Read ngakarimojong Awos. 10 Bible Online

Awos. 10 - ngakarimojong bible

Awos. 10

¹Tema nai Ekapolon neni a Moses, “Ape neni a Parao; anerae etogogoŋ ayoŋ akou keŋ ka ŋuna a ŋulu ipukatotor iŋes, ikotere ayoŋ etiyae ŋakujuwuanisya kaŋ neni kec

²ka emaikina nai iyes kitatamyanakis ŋidwe kus ka ŋipapae kus epite ŋolo abunio ayoŋ esicania Ŋijipitian aryenyaana ka ŋolo abunio ayoŋ etiyaa ŋakujuwuanisya kaŋ neni kec, ido iyenunete iyes atemar arae ayoŋ Ekapolon.”

³Aŋun, apotu Moses ka Aron toloto neni a Parao temasi neni keŋ, “Ŋakiro ŋuna iŋita Ekapolon Akuj a Ŋiburaniyae ikes nu: Tari ori iwounit iyoŋ akitiditeun aneni kaŋ? Kimyek ŋituŋa kaŋ toloto, ikotere ilipete neni kaŋ.

⁴Ani erae pa kimyek iyoŋ ŋituŋa kaŋ toloto, eyakuuni ayoŋ moi taparacu emaase nakwap kon.

⁵Eburusiyari emaase akwap kon, mam ituŋanan iŋolikini neni emam emaase alokwap. Irikari emaase ŋapiya ŋuna apotu ŋakako kimyekis, irikari ŋikito daadaŋ ŋulu eya nariet anakwap kon.

⁶Ilelebun nakais kon ka nakais a ŋulu ipukatotor iyoŋ ta ŋuna a Ŋijipitian a daadaŋ. Ŋakiro ŋun ikes ŋuna nyiŋolikina atapapa kon, kori atapapaa kon akisyakin akoloŋit ŋina keponiata ikes nakwap tari nakoloŋit na.” Torotok nai Moses aneni a Parao kimyek iŋes.

⁷Kiŋita ŋulu epukatotor Parao iŋes temasi, “Tari ori erubakinit ekile lo ikiteryamunit iwon ŋican? Emyekisi ŋituŋa toloto, ikotere ilipete neni ke Ekapolon Akuj kec. Eriŋa mono iyoŋ nyiŋolikina atemar enyasun Ijipit a?”

⁸Aŋun, aponi kinyakunae Moses ka Aron neni a Parao, tema Parao neni kec, “Apesi, kilipa neni ke Ekapolon Akuj kus. Nai ata ŋae mono emaikina toloto?”

⁹Toboŋok Moses tema, “Elosyo isua ka ŋidwe kosi tari ka ŋulu cicik, ŋikasikou ka ŋakimak kosi, ŋidwe kosi ŋulusapa ka ŋulupesur, ŋamesekin kosi ka ŋaatuk kosi, anerae emaikina isua kitiyae ŋasuban ŋuna itopolooritere isua Ekapolon.”

¹⁰Tema Parao neni kec, “Ekoŋi ayoŋ alokiro a Ekapolon atemar nyekemyekini ayoŋ iyes toloto ka ŋidwe kus ŋulu cicik; anerae ileere kire jik atemar iyakatar iyes ŋakiro ŋuna aronok natameta kus.

¹¹Nyepedor ŋun! Kimyekisi ŋikilyok bon toloto kilipa neni ke Ekapolon, anerae ŋuna iŋitasi iyes ikes ŋun.” Aponi nai kiritarae Moses ka Aron kiŋa alokiŋaren Parao.

¹²Tema nai Ekapolon neni a Moses, “Kikyaa akan kon kidiama nakwap a Ijipit, ikotere ebuni emaase nakwap a Ijipit kirika ibore daadaŋ ŋini elomunit anakwap a ŋin, ibore daadaŋ ŋini apotu ŋakako kimyekis.”

¹³Aŋun, abu Moses kikyaa ebela keŋ kidiama nakwap a Ijipit, ido abu Ekapolon kitukut ekuwuam alowae a ŋolo alo Kide, tokutak akwap ŋin apaaran daadaŋ ka akuwar daadaŋ. Ani ŋisaae ŋulu ewalarya, todolunio ekuwuam emaase.

¹⁴Bu emaase nakwap a Ijipit daadaŋ, torubak eyai nen lotela ŋulu ka akwap a ŋin daadaŋ elal nooi isijisija. Nyetakanuna sek ekiŋaren emaase ŋolo etya ŋol nakwap ŋin, mam daŋ nyetakanuni nabo jik.

¹⁵Abu emaase ŋol toburusiya akwap ŋin daadaŋ, kiryoniar akwap cuc; kirika emaase ibore ŋini alomunit anakwap a Ijipit daadaŋ kaapei ka ŋaraito daadaŋ ŋuna sek kepotu ŋakako kimyekis. Mam ibore abu kidoŋ elib alokito, kori anibore a ŋini alomunit anakwap a Ijipit a daadaŋ.

¹⁶Tonyarau Parao Moses ka Aron atipei tema, “Asec ayoŋ aneni ke Ekapolon Akuj kus ka aneni kus.

¹⁷Kisyoni ayoŋ anasecit kaŋ anapei ca a na bon, kilipa neni ke Ekapolon Akuj kus tolema akisicanet ŋina aaran na aneni kaŋ.”

¹⁸Torotok nai Moses aneni a Parao, kilip neni ke Ekapolon.

¹⁹Abu nai Ekapolon kitukuta ekuwuam lowae ŋolo alo To ekusi nooi, ido abu ekuwuam kiwok emaase, tokuta Nanam ŋina Areŋan. Mam epei daŋ abu kidoŋ iwadio anakwap a Ijipit.

²⁰Nai abu Ekapolon kitogogoŋ akou a Parao, nyecamak Ŋisirael toloto.

²¹Tema nai Ekapolon neni a Moses, “Kikyaa akan kon kidiama, ikotere toburusiya akwap a Ijipit akiryonut ŋina epedori ainakin ŋituŋa ekabule.”

²²Aŋun, abu Moses kikyaa akan keŋ kidiama, ido abu akiryonut ŋina eryonon cuc, toburusiya akwap a Ijipit daadaŋ todolo ŋirwa ŋiuni iryono cuc.

²³Mam ituŋanan apedori akiŋolikin ŋinice, kori mam ŋini abu torotok iwace anakibois keŋ alotooma ŋirwa ŋul ŋiuni. Nai ayai akica nakiboisyo daadaŋ ŋuna aya Ŋisirael.

²⁴Tonyarau nai Parao Moses tema, “Apesi, kilipa neni ke Ekapolon. Torukosi tari ka ŋaberu kus ka ŋidwe kus, nai idoŋete ŋamesekin ka ŋaatuk kus ne.”

²⁵Tema Moses neni keŋ, “Itemokino iyoŋ ikimyek isua yaarae ŋamuronisya ka ŋainakineta ŋuna epeyo, inakinae neni ke Ekapolon Akuj kosi erae amuronot.

²⁶Emaikina isua yaarae ŋibaren kosi, nyidoŋ tari ipei daŋ ne, anerae emaikina isua toseunae alobaren a ŋul ŋulu erae ŋikilipet neni ke Ekapolon Akuj kosi. Nyikiyeni isua ibore ŋini emaikina kilipere neni ke Ekapolon akitodol ŋina edolere isua neni elosyo.”

²⁷Nai abu Ekapolon kitogogoŋ akou a Parao, nyecamak Ŋisirael toloto.

²⁸Kiŋenyak Parao Moses tema, “Torotok alokiŋaren kaŋ! Nyiboŋu nabo jik neni kaŋ! Itwani iyoŋ erae kibu aanyun ayoŋ.”

²⁹Tema Moses, “Ikokinete nenipei ilimunio iyoŋ! Nyabuni nabo ayoŋ aanyun iyoŋ.”