Read ngakarimojong Esta 6 Bible Online

Esta 6 - ngakarimojong bible

Esta 6

¹Akoloŋit ŋin nakwaare, abu erwosit kikoler; aŋun, abu tolimu atemar yaunae ekitaabo ŋolo egiritae ŋakiro apukan ŋuna a ŋirwa a ŋulu epukator iŋes. Aponi nai yaunae ekitaabo ŋol tosyomae alokiŋaren a erwosit.

²Toryamunae igiritae lokitaabo ŋol ŋakiro ŋuna kelimokinit sek Moridekai erwosit. Ŋakiro a Bigitana ka Teres, ŋikolupae ŋiarei ŋulu a erwosit ŋulu edarito alos a erwosit, ŋulu kepotu totukut akiar erwosit.

³Kiŋit erwosit ŋiketiyak keŋ tema, “Ajokis ani, kori apolou ani aponi iwon inakinae Moridekai a ŋakiro a ŋun?” Toboŋokis ŋiketiyak a erwosit iŋes temasi, “Mam ŋakiro aponi kitiyae neni keŋ.”

⁴Kiŋit ikes erwosit tema, “Ŋae eyai nalapatu?” Arae apaki ŋinapei ŋin alomarya Aman nalapatu ŋina ka akai a erwosit alimokin erwosit kinenokinoe Moridekai nakito ŋuna keris iŋes kitudupak ŋituŋa.

⁵Aŋun, apotu ŋiketiyak a erwosit tolimokis iŋes ebe, “Aman eyai tooma, ewoi analapatu.” Tema erwosit neni kec. “Kimyekisi iŋes tolomu ne.”

⁶Aŋun, abu Aman tolomu tooma neni ayai erwosit, kiŋit erwosit iŋes tema, “Anukiro itemokino kitiyae neni a ekile a ŋolo ecamit erwosit akitopoloor?” Tema Aman bon alotau keŋ, “Ŋae mono tokona ecamit erwosit akitopoloor akilo ayoŋ?”

⁷Aŋun, abu Aman toboŋok erwosit tema, “Emaikina nu kitiyae lokile ŋolo icamit iyoŋ akitopoloor:

⁸Emaikina yaunae ŋilowi ŋulu ka apolou ŋulu enapenene erwosit kitanapikinae ekile ŋol, yaunae aŋole ŋina edokenene erwosit itanapikinitae ebokot nakou.

⁹Emaikina ŋilowi ŋul ka aŋole ŋin inakinae neni a epei a ŋolo epol akilo ŋulucekapolok ŋulu ipukato ka erwosit. Emaikina ŋikapolok ŋuluce kitanapa ekile ŋolo ecamit erwosit akitopoloor, yaasi ikes iŋes kitemekis ŋirotin a etaun edokit aŋole. Emaikina ikes kiseraete alokiŋaren keŋ ebasi, ‘Kiŋolikisi epite ŋolo emaikina kitiyae neni a ekile a ŋolo aseu erwosit akitopoloor.’ ”

¹⁰Tolimok nai erwosit Aman tema, “Ape atipei! Tolemu ŋilowi ka aŋole, kitiya ŋuna ilimu iyoŋ neni a Moridekai a Eyudayat a ŋolo iboi alopuke a erwosit. Nyimyek akitiyakin akirot adio alotooma ŋuna ilimu iyoŋ.”

¹¹Aŋun, abu Aman tolemu ŋilowi ka aŋole, kitanapik ŋilowi neni a Moridekai, kitodoka naŋole, ya kitoryo nalapatu ŋina alokidiŋ etaun, iserae alokiŋaren keŋ ebala, “Kiŋolikisi epite ŋolo emaikina kitiyae neni a ekile a ŋolo aseu erwosit akitopoloor.”

¹²Ekaku, abu Moridekai toboŋo lopuke a erwosit, nai abu Aman kionyak atipei kai keŋ, kigwor a nen imukit akou.

¹³Ani elimokini Aman Seres aberu keŋ ka ŋikonei keŋ daadaŋ ŋakiro ŋuna apotu kitiyakin neni keŋ, temasi Seres ka ŋikonei ka Aman, “Aŋuna eraakar Moridekai ŋolo alema apolou aneni kon, ŋolo erae eletoinit a Ŋiyudayan, nyipedori nabo iyoŋ akiloun iŋes jik. Nai kire jik, iruwor iyoŋ ecaryoit alokiŋaren keŋ.”

¹⁴Ani eriŋa ikes irworosi ka Aman, todolut ŋikolupae a erwosit, kibunyasi Aman alosit nasuban ŋuna etemokinit Esta.