete Kusi diyete ayonae Mokimur. Apotu ŋasigarya ŋuna ka Asiriya ŋunace kiboiyosi tooma adipo, topetakin akwap ŋin daadaŋ, topetakin ŋiemae kec ka ŋagaari ŋuna ewokito akimuj kec neni alalan nooi, ido arae ikes atoonyi a ŋituŋa ŋina alalan nooi.

¹⁹Apotu nai Ŋisirael kikaloikis Ekapolon Akuj kec aŋuna abunio amukeanut todaun aneni kec, anerae erimokinito ŋimoe kec daadaŋ ikes kidiŋ ka amam ikes neni itorete tosiwa aneni a ŋimoe kec.

²⁰Apotu ŋasigarya ka Asiriya daadaŋ, ŋasigarya ŋuna alosete a ŋakejen, a ŋagaari ka ŋasigarya ŋuna adokito ŋaŋolei kirimokis Ŋisirael kidiŋ todolo ŋirwa ŋatomoniuni ka ŋiomwon, akitodol ŋina adaunotor ŋakipi anamoti kec a daadaŋ a ŋulu eboiyete alo Besulia,

²¹toapu tari ŋakare kec aokore, mam akoloŋit ayakatar ikes ŋakipi ŋuna etemokino, anerae epimanakinio ikes ŋakipi.

²²Apotu ŋidwe kec topalagagiata, kirakana akure ŋaberu ka ŋikilyok ŋulusorok alotuŋa kec, ido kirakanakin lorotin a etaun kec ka diyete ŋipukei, todaun agogoŋu adio aneni kec.

²³Apotu nai ŋituŋa daadaŋ, ŋikilyok ŋulusorok, ŋaberu ka ŋidwe tocunun kirimokis Usia ka ŋikepukak a etaun kidiŋ, kiworout ecelasi nooi, temasi neni a ŋikasikou a daadaŋ,

²⁴“Emaikina Akuj totub ŋakiro kus ka ŋuna kosi! Ikiwan iyes isua nooi aŋuna iwouniata akisil ka ŋituŋa ka Asiriya,

²⁵anerae emam tokona ituŋanan epedori akiŋarakin isua, ikigyela isua Akuj napedor kec, ikotere ikipetipetakin isua kwap kiŋaren kec, ikiar akure ka alemun.

²⁶Tokona, tonyaraatu ikes, kipotokis etaun daadaŋ toŋatasi ŋasigarya ka Oloperines ka ŋulu erukitotor iŋes daadaŋ;

²⁷anerae ejok ikikamasi ikes iwon. Kire jik, ikiruwor iwon ŋipi, nai eiun akiyar yok ka nyiŋolikinio iwon ŋidwe yok etwakete ka ŋaberu yok iridakinete ka ikes.

²⁸Ikilipi isua kisuudata nakuj ka akwap ta Akuj yok ŋakiro nu, kisuuda Akuj atapapaa yok ŋina ikisicani iwon aŋuna a ŋasecisya yok ka aŋuna a ŋasecisya atapapaa yok. Akuj kitiya nakoloŋit na ŋakiro ŋuna alimun isua!”

²⁹Apotu nai ŋituŋa anatukot a daadaŋ a ŋina apolon kiololoto, kikaloikis Ekapolon Akuj iworoete nooi.

³⁰Nai abu Usia tolimok ikes tema, “Tomukyaketa, ŋikaitotoi kaŋ ka ŋakaitotoi kaŋ! Edaŋidaŋakisi ŋirwa ŋice ŋikan bon; alotooma apaki ŋin ikisyoni nabo Ekapolon Akuj yok iwon, anerae nyikiŋeri iŋes iwon jik.

³¹Nai ani kelunyar ŋirwa ŋul, toriŋa iwon nyeryamuna akiŋarakinet, etiyae nai ayoŋ ŋuna ilimut iyes.”

³²Kitolot nai Usia ŋituŋa, ŋinituŋanan toboŋo nakibois ŋina iyokiyo iŋes etaun, toloto ŋituŋa kidiama ŋarwatatain ka naduketa ŋuna aoyak alotaun kec. Tolimok Usia ŋaberu ka ŋidwe toboŋosi lore. Aryamunito ŋituŋa ŋican ŋulu apolok alotaun.