Read ngakarimojong Awos. 16 Bible Online

Awos. 16 - ngakarimojong bible

Awos. 16

¹Towotokis Ŋisirael daadaŋ alo Elim; todolut naloŋisat ŋina enyaritae Sin, ŋina eyai kidiŋ Elim ka Sinai. Adolunete ikes nen ŋirwa ke elap ŋitomon ka ŋikan, elap ŋolo a ŋiarei kedaut alomun alo Ijipit.

²Kiŋuruŋura Ŋisirael daadaŋ neni a Moses ka Aron analoŋisat,

³temasi neni kec, “Kerae bo paaran ikiarite isua Ekapolon anakwap a Ijipit daŋ! Ikiboi isua a nen ikinyami akiriŋ ka akimuj ca daadaŋ ŋina ikicamit, nai ikiyaut iyes isua naloŋisat na akitaar akoro ŋituŋa lu daadaŋ totwaka.”

⁴Tema nai Ekapolon neni a Moses, “Etodoiuni tokona ayoŋ akimuj anakuj aŋuna kus, emaikina ŋituŋa toloto a ŋinakoloŋit kiriraut akimuj ŋina itemokino akoloŋit ŋin. Alopite a ŋol, ekatakini ayoŋ ikes, kiwuapete ŋuna alimok ayoŋ ikes, kori mam.

⁵Ani edoli ŋirwa ŋikanikapei, emaikina ikes tocunut akimuj ŋina elal nooi adepar ŋina sek ecunete ikes alotooma akoloŋit apei.”

⁶Aŋun, apotu Moses ka Aron temasi neni a Ŋisirael a daadaŋ, “Takae eboŋ, iyenunete iyes atemar erae Ekapolon abu ikiyau iyes alo Ijipit,

⁷iŋolikinete iyes moi taparacu ebari ŋolo ke Ekapolon, anerae eira iŋes akiŋuruŋura kus neni keŋ. Ata ŋae mono isua, iŋuruŋurasi iyes neni kosi?”

⁸Tema daŋ Moses, “Iyenunete iyes atemar erae neni ke Ekapolon iŋuruŋurasi iyes. Iyenunete iyes ŋun apaki ŋina ikiinakinia iŋes iyes akiriŋ tonyama eboŋ ka ŋamugati tonyama taparacu, anerae eira iŋes akiŋuruŋura kus neni keŋ. Ata ŋae mono isua? Meere neni kosi iŋuruŋurasi iyes, nai erae neni ke Ekapolon.”

⁹Tema nai Moses neni ka Aron, “Tolimok Ŋisirael daadaŋ ebe, ‘Potu neni ke Ekapolon, anerae eiira iŋes akiŋuruŋura kus.’ ”

¹⁰Ani eriŋa Aron isirwori Ŋisirael daadaŋ, kiŋoliyasi ikes lowae ŋolo ka aloŋisat, kileereu Ekapolon anakica a ŋina ayai lodou.

¹¹Kirworik Ekapolon neni a Moses tema,

¹²“Adau ayoŋ akiirar akiŋuruŋura a Ŋisirael, tolimok ikes ebe, ‘Ani eboŋ, inyamete iyes akiriŋ, ido ani taparacu, inyamete iyes akimuj ŋina iitanito; nen nai iyenuniata iyes atemar arae ayoŋ Ekapolon Akuj kus.’ ”

¹³Ani edoli ataboŋ ŋin, potu ŋalurui toburusiyasi neni alomito Ŋisirael, ido ani taparacu kiŋolikis ikes ŋakopi ibwaliyarito diyete neni alomito ikes.

¹⁴Ani edaun ŋakopi, kiŋolikis ikes ibore ŋinibenen ŋini anonokan epetakina naloŋisat.

¹⁵Ani iŋolikinete Ŋisirael ibore ŋin, kiŋitanaros make temasi, “Nyo ibore ŋin?” Anerae pa ayenete ikes atemar kerae nyo. Tema Moses neni kec, “Erae akimuj ŋina ikiinak iyes Ekapolon atemar tonyama.

¹⁶Adau Ekapolon akicik iyes ebe, ‘Emaikina ŋinituŋanan kirirau etyae ŋolo iitanit iŋes ilope. Tolemutu ŋakiloi ŋuna eapiyarito ŋaarei a ŋinituŋanan alotooma ŋolokal.’ ”

¹⁷Apotu Ŋisirael kitiyata ŋun, kiriraut ŋice akimuj ŋina alalan, ŋice ŋina adit.

¹⁸Nai ani ipimete ikes akimuj ŋin, toryamu ituŋanan ŋini kebu kirirau ŋina alalan, pa eyakar ŋina alalan nooi ka ŋini kebu kirirau ŋina edit, pa eyakar ŋina edit nooi; kebu ŋinituŋanan kirirau etyae ŋolo kiitanit iŋes.

¹⁹Tema nai Moses neni kec, “Mam ituŋanan emaikina kiŋadak akimuj ŋin akitodol moi taparacu.”

²⁰Nai apotu Ŋisirael ŋice nyemitakis ŋakiro ŋun, kepotu kiŋadakis akimuj ŋin ace kiwalak, ido kepotu ŋikur pena, tobosu tul. Toŋo Moses nooi neni a ŋituŋa a ŋul.

²¹Torubakis Ŋisirael iriraete akimuj ŋin a ŋinataparacu lotyae ŋolo eiitanit ŋinituŋanan; nai ani ŋina emwanunia akoloŋ, atalanari ibore ŋin toŋopiya aneni eriraere.

²²Ani edolete ŋirwa ŋikanikapei, kirirautu ikes akimuj ŋina adeparit ŋina sek eriraununeete ikes, ŋina arae ŋakiloi ŋaomwon aŋuna a ŋinituŋanan alokal. Ani epote ŋikarikok a Ŋisirael daadaŋ neni a Moses alimokin iŋes ŋakiro ŋun,

²³tema Moses neni kec, “Ŋakiro nu ikes ikicik iyes Ekapolon ebe, ‘Erae moi taparacu akoloŋit ŋina nyemaikina idiotuŋanan kitiya ediotic, erae akoloŋit ŋina asegan ŋina ke Ekapolon, ŋina enyaritae Sabato. Kipoto ŋamugati ka ŋinibore daadaŋ icamito iyes akipore. Akimuj daadaŋ ŋina ipoete, ido nyimuji, emaikina iyes kiŋadaasi akitodol moi taparacu.’ ”

²⁴Aŋun, apotu ŋituŋa kiŋadaasi akimuj ŋina edoŋit nyimuja akitodol taparacu lopite ŋolo ecikitor Moses ikes. Abu akimuj ŋin nyebos ka mam ŋikur apotu pena nakimuj ŋin.

²⁵Tema Moses neni a Ŋisirael, “Kimuja akoloŋit na akimuj ŋina iyakatar iyes, anerae erae akoloŋit na ŋina ke Ekapolon ŋina enyaritae Sabato. Mam akimuj ace iryamunete iyes kiriraut anariet nakoloŋit na.

²⁶Emaikina iyes kiriraut ŋina ikitemokino alotooma ŋirwa ŋikanikapei, nai ani akoloŋit ŋina a ŋakanikaarei, ŋina enyaritae Sabato, mam akimuj eyakaun nariet.”

²⁷Ani edoli akoloŋit ŋin ŋina a ŋakanikaarei, kepotu Ŋisirael ŋice toloto nariet akirira akimuj, nai mam ŋina apotu ikes toryamut.

²⁸Kiŋit Ekapolon Moses tema, “Tari wori iwounito iyes akiwuap ŋakiciketa kaŋ ka ŋakitatameta kaŋ?

²⁹Toyenutu nu atemar, adau Ekapolon ainakin iyes akoloŋit ŋina a Sabato akieŋunia. Ŋakiro ŋun nai abunio iŋes ikiinak iyes akimuj ŋina a ŋirwa a ŋiarei akoloŋit ŋina a ŋakanikapei. Emaikina ŋinituŋanan kieŋu akoloŋit ŋina a ŋakanikaarei aneni iboiyo, mam ituŋanan emaikina toloma kiŋa.”

³⁰Aŋun, apotu ŋituŋa kieŋut akoloŋit ŋina a ŋakanikaarei.

³¹Tolimokis Ŋisirael ekiro ka akimuj a ŋin Manna. Akwaŋ akimuj ŋin ekoni ŋicok a emucele ka abob nooi ekoni ŋamugati ŋuna itiyaunitae a akimyet a ŋina ka ao.

³²Tema Moses neni kec, “Ŋakiro nu ikes ikicik iyes Ekapolon ebe, ‘Kipimutu ŋakiloi ŋaarei ŋuna a Manna, kirica aŋuna a ŋanyameta a daadaŋ a ŋuna epote, ikotere ikes iŋolikinete akimuj ŋina abu ayoŋ okoinak iyes kimuja analoŋisat apaki ŋina akayaunia ayoŋ iyes alo Ijipit.’ ”

³³Tema Moses neni ka Aron, “Tolemu amot kiwuak ŋakiloi ŋaarei ŋuna a Manna tooma. Tosipok amot ŋin kiŋaren Asaduku ŋina ka Acamunet, kidarae kiŋolikis ŋanyameta ŋuna eponito.”

³⁴Abu nai Aron kitiya lopite ŋolopei alimokinitor Moses iŋes, tosipok amot ŋina ayai Manna kiŋaren Asaduku ŋina a Acamunet, ikotere kidarae a nen.

³⁵Kimuja Ŋisirael Manna ŋikaru ŋatomoniomwon, akitodol ŋina adolunioto nakwap ŋina apotu kiboikinos. Apotu ikes kimuja Manna akitodol ŋina adolunito lokukoru ŋolo ka akwap a Kanaan.

³⁶(Eriyan akipimet ŋina esitiyaete ikes ŋin ka ŋakiloi ŋaarei.)