Read ngakarimojong Awos. 1 Bible Online

Awos. 1 - ngakarimojong bible

Awos. 1

¹Ŋirorwa a ŋidwe a Yakob a ŋulusapa, a ŋulu arukorete ka iŋes Ijipit, erukito ŋinituŋanan ka ekal keŋ ikes lu:

²Ruben, Simeon, Lepi ka Yuda;

³Isakar, Sebulon ka Benjamin;

⁴Dan, Naputali, Gad ka Aser.

⁵Arae ekimar a ŋiletok a Yakob daadaŋ ŋatomonikanikaarei. Aris Yosepu apaki ŋin keberar Ijipit.

⁶Ekaku, abu Yosepu totwana, ido apotu ŋikaitotoi keŋ daŋ daadaŋ totwaka ka abu anyamet ŋin daadaŋ kirikar.

⁷Nai apitaka Ŋisirael, ido apotu topitut nooi, toruworos ŋituŋa ŋulu alalak, kilelebunos nakwap a Ijipit.

⁸Ekaku, min lokicoloŋ erwosit ece ŋolo abu kipuka Ijipit. Pa ayeni ekepukan ŋol Yosepu.

⁹Tema erwosit ŋol neni a ŋituŋa keŋ, “Kiirasi mono iyes ŋakiro nu, ‘Alalata tokona Ŋisirael nooi a ne, ido egogoŋ akilo iwon.’

¹⁰Etiyata ka aosou ŋadi ŋuna aronok neni kec, ikotere ikes nyepitut nooi, ido ani kejikinoi iwon ka ŋimoe yok, eriyete ikes ka ŋimoe yok ikitijioto iwon, ido tosiwa anakwap yok.”

¹¹Aŋun, apotu ikes toseut ŋikapolok ŋulu epolokinete ŋipi alotic a ŋolo ereikinio ŋipi kitiyata. Kituduko ŋikapolok ŋul Ŋisirael ŋitaunio ŋiarei Pisom ka Ramases ŋulu ewuanakini Parao [1] ŋamuja ŋuna ka akwap keŋ.

¹²Nai tari daŋ ŋina esicanitere Ŋisirael, apotu topitut nooi kielakin nakwap a Ijipit, ido apotu Ŋijipitian tokuryaketa nooi aŋuna a Ŋisirael.

¹³Apotu ŋun inakis Ŋijipitian aryenyaanikin Ŋisirael nooi kitiŋanakis etic.

¹⁴Kitakadakis Ŋijipitian Ŋisirael nooi aŋuna aponiata kitiŋakis ikes etic ŋolo agogoŋon nooi; ikwapei amuna ecoto ka akiram ŋamatapali ta ŋiticisyo ŋice ŋulu a ŋimanikorin. Aryanyaaka Ŋijipitian nooi isitiyaete Ŋisirael ŋiticisyo ŋuluce daadaŋ.

¹⁵Tema erwosit a Ijipit neni Sipira ka Pua Ŋaburaniyae ŋuna esidoete ŋaberu,

¹⁶“Ani isidounete iyes ŋaberu ŋuna erae Ŋaburaniyae ka kiŋolikis esaa ŋolopei idounio iŋes atemar erae ikoku isapat, emaikina toarae, nai ani kerae ipese, emaikina kimyekis toyar.”

¹⁷Nai akerito ŋaberu ŋun Akuj, ido apotu nyitiyata ŋuna abala erwosit a Ijipit ikes kitiyata; apotu kimyekis ŋidwe ŋulusapa toyara.

¹⁸Abu nai erwosit ŋol tonyarau ŋaberu ŋun kiŋit ikes tema, “Kaanukiro itiyaata iyes ŋakiro nu? Kaanukiro imyekiniata iyes ŋidwe ŋulusapa toyara?”

¹⁹Toboŋokis ŋakesidook ŋun Parao temasi, “Nyikwaan Ŋaburaniyae ka Ŋajipitian, egogoŋ Ŋaburaniyae, idounete make eriŋa akesidoon nyedolo neni kec.”

²⁰Aŋun, abu Akuj torimaanik ŋakesidook ŋun; ido apotu ŋituŋa kec Ŋiburaniyae topitut tolalaketa nooi.

²¹Aŋuna nai aponiata ŋakesidook ŋun tokeryata Akuj, abu Akuj inak ikes ŋidwe kec a ŋakulepek.

²²Abu nai Parao kicik ŋituŋa keŋ daadaŋ tema, “Ikoku ŋinisapat daadaŋ ŋini euruunito Ŋiburaniyae, emaikina iyes kimasakis naŋolol Nile, nai kimyekisi ŋulupesur toyara.”