Read ngakarimojong Esta 8 Bible Online

Esta 8 - ngakarimojong bible

Esta 8

¹Akoloŋit ŋin, abu erwosit inak Esta akai ka Aman a ŋolo arae emoit a Ŋiyudayan; ido abu Moridekai bu kiŋaren erwosit, aŋuna kebunio Esta tolimok erwosit ayena keŋ ka Moridekai.

²Abu nai erwosit tolemu ekaboboot keŋ ŋolo ka apolou ŋolo keris sek iŋes kelacu aneni ka Aman, ido abu inak Moridekai. Aŋun, abu Esta inak Moridekai apolokin akai ka Aman.

³Todyek nabo Esta erwosit, toramakin nakejen a erwosit kigwor, kimaima erwosit alemar aronis ŋina abu Aman Egagitait toyeu akitiyakin ka ŋuna emanitor Ŋiyudayan.

⁴Kikeu nai erwosit aŋuna ke Esta ebela keŋ ŋolo ka apolou, ŋolo etiyaunitae a egolid, tonyou Esta towo alokiŋaren erwosit.

⁵Tema Esta neni a erwosit, “Ani kejokak aneni kon erwosit ka ani kilakara iyoŋ aŋuna kaŋ, ekelipit kigirae akirot ŋina inyakunere ŋabaruwae daadaŋ ŋuna abu Aman lokoku ka Amedasa a ŋolo arae Egagitait kitemok ka kigir amunyarya Ŋiyudayan anakwapin a ŋuna ipukat iyoŋ daadaŋ,

⁶anerae ekokini ayoŋ ai edaŋidaŋi eteunit ŋican eponito neni a ŋituŋa kaŋ? Kori ekokini ayoŋ ai edaŋidaŋi eteunit amunyaro ebunit neni a ŋiyeneta kaŋ?”

⁷Tema nai erwosit Ausero neni ka arwosit Esta ka neni a Moridekai a Eyudayat, “Kiirasi, adau ayoŋ ainakin Esta akai ka Aman, ido adaut ŋituŋa akinenekin Aman nakito aŋuna abunio iŋes toyeu amunyar Ŋiyudayan.

⁸Ipedorete iyes akigir ŋakior ŋun lopite ŋolo italakarit Ŋiyudayan, kigira alokiro a erwosit, ido kiwuanakis emacar ŋolo ke ekaboboot a erwosit neni egolokinitere ŋakiro ŋun; mam ituŋanan eŋeri kinyaku.”

⁹Aponi apaki ŋin tonyaraunae ŋikegirigirak a erwosit elap ŋolo a ŋiuni, iŋes elap ŋolo enyaritae Sipan, ŋirwa ka elap ŋatomoniarei ka ŋiuni. Kigira ŋul ŋakiro lopite ŋolo abunio Moridekai kicikia Ŋiyudayan ka tolimokinia ŋulu awoikinito erwosit anakwapin akwap keŋ ka ŋulu epukato ŋakwapin daadaŋ akwap a ŋin anyoun alo India tari Esiopia. Arae ŋakwapin ŋun daadaŋ amiat ka ŋatomoniarei ka ŋikanikaarei; kigirakis ikes a ŋinakwap ŋakiro lopite ŋolo igiryata ŋituŋa akwap a ŋin ka kigirakis ikes ŋulutuŋa ŋakiro a ŋajep kec. Ŋiyudayan daŋ kigirakinae alopite a ŋolo egiryata ikes ka anaŋajep kec.

¹⁰Kigir Moridekai ŋabaruwae alokiro a erwosit Ausero, ido toenik ekaboboot a erwosit neni egolokinitere ŋakiro ŋun. Kiyakiya iŋes ŋabaruwae ŋun yaasi ŋikametok ŋaŋolei ŋuna apiranak ŋuna auritae alosipan a ŋolo ka apukan.

¹¹Anabaruwae a ŋun, abu erwosit tocamak Ŋiyudayan ŋulu aya ŋolotaun a nen acunakin tojieto aŋuna kec make. Amaikina ikes toara ka tomunyasi ajore a ŋulutuŋa daadaŋ itijikinete ikes kori ŋinakwap daadaŋ itijikini ikes. Amaikina ikes kitiyata ŋun neni a ŋidwe ka ŋaberu a ŋituŋa a ŋul ka toŋatasi ŋiboro a ŋituŋa a ŋul.

¹²Arae akoloŋit apei bon ayeunitae akitiyakinia ŋun alotooma ŋakwapin daadaŋ ŋuna ka akwap a erwosit Ausero. Arae akoloŋit ŋin ŋirwa ka elap ŋitomon ka ŋiuni, elap ŋolo a ŋitomon ka ŋiarei, ŋolo enyaritae Adar.

¹³Aponi yaarae ŋakiro ŋuna egiritae ŋun a ŋinakwap erae ekisil ŋolo etutubi, tolimokinae ŋituŋa daadaŋ. Tolimokinae Ŋiyudayan akitemokino aŋuna ka akoloŋit a ŋin akitiya anyaŋan neni a ŋimoe kec.

¹⁴Aŋun, apotu ŋikakerak todokakis ŋaŋolei ŋuna apiranak ŋuna ka apukan, toema kiŋa atipei, anerae alimokinit erwosit ikes akionyakin. Aponi nai ekisil ŋol tolimokinae lotuŋa alokai ka apukan a ŋina alo Susa.

¹⁵Torotok nai Moridekai alokiŋaren erwosit enapit ŋilowi ŋulu ka apolou ŋulupusiyek ka ŋulu akwaŋak. Tonapite ebokot ŋolo apolon ŋolo a egolid ka elou ŋolo amilimilan ka ŋolopus areŋan. Tolakaros ka tolelyana a ŋun ŋituŋa ŋulu a Susa.

¹⁶Aneni a Ŋiyudayan, apotu ŋun toruwor: Akiboi emam ŋace, alelyan, alakara ka akitopolooryo.

¹⁷Alotooma ŋinakwap daadaŋ ka ŋolotaun daadaŋ neni aponi tolimokinae akirot a erwosit ka ekisil ŋolo abu iŋes kitutub, apotu Ŋiyudayan tolelyana ka tolakaros. Kiwuanakis ŋasuban ka kieŋut aloticisyo. Kibelekinos ŋituŋa ka akwap a ŋin ŋulu alalak toruwor Ŋiyudayan, anerae apotu ikes tokuryaketa aŋuna a Ŋiyudayan.