Read ngakarimojong Esta 2 Bible Online

Esta 2 - ngakarimojong bible

Esta 2

¹Ekaku a ŋakiro a ŋun, kedaun anyunyura a erwosit daŋ, totamu erwosit Basiti ka ŋakiro ŋuna etiyat ta ŋakiro ŋuna abu erwosit totub aŋuna a Basiti.

²Temasi ŋiketiyak ŋulu etiyaete neni a erwosit ebe, “Emaikina kiwarakinae erwosit ŋapesur ŋuna ajokak a ŋipitesyo ŋuna nyiryamakina ka ŋikilyok.

³Itemokino erwosit toseu ŋikapolok anakwapin a daadaŋ a ŋuna ipukat iŋes, ikotere ŋikapolok ŋul ecununete ŋapesur daadaŋ ŋuna ejokak ŋipitesyo ŋuna nyiryamakina ka ŋikilyok, yaut Susa kai ka apukan ŋina eboiyoto ŋaberu. Inakis nakan a Egai a ekolup a ŋolo eyoki ŋaberu aneni eboiyo erwosit; itemokino inakinae a nen ŋaberu ŋamyeta kec ŋuna itesegatar.

⁴Apese ŋina enirari erwosit iŋes eruwor arwosit akilo Basiti.” Kitalakasi erwosit ŋakiro ŋun, ido kitiya ikwaŋinapei.

⁵Apaki ŋin, ayai kai ka apukan ŋina a Susa eyudayat ŋolo anyaritae Moridekai lokoku a Yair a ŋolo arae lokoku Semei. Arae Semei lokoku a Kis a ŋolo arae ŋolo ke ekabila a Benjamin.

⁶Arae Kis ŋolo aponi torikoroe alo Yerusalem kaapei ka ŋulu arikoryo ka Yekonia erwosit ŋolo a Yuda ŋolo abu Nabukadinesar erwosit ŋolo a Babilon ya nakwap keŋ.

⁷Moridekai iŋes kitanuni Adasa (iŋes Esta) nakoku alokaato a papa keŋ, anerae amamukar Esta papa kori toto, arae iŋes apese ŋina ajok ka ebus. Ani etwakete papa ka toto keŋ, abu Moridekai kiurya Esta erae nakoku keŋ.

⁸Ani kelimor ŋakiro ŋuna alimuni erwosit, kedaun akitiyakin ŋuna alalak ŋuna abala erwosit kitiyata, tocunakinae ŋapesur ŋuna alalak kai ka apukan ŋina alo Susa nakan a Egai. Aponi yaarae Esta daŋ kai a erwosit; inakinae nakan a Egai a ŋolo eyoki ŋaberu.

⁹Abu Esta tonira Egai, tojoik akilo, ido abu Egai inak iŋes akimyet ŋina etesegar ka akimuj ta ŋaketiyak ŋuna aseunio alokai a erwosit. Ya Egai Esta ka ŋaketiyak keŋ nakibois ŋina ajokan nooi alokai a ŋina eboiyoto ŋaberu.

¹⁰Abu Esta nyiteyenik ituŋanan idio ŋituŋa ŋulu ka akwap keŋ, kori ŋiyeneta keŋ, anerae keris Moridekai kicik iŋes nyelimo.

¹¹Aŋinakoloŋit, alosenene Moridekai nen, kiŋaren ebarasan ŋolo ka akai a ŋina eboiyoto ŋaberu, ikotere eyenuni epite ŋolo eyakar Esta ka ŋuna itiyakin neni keŋ.

¹²Todol apaki ŋina elosyo ŋinapese neni a erwosit Ausero, ekaku a ŋilapyo a ŋitomon ka ŋiarei a ŋulu ka akitesego a ŋaberu, anerae apotu ŋirwa ŋulu ka akitesego kirikakin: Ŋilapyo ŋikanikapei itesegasi akimyet a ŋina ke eminae a ŋolo akukunyon ka ŋilapyo ŋikanikapei itesegasi ka akimyet a ŋina akukunyon nooi ta ŋamyeta ŋace ŋuna eninasi ŋaberu.

¹³Ani kitesegun ŋinapese, apedori alosit neni a erwosit. Ainakinio iŋes ibore daadaŋ ŋini eŋita iŋes ikotere elomarya kiŋa akai ŋina eboiyoto ŋaberu, tolosyo kai ka apukan neni a erwosit.

¹⁴Apedori ŋinapese alosit kai a erwosit eboŋ; ani nai taparacu toboŋo tolot kai ŋina eboiyoto ŋaberu ŋina a ŋaarei, ŋina arae Sasigas edarit. Arae Sasigas ekolup ŋolo a erwosit ŋolo eyoki ŋaberu a erwosit ŋuna pa eitit. Mam apese apedori aboŋor neni a erwosit, mati kenirarit sek iŋes erwosit, ido nai tonyarae ŋin a ekiro keŋ.

¹⁵Ani edoluni apaki ŋina alosyo Esta (Arae Esta nakoku Abikail a ŋolo arae lokaato a papa keŋ a Moridekai a ŋolo abu kiurya Esta ikwapei nakoku keŋ) neni a erwosit, mam ibore abu iŋes kiŋitak akiya, mati ŋuna alimuni Egai ekolup a erwosit ŋolo eyoki akai ŋina eboiyoto ŋaberu. Tojoik Esta ŋituŋa daadaŋ ŋulu apotu kiŋolikis iŋes.

¹⁶Ani edoli elap ŋolo a ŋitomon ŋolo enyaritae Tebet, ekaru ŋolo a ŋikanikaarei ipukat Ausero, yaarae Esta kai a apukan ŋina eboiyo erwosit.

¹⁷Abu erwosit tominak Esta nooi akilo ŋaberu ŋunace daadaŋ; alokidiŋ ŋapesur ŋuna pa eryamakina ka ŋikilyok ŋuna abu erwosit taanyu, abu Esta tojoik erwosit, ido abu erwosit tominak iŋes. Aŋun, abu erwosit kiwuak ebokot nakou ke Esta, kituruwo iŋes arwosit kilunyokin neni a Basiti.

¹⁸Tosodi nai erwosit kitemok ŋasuban ŋuna apolok nooi aŋuna a daadaŋ a ŋulu epukato ka iŋes ta ŋiketiyak keŋ. Arae ŋasuban ŋun ŋuna a Esta. Abu erwosit inak akieŋun aloticisyo akoloŋit ŋin ŋituŋa a ŋakwapin a ŋuna epukat iŋes, inak ikes ŋainakineta lotyae ŋolo apedoritor iŋes ainakin ŋituŋa a ŋinakwap epukat iŋes.

¹⁹Ani ecunakinio ŋapesur acunakinet ŋina a ŋaarei, abu Moridekai bu kiboikin lopuke a erwosit.

²⁰Apaki ŋin ariŋa Esta nyelimoro ŋiyeneta keŋ kori ŋituŋa ŋulu ka akwap keŋ, ikwapei sek icikitor Moridekai iŋes, anerae abu iŋes torubak iwuapit ŋakiro a Moridekai lopite ŋolopei sek ewuapitor apaki ŋina etopolounio Moridekai iŋes.

²¹Ŋirwa ŋulu eboiyo Moridekai alopuke a erwosit, toŋoa Bigitan ka Teres neni a erwosit totukut akiar iŋes. Arae ŋuluarei ŋul ŋikolupae ŋulu a erwosit ŋulu edarito alos a erwosit.

²²Nai kebu Moridekai toyenu atuko ŋin, tosodi tolimok arwosit Esta, ido abu Esta alokiro a Moridekai, tolimok erwosit Ausero ŋakiro ŋun.

²³Ani kedaun akimimiun ŋakiro ŋun ka kedaun aryamun iyookino, aponi ŋikilyok ŋul ŋiarei kinenekinoe lokitoe ikotere etwakete. Kigirae ŋakiro kec alokiŋaren erwosit lokitaabo ŋolo a ŋakiro a ŋirwa a ŋul.