Read ngakarimojong Awos. 31 Bible Online

Awos. 31 - ngakarimojong bible

Awos. 31

¹Tema nai Ekapolon neni a Moses,

²“Kiira, adau ayoŋ aseun Besalel lokoku a Uri, lopapaait a Ur a ŋolo alokabila a Yuda.

³Adau ayoŋ akilelebikin etau ŋolo ka Akuj neni keŋ, kaapei ka apiiryanut, apedor ka aosou ŋina epedorya iŋes akitiyaunia ŋinibore,

⁴aramun ejok etorube a ŋinibore, akitiyaun ejok ŋinibore a egolid, a esilipa ka a eburonis,

⁵akibet ŋamoru ŋunakirikakinet ŋaduketa, epite ŋolokiciet ŋakito ka ŋolokitiyaet ejok etic ece daadaŋ a ŋakan.

⁶Adau daŋ ayoŋ aseun Oliab lokoku ka Aisamak, ŋolo alokabila a Dan kiŋarak iŋes. Adau ayoŋ tari ainakin apiiryanut neni a ŋipiiryanotin kitiyaut ŋiboro daadaŋ ŋulu ekecik ayoŋ iyoŋ akitiyaun lu:

⁷Eema ŋolokilipet, Asaduku ŋina ka Acamunet, akibois ŋina ka akisyonio ka ŋiboro ŋuluce daadaŋ ŋulu emaikina eya tooma Eema;

⁸ikwapei: Emesa ka ŋiboro keŋ daadaŋ, awoet ŋina ke etaa ka ŋiboro keŋ daadaŋ, Namuroet ŋina icunyere ekinyate,

⁹Namuroet ŋina epeyere ŋainakineta kaapei ka ŋiboro keŋ daadaŋ, abesen ka awoet keŋ,

¹⁰ŋilowi ŋulu itiyatae ejok, ŋilowi ŋulu ke etal ŋulu ka Aron a esacaradoti ka ŋulu a ŋidwe keŋ a ŋulusapa, ŋilowi ŋulu itiyaata ikes ikwapei ŋisacaradotin,

¹¹akimyet ŋina ke etal, ekinyate ŋolo akukunyon ŋolo ka akibois a ŋina asegan. Itiyaunete ikes ŋiboro ŋul lopite ŋolo ekecikitor ayoŋ iyoŋ.”

¹²Tema Ekapolon neni a Moses,

¹³“Kirwor iyoŋ elope neni a Ŋisirael tema, ‘Emaikina iyes totamunito akoloŋit ŋina a Sabato, anerae erae Sabato akoloŋit ŋina itoodiunit acamuna kaŋ ka iyes ananyameta kus a daadaŋ, akoloŋit ŋina abu ayoŋ okoinak iyes, ikotere iyenunete atemar ayoŋ Ekapolon abu eketuruwo iyes ŋituŋa kaŋ ke elope.

¹⁴Totamunito akoloŋit ŋina a Sabato, anerae erae akoloŋit ŋina italeunitoe aŋuna kus. Aŋun, ituŋanan daadaŋ ŋini nyetamunit akoloŋit ŋin, emaikina toarae. Ituŋanan daadaŋ ŋini itiyae etic akoloŋit ŋin, emaikina totyakarae alotuŋa keŋ.

¹⁵Kitiyata ŋiticisyo kus alotooma ŋirwa ŋikanikapei bon, nai akoloŋit ŋina a ŋakanikaarei, erae ŋina a Sabato, ŋina italetoe aŋuna ka akieŋunia akoloŋit ŋina italetoe aŋuna ke Ekapolon. Ituŋanan daadaŋ ŋini itiyae etic edio akoloŋit ŋina a Sabato, emaikina toarae.

¹⁶Aŋun, emaikina Ŋisirael totamunito akoloŋit ŋina a Sabato ananyameta kec a daadaŋ ikwapei Acamunet kaŋ ka ikes ŋina erae etal ŋolo a ŋikaru ka ŋikaru.

¹⁷Erae akoloŋit ŋin ŋina itoodikinit Ŋisirael kaapei ka ayoŋ atemar, abu Ekapolon tosub nakuj ka akwap, ido abu kieŋu akoloŋit ŋina a ŋakanikaarei nyitiya etic edio.’ ”

¹⁸Ani kedau Ekapolon akisirwor Moses alokidiama emoru Sinai, abu Ekapolon inak Moses ŋamoru ŋunadapal ŋaarei ŋuna ka Acamunet, ŋuna egirit Akuj ŋakiro ke ekimoin keŋ.