Read ngakarimojong Yudis 9 Bible Online

Yudis 9 - ngakarimojong bible

Yudis 9

¹Abu nai Yudis toper alokwap tobuburiyar itopoloorit Akuj, kiwuak ekuron nakou keŋ kisileereu eguniya ŋolo anapit. Apaki ŋinapei arae ŋina einakinere ekinyate ŋolo ke eboŋ alo Kai ka Akuj alo Yerusalem. Kikaloik Yudis Ekapolon iworoe nooi tema,

²“Okoe Ekapolon Akuj a papaa kaŋ Simeon, a ŋolo ibu iyoŋ inak ekileŋ akinyaŋarya ŋakiro a ŋikilyok a ŋulugelae a ŋulu apotu tocilasi ŋilowi a apese a ŋina pa eryamakina ka ekile aŋuna ka akitiŋakin iŋes akiryamakin ka iŋes, ido kisileereut ŋamuroi keŋ kisiruma iŋes ŋileec ka amunaar akook keŋ kisuruma iŋes ŋileec; anerae ilimunit iyoŋ ebe, ‘Nyemaikina kitiyae ŋun,’ nai apotu ikes kitiyata ŋun.

³Aŋun, ibu iyoŋ kipotok ŋikepukak kec toarae ka aponi toarakinae ikes lokitaadae kec ŋulu aponiata ikes kitiyaata ŋuna a ŋileec kisidoŋo ŋaokot nen, ido ibu toar ŋipi ka ŋirwosi ta ŋikapolok alokicoloŋo kec a ŋulu epukatotor.

⁴Ibu iyoŋ kipoto ŋaberu kec toŋatarae, torikoroe ŋidwe kec ŋulupesur ka tokorakinae ŋiboro kec ŋulu aŋataryo neni a ŋidwe kon aŋulu imina iyoŋ, aŋulu ikilelakinito iyoŋ nooi ka aŋulu aŋerito aara make, ido apotu ikes kilipa neni kon aŋuna ka akiŋarakino. Okoe Akuj, Akuj kaŋ topupokinae ayoŋ daŋ ŋina arae apuserut.

⁵“Idau iyoŋ akitiya ŋakiro nu ka ŋuna apotu tolunyaros ekiŋaren ta ŋuna ewuapakinete. Ibu iyoŋ toyeu ŋiboro ŋulu eyakasi tokona ka ŋulu moi eyakaunosi. Etiyakinosi ŋakiro ŋuna sek itami iyoŋ,

⁶apotu ŋiboro ŋulu itubuni iyoŋ atemar toyakaun potu neni kon temasi, ‘Ikiya isua ne!’ Itemokinitoe ŋiticisyo kon ekiŋaren ka eyenen ŋatubonokineta kon eriŋa nyitiyakina.

⁷“Tokona, ŋituŋa ka Asiriya lu, erae ikes asigar ŋina alalan nooi, iturosi ikes aŋuna a ŋaŋolei kec ka ŋikametok ŋaŋolei kec, iturotor agogoŋu a ŋasigarya kec aŋuna elosete a ŋakejen ka ikinyomito ŋaupala ka ŋakwaaras, ŋakawo a ŋikaleŋeleŋe ka ŋadoya. Nyeyenete ikes atemar irae iyoŋ Ekapolon ŋolo iloununui ŋijiesyo, erae ekiro kon Ekapolon.

⁸Kilou agogoŋu kec ka araakau kec ŋiketirok ka kilou apedor kec a aŋoit kon, anerae ecamito ikes amunaara akibois kon ŋina asegan ka akinyas eema kon ŋolo eyai ekiro kon ŋolo ka apolou, ecamito abilibiliyar ŋamomwar anamuroet kon a ekileŋ.

⁹Kiŋolik akituro kec, kiyaku neni kec anyunyura kon. Inakinae ayoŋ ŋina arae apuserut akan ŋina egogoŋ etiya ŋuna ayeunit ayoŋ akitiyakin.

¹⁰Kisitiya ŋakiro ŋuna ka amodiyo ŋuna alimuni ayoŋ aarya ŋipi, ŋirwosi ka ŋikapolok ta ŋiketiyak kec, kilou akituro kec a akan a aberu.

¹¹“Nyeyai agogoŋu kon nalalau a ŋituŋa, kori araakau kon ŋolo etiron nagogoŋu a ŋituŋa. Nai irae iyoŋ Akuj a ŋulu ejamuwaritae, akeŋarakinan a ŋulu isicanitae, ekeŋarakinan a ŋulupalag, ekeyokon a ŋulu eŋeritoe ka ekaiunan a ŋulu emam akigeno.

¹²Okoe, okoe Akuj a papa kaŋ, Akuj ŋina a akwap a Isirael, Ekapolon a akwap ka nakuj, akasubunan a ŋakipi, arwosit a ŋisubuna kon a daadaŋ, kiira akilip kaŋ!

¹³Kimyek amodiyo kaŋ inak ajeme ka towan neni a ŋulu eyeunito akitiya ŋakiro ŋuna aryenyaanak neni a acamunet kon ka Akai kon ŋina ke etal ka moru Sion ka akai ŋina erae ŋina a ŋidwe kon.

¹⁴Kimyek ŋituŋa a akwap kon daadaŋ ka ŋikabilae daadaŋ toyenut atemar irae iyoŋ Akuj ŋina ka apedor ka ŋina etiron ka atemar mam ice ŋini iyoki ŋituŋa a Isirael mati iyoŋ bon!”