Read ngakarimojong Yudis 8 Bible Online

Yudis 8 - ngakarimojong bible

Yudis 8

¹Alorwa a ŋul, abu Yudis kiira ŋakiro ŋun. Arae Yudis nakoku a Merari a ŋolo arae lokoku a Os a ŋolo arae lokoku a Yosepu a ŋolo arae lokoku a Osiel a ŋolo arae lokoku a Elikia a ŋolo arae lokoku ka Anania a ŋolo arae lokoku a Gideon a ŋolo arae lokoku a Rapael a ŋolo arae lokoku ka Aitub a ŋolo arae lokoku ka Eliya a ŋolo arae lokoku ka Ilikia a ŋolo arae lokoku a Nasanael a ŋolo arae lokoku a Salamiel a ŋolo arae lokoku a Saradasai a ŋolo arae lokoku a Manase a ŋolo arae lokoku a Isirael.

²Arae ekile a Yudis Manase ka arae iŋes ŋolo alokabila ka anateker a Yudis. Kebu Manase totwan ŋirwa ŋulu alemere ŋikinyom ŋulu esibito erau.

³Apaki ŋina eteo Manase ŋituŋa eeniyanarete ŋakyes a ŋikinyom alomanikor, kebu amwanis a akoloŋ kiraka iŋes, ido abu iŋes tolot kai keŋ ka abu totwan alokitaada keŋ alotaun keŋ a ŋolo a Besulia. Aŋun, aponi tonukae iŋes neni anukitae atapapaa keŋ nalup ŋuna alokidiŋ Dosan ka Balamon.

⁴Abu Yudis kiboi erae apuserut ŋikaru ŋiuni ka ŋilapyo ŋiomwon

⁵alore keŋ aneni abu iŋes kigurok eema aŋuna keŋ kidiama akai keŋ. Abu iŋes tonap ŋiguniyae anacir ka tonap ŋilowi ŋulukigworet.

⁶Abu iŋes kiredak akiron ŋirwa daadaŋ ŋulu ariŋaakar iŋes erae apuserut, mati akoloŋit ŋina eŋarenikinit Sabato ka akoloŋit ŋina a Sabato alope, akoloŋit ŋina iŋarenikinit akoloŋit ŋina esyaunan ke elap a ŋolokitete ka akoloŋit ŋina elomunia elap ŋolokitete ta ŋirwa ŋulu a ŋasuban ka ŋirwa ŋulu elelyaniata Ŋisirael.

⁷Ebus akuwan a Yudis etakani ka anirari ituŋanan akitere iŋes. Kebu lokile keŋ Manase kimyekinia iŋes egolid, esilipa, ŋipi ka ŋapi, ŋibaren ka ŋimanikorin; abu Yudis kiyok ejok ŋiboro ŋul.

⁸Mam ituŋanan erworo ŋuna aronok aŋuna a Yudis, anerae etopoloorit iŋes Akuj ka elipi einakina nooi.

⁹Ani iirari Yudis ŋakiro ŋuna apipilak ŋuna erworosi ŋituŋa neni a ekepukan, anerae abu akicana ŋakipi kitililimiyo ikes ka ani iirari iŋes ŋakiro daadaŋ ŋuna abu Usia tolimok ŋituŋa ka epite ŋolo eikinia iŋes ikes anakikoŋ akipotokin etaun neni a ŋituŋa ka Asiriya kelunyar ŋirwa ŋikan,

¹⁰abu iŋes kiyakiya aketiyan keŋ ŋina apolokinit ŋiboro daadaŋ ŋulu ayakar iŋes, kiyakiya iŋes anyarare Usia, Kabris, Karimis ka ŋikasikou a etaun daadaŋ.

¹¹Apotu ŋul potu neni keŋ, tolimok iŋes ikes tema, “Iyes ŋikepukak a ŋituŋa a Besulia, topupokinae ayoŋ! Nyiyookino ŋakiro ŋuna ilimokis iyes ŋituŋa nakoloŋit na, ikoŋo daŋ iyes ka ilimut akikoŋiet ŋin ikoŋete neni ka Akuj, iikis atemar ipotokinete etaun neni a ŋimoe yok erae pa kebu Ekapolon ikiŋarak iyes alotooma ŋirwa ŋulu emwa nen.

¹²Ataŋae iyes ikatakinete Akuj nakoloŋit na, ido kitusubunos Akuj torae bo ŋituŋa?

¹³Ikatakinito iyes Ekapolon ŋolo etiron, nai nyiyenunete iyes ŋakiro ŋadi.

¹⁴Nyipedorete iyes ayenun ŋakiro ŋuna eya lotau a ituŋanan, kori ayenun ŋakiro ŋuna etami ituŋanan akitiya, alipite nai ipedoryata iyes aripirip ŋakiro a Akuj a ŋina etiyauni ŋiboro lu daadaŋ, kori ayenun ŋuna etami iŋes, kori ayenun apolou a ŋakiro a ŋuna etami iŋes? Okoe ŋikaitotoi kaŋ, nyitiyata ŋun, nyitoŋoa Ekapolon Akuj yok;

¹⁵anerae ani pa keseu iŋes akiŋarakin iwon alotooma ŋirwa lu ŋikan, eyakar iŋes apedor ŋina ikiunia iwon apaki daadaŋ ŋina ecamit iŋes, kori ŋina ikimunyaria iwon alokiŋaren ŋimoe yok.

¹⁶Nyikatakis akiŋer alosikinet a Ekapolon Akuj yok, anerae nyikwaan Akuj ka ŋituŋa, nyemaikina iwon ekatakisi akiŋer iŋes, kori ekatakisi akiŋer lopite ŋolo ikipedorya akiŋer ituŋanan, emaikina ikiu iŋes iwon alotooma adyekit yok iŋes.

¹⁷Aŋun, ani eriŋa ikidarit iŋes ikilaku iwon, onyarata iŋes ikiŋarak iwon, ido iirari iŋes adyekitoi yok, erae kejoikis iŋes ŋakiro yok.

¹⁸“Alorwa a ŋulu a anyamet yok, kori alorwa a lu, mam ekabila, kori ateker, kori ŋituŋa, kori etaun yok ilipi neni a ŋakujo a ŋuna itiyaunitae, lopite ŋolo etiyaere alorwa a ŋulu alunyarosi.

¹⁹Ŋakiro ŋun, ikes epotokinere atapapaa yok naaro ka naŋataro, aŋun, apotu ikes toryamut ŋican ŋulu apolok nooi alokiŋaren ŋimoe yok.

²⁰Nai mam akuj ace ikiyeni iwon mati iŋes bon, aŋun ikigeno iwon atemar nyikijamuwari iŋes iwon, kori akwap yok adio,

²¹anerae ani kikikamar iwon, ikamaryo akwap a Yudaya daadaŋ ka eŋataryo ŋiboro anakibois yok a ŋina asegan, ido ikiinakini iŋes iwon otaca akinyasuno keŋ a ŋaokot yok.

²²Eruwor aaro a ŋiyeneta yok ka akikamaro a akwap ta ekasile ŋolo a ŋakiboisyo yok nakyes yok aneni a ŋigelaanotin, aneni daadaŋ ikilosi iwon akitiya ikirae ŋipi, ido ikiruwor iwon ŋulu ikiyanyete ka ŋulu ikijamuwaritae alotuŋa a ŋulu ikiyayete iwon;

²³anerae nyikiinakini iwon apitoonut yok akitopolooro, nai ituruwori Ekapolon Akuj yok apitoonut yok ŋina nyikitopolooritere iwon.

²⁴“Aŋun, ŋikaitotoi kaŋ, oruworos akitoodikinet aneni a ŋiyeneta yok, anerae neni yok bon epedoryata ikes akiyar ka neni yok eyakaunor ejok akibois ŋina asegan, kaapei ka Akai ka Akuj ta namuroet nakan yok.

²⁵Tari kikote ŋakiro nen, emaikina iwon olakarosi neni a Ekapolon Akuj yok, ŋina ikikatakinit iwon lopite ŋolo ekatakinitor atapapaa yok.

²⁶Totamunito ŋakiro ŋuna abu iŋes kitiya neni ka Aburaam ka epite ŋolo ekatakinitor iŋes Isaka ta ŋakiro ŋuna apotu kitiyakinos neni a Yakob alo Mesopotamia a ŋina eyai Siria, apaki ŋina eyokiyo iŋes ŋamesekin a Laban a mamae keŋ.

²⁷Nyikatakina Akuj iwon a akim, lopite ŋolo etiyaa neni atapapaa yok a ŋul, ikotere eyenunia ŋuna eya lotai kec, mam nyinyaŋi Akuj ŋakiro ŋadi aneni yok, nai isicani Ekapolon ŋulu eminasi iŋes ikotere itatami ikes.”

²⁸Tolimok nai Usia Yudis tema, “Ŋakiro daadaŋ ŋuna ilimu iyoŋ eponito alotau a ŋolo iyookino, ido mam ituŋanan epegakini ŋakiro kon.

²⁹Meere nakoloŋit na bon eleereunio aosou kon, nai ameun anakisyakinet akiyar kon aanyut ŋituŋa daadaŋ ayenut kon, anerae ŋuna eyeat etau kon erae ŋuna iyookino.

³⁰Nai abu akure tonyam ŋituŋa nooi ikitiŋakis isua akitiya aŋuna kec ŋuna sek aponi isua kiikinae ikes ka apotu ikiinakis isua akikoŋ atemar nyikibili ŋuna aris kelimun.

³¹Tokona, ikwapei iraakar iyoŋ aberu ŋina itopoloorit Akuj, kilip aŋuna kosi, ikotere iyakuuni Ekapolon akiru kilelebun ŋakipi nakarei kosi. Nyikipalagagiar isua aŋuna ka akure.”

³²Tolimok nai Yudis ikes tema, “Kiirasi ŋakiro kaŋ, eapi ayoŋ akitiyakin ŋakiro ŋuna eroparete eyenio ananyameta a daadaŋ a ŋuna a ŋiletok yok.

³³Nakoloŋit na nakwaare, towua alopuke ke etaun, ikotere oloto ayoŋ ka aketiyan kaŋ, ido ani kelunyar ŋirwa ŋulu ipotu iyes kiikis akipotokin etaun lomoe yok, elakuni Ekapolon Isirael aŋuna a etic kaŋ.

³⁴Nai, nyikatakis ayenun ŋakiro ŋuna etiyae ayoŋ, anerae nyakalimokini ayoŋ iyes tari ŋina erikakinia ayoŋ akitiya ŋuna eapi ayoŋ akitiyakin.”

³⁵Tolimokis Usia ka ŋikasikou Yudis temasi, “Tolot a ekisil, ikilipi ikiŋarenik iyoŋ Ekapolon Akuj, kinyaŋa ŋakiro a ŋimoe kosi.”

³⁶Aŋun, apotu ikes torotokis alo eema, toloto nakiboisyo kec ŋuna eyokiyoto ikes etaun.