Read ngakarimojong Awos. 18 Bible Online

Awos. 18 - ngakarimojong bible

Awos. 18

¹Kebu Yesiro esacaradoti a Midian ŋolo arae lokamuran a Moses, kiira ŋakiro daadaŋ ŋuna kebu Akuj kitiya aŋuna a ŋituŋa keŋ a Ŋisirael ka aŋuna a Moses ka epite ŋolo keyaunia Ekapolon Ŋisirael alo Ijipit.

²Aŋun, abu Yesiro lokamuran a Moses kilaar neni a Moses erukito ka nakoku keŋ Sipora aberu a Moses ŋina sek kebu Moses kirita.

³Yau iŋes Sipora ka ŋidwe keŋ ŋulusapa ŋiarei. Arae ekiro ke epei Gerisom (alimokini Moses iŋes ekiro ŋol, anerae abu tema, “Abu ayoŋ oruwor egelaanot anakwap a ŋinagela”),

⁴ido arae ekiro a ŋoloce Elieser (alimokini Moses iŋes ekiro ŋol, anerae abu tema, “Akuj a papa kaŋ iŋes abu ekeŋarak ka okoiu ayoŋ nyakaar Parao a ekileŋ”).

⁵Bu Yesiro lokamuran a Moses naloŋisat erukito ka ŋidwe a Moses ŋulusapa ŋul ka aberu a Moses. Potu ikes neni alomit Moses diyete emukura ŋolo ka Akuj.

⁶Kiyakiya Yesiro ituŋanan neni a Moses alimokin iŋes ebe, “Abu ayoŋ Yesiro lokamuran kon neni kon, ikirukunit ka aberu kon ta ŋidwe keŋ ŋulusapa ŋuluarei.”

⁷Toloma Moses kiŋa tolot akisiryam lokamuran keŋ; toryedik iŋes tonu lokamuran keŋ; kiŋitiŋitas ikes make ebe, “Anu ŋace?” Ani ekaku, toloto tooma Eema.

⁸Kitatamik nai Moses lokamuran keŋ ŋakiro daadaŋ ŋuna etiya Ekapolon neni a Parao ka neni a Ŋijipitian aŋuna a Ŋisirael. Kitatamik tari ŋatyokisyo ŋuna kepotu Ŋisirael toryamut alorot ka epite ŋolo abunio Ekapolon toiunia ikes anatyokisyo a ŋun.

⁹Tolelyan Yesiro a ŋakiro a ŋun a daadaŋ a ŋuna kebu Ekapolon kitiya neni a Ŋisirael, aŋuna aiunia Ŋisirael aneni a Ŋijipitian.

¹⁰Tema Yesiro, “Kipuroe Ekapolon ŋolo abu itoiu iyes aneni a Ŋijipitian ka aneni a Parao.

¹¹Ayenu tokona ayoŋ atemar epol Ekapolon nooi akilo ŋakujo ŋunace, anerae abu toiu Ŋisirael aneni a Ŋijipitian apaki ŋina atiŋitere Ŋisirael erono nooi.”

¹²Tolemik nai Yesiro Akuj ainakinet ŋina apeyo ka ŋamuronisya ŋace. Potu nai Aron ka ŋikasikou a Ŋisirael daadaŋ akimuj ka Yesiro ŋamugati, ayai Akuj kaapei ka ikes a nen

¹³Akoloŋit ŋina atupakini ŋin, abu Moses kiboikin lokicoloŋ akitub ŋakiro a Ŋisirael; towua Ŋisirael alodiyete keŋ kirimokis iŋes kidiŋ ŋinapei taparacu tari eboŋ.

¹⁴Ani iŋolikini lokamuran a Moses etic daadaŋ ŋolo etiyae Moses aŋuna a Ŋisirael, tema, “Anukiro nu ŋuna itiyae iyoŋ aŋuna Ŋisirael nu? Kaanukiro eraakar iyoŋ bon iboi towuas ŋituŋa ŋuluce ikirimokinito iyoŋ kidiŋ ŋinapei taparacu tari eboŋ?”

¹⁵Toboŋok Moses lokamuran keŋ tema, “Etiyae ayoŋ nu, anerae eponito jik ŋituŋa neni kaŋ akiŋita ŋuna ecamit Akuj.

¹⁶Apaki daadaŋ ŋina eyakatar ikes ebura, eponeneete ikes neni kaŋ otub ayoŋ ŋakiro a ŋulu iburaete, ido olimok ikes ŋikisila ka ŋakiciketa ŋuna ka Akuj.”

¹⁷Tema lokamuran a Moses neni a Moses, “Nyejokak ŋakiro ŋuna itiyae iyoŋ.

¹⁸Kire jik, ipedori iyoŋ akiteŋedar etic, iyoŋ kaapei ka ŋituŋa lu ŋulu irukitotor iyoŋ, anerae elal etic lo nooi; nyipedori iyoŋ bon akitiya.

¹⁹Kiira ŋakiro nu ŋuna tokona akalimokini ayoŋ iyoŋ, ido elipi ayoŋ Akuj torukito ka iyoŋ. Emaikina iyoŋ towoik ŋituŋa iya ŋiburasyo kec neni ka Akuj.

²⁰Kitatam ikes ŋikisila ka ŋakiciketa ŋuna ka Akuj, kimyek ikes toyenut epite ŋolo emaikina ikes kiboiyoto ka ŋuna emaikina ikes kitiyata.

²¹Nai toseu alokidiŋ kec ŋikilyok ŋulu epedorete akitiya, ŋulu itopoloorito Akuj, ŋikilyok ŋulu ikinyoma ŋulu nyecamito akitiya ŋuna aronok. Toseu ikes toruwor ŋikapolok a ŋituŋa a ŋulu erae ŋalipulipui, ŋamiamiae, ŋatomonikanikani ka ŋitomotomoe.

²²Kimyek ŋikapolok ŋul totubo ŋakiro a ŋituŋa ŋapakio daadaŋ, nai emaikina ikes yaut neni kon ŋiburasinei daadaŋ ŋulu atyonikis ikes; emaikina ikes totubo ŋiburasinei ŋulu epataka daadaŋ. Ikiinakini iyoŋ nen akitiya etic ŋolo edit, anerae iŋarakinosi iyoŋ ka ikes etic.

²³Ani kitiya iyoŋ ŋakiro ŋun, lopite ŋolo ikicikitor Akuj, ipedori nai akidaŋidaŋ ŋakiro kec, ido elosete ŋituŋa lu daadaŋ lorerya kec isilito.”

²⁴Abu Moses kiira ŋakiro alokamuran keŋ, ido abu kitiya daadaŋ ŋuna alimokini Yesiro iŋes.

²⁵Toseu iŋes ŋikilyok ŋulu epedorete akitiya alo Isirael a daadaŋ, kituruwo ikes ŋikapolokinitok ŋituŋa ŋalipulipui, ŋamiamiae, ŋatomonikanikani ka ŋitomotomoe.

²⁶Apotu ŋikilyok ŋul kitiyata ikwapei ŋikatubok ŋakiro a ŋituŋa ŋapakio daadaŋ. Yaanasi ikes ŋiburasinei ŋulu atyonok neni a Moses, nai ŋulu apatanak daadaŋ apotu ikes totubo.

²⁷Abu nai Moses kimyek lokamuran keŋ torotok aneni keŋ toboŋo Midian nakwap keŋ.