Read ngakarimojong Awos. 24 Bible Online

Awos. 24 - ngakarimojong bible

Awos. 24

¹Tema nai Akuj neni a Moses, “Kitipeutu lomoru neni ke Ekapolon iyoŋ ka Aron, Nadab ka Abiu ta ŋikasikou a Ŋisirael ŋatomonikanikaarei. Emaikina iyes kilipa neni kaŋ ilwaka;

²nai Moses bon emaikina toapu neni ke Ekapolon; nyemaikina ŋuluce toapuut nen. Nyemaikina ŋituŋa kitipeut ka Moses ne.”

³Totiyaun nai Moses alomoru, tolot tolimok ŋituŋa ŋakiro ke Ekapolon daadaŋ ka ŋikisila ke Ekapolon daadaŋ; toboŋokis ŋituŋa daadaŋ kaapei temasi, “Ikitiyae isua ŋakiro daadaŋ ŋuna adau Ekapolon alimun.”

⁴Kigir nai Moses ŋakiro ke Ekapolon daadaŋ. Tonyou Moses ataparacu ŋinace, todukok Namuroet nakeju ke emoru, tosipok nen ŋamoru ŋatomon ka ŋaarei, ekimar ŋolo a ŋikabilae a Ŋisirael a ŋulutomon ka ŋiarei.

⁵Ani kedau ŋun, abu kiyakiya ŋisorok a Ŋisirael, toloto ŋul inakis Ekapolon ŋainakineta ŋuna epeyo ka ŋamuronisya ŋuna a ŋimoŋin a ŋulu apolounok ikwapei ŋainakineta ŋuna ka akimorikina ke Ekapolon.

⁶Tolemu Moses ŋaokot a ŋibaren a ŋul, totyak eriyan, kiwuak atutubet apei nabakulei, tosodi atutubet ŋinace towuasya Namuroet.

⁷Tolemu nai Ekitaabo ŋolo ka Acamunet tosyomak ŋituŋa. Toboŋokis ŋituŋa temasi, “Ikitiyae isua ŋakiro daadaŋ ŋuna adau Ekapolon alimun; ikiwuapi isua ŋakiro ŋuna ke Ekapolon.”

⁸Tolemu nai Moses ŋaokot ŋuna aya nabakulei towuasya ŋituŋa tema, “Erae ŋaokot nu ŋuna ka Acamunet a ŋina abunio Ekapolon tocamunotor ka iyes anakiro a nu a daadaŋ.”

⁹Toloto nai Moses ka Aron, Nadab ka Abiu ta ŋikasikou a Ŋisirael ŋatomonikanikaarei kidiama emoru.

¹⁰Kiŋolikis a nen Akuj a Ŋisirael. Kwap ŋakejen keŋ, ayai ibore ŋini enaminamakina neni pus ŋini ekwaan ka amoru ŋina enyaritae Sapire. Eleere nen epusiyana ikoni kidiama eliilii.

¹¹Nai abu Akuj nyisican ŋikarikok a Ŋisirael ŋul; apotu ikes kiŋolikis Akuj, apotu daŋ kimuja ka tomata.

¹²Tema Ekapolon neni a Moses, “Bua neni kaŋ ne kidiama emoru, kidareu a ne; okoinak iyoŋ ŋamoru ŋuna edapal ŋuna eyakasi ŋikisila ka Ŋakiciketa. Egirit ayoŋ ŋikisila ka Ŋakiciketa nen aŋuna ka akitatamya ŋituŋa.”

¹³Aŋun, apotu Moses ka Yosua ŋolo atupit iŋes anapolou todokasi lomoru ŋolo ka Akuj.

¹⁴Tema Moses neni a ŋikasikou, “Kidareunoe isua a ne akitodol ŋina eboŋunere neni kus. Ikidarete iyes Aron ka Ur, ituŋanan daadaŋ ŋini eŋoikin ka ŋinice, emaikina tolot neni kec.”

¹⁵Torotok nai Moses a nen todoka lomoru, toburusiya edou emoru.

¹⁶Min apolou ŋina ka Akuj toburusiya emoru Sinai. Toburusiya edou emoru ŋirwa ŋikanikapei, ani epete ŋirwa ŋikanikaarei, tonyara alotooma edou Ekapolon Moses.

¹⁷Totakanu apolou ka Akuj neni a Ŋisirael ikoni akim ŋina erirae enomi kidiama emoru.

¹⁸Toloma nai Moses tooma lodou apaki ŋina adokarya kidiama emoru. Kiboi Moses alomoru ŋapaarasya ŋatomoniomwon ka ŋakuwarisya ŋatomoniomwon.