Read ngakarimojong Awos. 32 Bible Online

Awos. 32 - ngakarimojong bible

Awos. 32

¹Ani eyenunete ŋituŋa atemar adidi Moses aboŋun alokidiama emoru, apotu tocunakinos kirimokis Aron kidiŋ temasi neni keŋ, “Bua, kitiyakinae isua ŋakujo ŋuna ikirikete isua, anerae nyikiyeni isua ŋakiro ŋuna kitiyakin neni a Moses a ŋolo abu ikitipeunio isua anakwap a Ijipit.”

²Tema Aron neni kec, “Tolemutu ŋiboro daadaŋ, ŋulu itiyaunitae ke egolid, ŋulu enapito ŋaberu kus, ŋidwe kus ŋulusapa ka ŋulupesur anaki, iyaut neni kaŋ.”

³Aŋun, apotu ŋituŋa daadaŋ tocunut ŋiboro ŋulu etiyaunitae ke egolid ŋulu anapito anaki, yaut neni ka Aron.

⁴Kijaa Aron ŋiboro ŋul aneni kec, totala, ido tobukok egolid ŋol neni ecietae esibit itaok, kitiyau etorube a itaok, temasi nai ŋituŋa “Ŋisirael, akuj yok na ŋina paaran abu ikitipeunio iwon anakwap a Ijipit!”

⁵Ani iŋolikini Aron ŋakiro ŋun, abu todukok Namuroet kiŋaren itaok ŋin, ido tolimok ŋituŋa ebe, “Emaikina iwon moi taparacu etiyata ŋasuban neni ke Ekapolon.”

⁶Aŋun, apotu ŋituŋa tonyout taparacu sek akoloŋit ŋina atupakini ŋin, yaut ŋainakineta kec ŋuna apeyo ka ŋamuronisya ŋuna ke ekisil. Kiboikinos ŋituŋa nen kimuja ka tomata, ido tonyout tobolyata.

⁷Tema nai Ekapolon neni a Moses, “Kionyak atipei totiyaar kwap! Adaut ŋituŋa kon ŋulu ibu iyoŋ kitipeunio anakwap a Ijipit akisec ka akiŋer ayoŋ.

⁸Emyekis ikes atipei ŋuna abu ayoŋ ecik ikes, ido etiyaut aŋuna kec etorube a itaok aruwor akuj kec. Ilipete tokona ikes neni a itaok ka aya ŋamuronisya kec nen, ido ebasi, ‘Ŋisirael, akuj yok na ŋina paaran abu ikitipeunio iwon anakwap a Ijipit!’

⁹Adau ayoŋ ayenun atemar isyaaka ŋituŋa ŋul, egogoŋ ŋakyes kec.

¹⁰Kimyekinae ayoŋ, ikotere etonomo ka omunya ikes a aŋoit a ŋina eyai lotau kaŋ. Nai eketuruwori ayoŋ iyoŋ ka ŋiletok kon ŋituŋa ŋulu alalak nooi.”

¹¹Nai abu Moses kimaima Ekapolon Akuj keŋ, kiŋit tema, “Okoe Ekapolon, kaanukiro itonomorya iyoŋ ŋituŋa kon anaŋoit kon, ŋituŋa kon ŋulu ibu iyoŋ iyau anakwap a Ijipit anapedor kon a ŋina apolon nooi ka anakan kon a ŋina etiron?

¹²Kaanukiro irworotor Ŋijipitian ebe, ‘Arae akitiya ŋuna aronok neni kec, iŋes ayaunia iŋes ikes lomukura lu, ikotere emunyari ikes anakwap a daadaŋ’? Kimyek aŋoit kon ŋin ŋina ka anyunyura; kilocok ŋatameta kon, ido nyisican ŋituŋa kon.

¹³Totamu ŋituŋa kon ke elope lu: Aburaam, Isaka ka Isirael, ŋulu arae ŋiketiyak kon. Totamu ŋuna ibu iyoŋ elope kikoŋ neni kec ibala, ‘Etipituni ayoŋ ŋiletok kus tolalata ikwa ŋikacer ŋulu alokidiama, ido ainakini ayoŋ ŋiletok kus akwap na daadaŋ ŋina adau ayoŋ akiikin iyes; eruwor ŋina kec ŋikaru ka ŋikaru.’ ”

¹⁴Aŋun, abu Ekapolon kilocok ŋatameta keŋ, nyisican ŋituŋa keŋ lopite ŋolo sek acamitor akisicania.

¹⁵Abu nai Moses toboŋu, totiyaun alomoru edakit ŋamoru ŋunaarei ŋunadapal ŋuna ka Acamunet. Egiritae ŋiwaetin daadaŋ a ŋamoru a ŋun, iŋes atemar kiŋaren ka kaku.

¹⁶Arae Akuj etiyat ŋamoru ŋun edapal ka arae Akuj egirit ŋakiro namoru ŋun, icieanakinit.

¹⁷Ani iirari Yosua ecelet a ŋituŋa apaki ŋina acelatar, tema neni a Moses, “Ecelasi ŋituŋa analomar esibit ejiete.”

¹⁸Nai tema Moses, “Nyerae ŋol ecelet a ŋituŋa a ŋulu adaut akiloun ŋimoe kec, kori ŋolo a ŋituŋa a ŋulu adaun akiloun; apupi ayoŋ ecelet ŋol erae ŋolo ka abolya.”

¹⁹Adolun Moses diyete alomari bon, kiŋolik etorube a itaok ewoi ka kiŋolik ŋituŋa idoŋaete, toŋo Moses nooi, tonomosi ŋun iŋes etau, kimasa ŋamoru ŋunadapal ŋun, tobwaŋak nakeju a emoru.

²⁰Tolot nai Moses tolemu etorube a itaok a ŋini kepotu ŋituŋa kitiyaut, kimasak nakim kicuny, kiryaa todopirir, kipurupurak nakipi, ido inak Ŋisirael tomata ŋakipi ŋun.

²¹Kiŋit nai Moses Aron tema, “Anukiro apotu ŋituŋa lu kitiyata neni kon, ŋuna iyaunia iyoŋ asecit na ŋina apolon nooi neni kec?”

²²Toboŋok Aron tema, “Nyikiteresiya aŋoit kon ekapolon kaŋ, iyeni roboca iyoŋ daŋ epite ŋolo ejoikinitor ŋituŋa lu akitiya ŋuna aronok.

²³Apotu ikes temasi neni kaŋ, ‘Kitiyakinae isua ŋitorubei a ŋakujo a ŋuna ikirikete isua; anerae nyikiyeni isua ŋakiro ŋuna kitiyakin neni a Moses a ŋolo abu ikitipeunio isua anakwap a Ijipit.’

²⁴Aŋun, abu ayoŋ olimok ikes otema, ‘Ani ca ituŋanan daadaŋ ŋini enapit egolid, emaikina tolacu; aŋun, apotu ŋituŋa yaut egolid neni kaŋ, ido abu ayoŋ ewuak nakim, etiyaunia etorube a itaok lo!’ ”

²⁵Ani eanyuni Moses atemar kisepelo ŋituŋa (anerae kebu Aron kimyek ikes isepelete, kepotu tari ŋimoe kec tojamuwasi ikes),

²⁶abu Moses towo alopuke ka alomar kiŋit ŋituŋa tema, “Ŋae erae ŋini ke Ekapolon? Emaikina ŋin bu neni kaŋ!” Apotu nai ŋikilyok ŋulu alokabila a Lepi potu neni keŋ, kirimokis iŋes kidiŋ.

²⁷Tema Moses neni kec, “Ŋakiro ŋuna irworo Ekapolon Akuj a Ŋisirael ikes nu, ‘Ŋinituŋanan alokidiŋ kus, emaikina tolemu ekileŋ keŋ kiwuak nakuraro tonap alokalokot keŋ. Tolot kitor lopukei ŋulu ka alomar daadaŋ toboŋonok ameun alowae ke epei tari ŋoloce. Emaikina ŋinituŋanan alokidiŋ kus toar lokaato keŋ, lokone keŋ ka ekidunyet keŋ.’”

²⁸Apotu ŋilepi kitiyata ikwapei alimokinitor Moses ikes, ido aponi toarae akoloŋit ŋin ŋituŋa ŋulu aapiyarit ekimar ŋalipyo ŋauni.

²⁹Tema nai Moses neni kec, “Ikitaleun iyes nakoloŋit na aŋuna ka akitiyanakin Ekapolon, anerae ipotu iyes nyiminakis ŋidwe kus ŋulusapa ka ŋikaitotoi kus. Aŋun, adau Ekapolon akiterereŋ iyes nakoloŋit na.”

³⁰Akoloŋit ŋina atupakini ŋin, abu Moses tema neni a ŋituŋa, “Iseca iyes nooi. Nai aboŋori ayoŋ tokona kidiama emoru neni ke Ekapolon, acepaki epedori iŋes akisyon asecit kus kadyek ayoŋ iŋes.”

³¹Aŋun, abu Moses toboŋo neni ke Ekapolon tema, “Okoe, Ekapolon, aseca ŋituŋa kon nooi; etiyaut aŋuna kec akuj alogolid.

³²Nai tokona, akadyekit ayoŋ iyoŋ kisyoni asecit kec ŋin, ani pa kisyon, kikisa ekiro kaŋ alokitaabo a ŋolo igirit iyoŋ ŋirorwa a ŋituŋa.”

³³Nai toboŋok Ekapolon Moses tema, “Ituŋanan daadaŋ ŋini asec aneni kaŋ, iŋes ekisari ayoŋ ekiro keŋ alokitaabo kaŋ.

³⁴Nai tokona, ape ya ŋituŋa nakibois ŋina akalimok ayoŋ iyoŋ; kiira ikiŋarenikini iyoŋ emalaika kaŋ. Kikote neni daŋ, akoloŋit ŋina esicania ayoŋ ŋituŋa ŋul, esicani ikes aŋuna ka asecit kec.”

³⁵Abu nai Ekapolon yau edeke neni a ŋituŋa, anerae apotu ikes kisitiyaut Aron etorube a itaok.