Read ngakarimojong Awos. 37 Bible Online

Awos. 37 - ngakarimojong bible

Awos. 37

¹Abu Besalel kitiyau anakito ke eewoi Asaduku; arae aoyau alosepyon ŋasentimitae amiat ka ŋatomon, torae aoyau alokiŋaren ka neni iteotor ŋasentimitae ŋatomonikanikapei ka ŋikanikapei, ido aoyau alokwap tari kidiama arae ŋasentimitae ŋatomonikanikapei ka ŋikanikapei.

²Toburusik iŋes egolid bon tooma ka kiŋa Asaduku ŋin, ido kiwuak egolid ece anawaetin a Asaduku daadaŋ alokiŋa.

³Kiwuak kwap ŋakejen a Asaduku a ŋin egolid ŋolo itiyaunitae ikwaan ka akokoro; a ŋinakeju apeikokoro, ŋaarei epeiwae ka ŋaarei lowae ŋoloce.

⁴Kitiyau iŋes ŋapetet ŋaarei ŋuna ka Asaduku a ŋin anakito a ŋuna ke eewoi, ido toburusik egolid napetet ŋun.

⁵Kirepak ŋapetet ŋun nakejen ŋuna etiyaunitae ke egolid ikwaan ka akokoro, ŋuna aya nawaetin ka Asaduku, ikotere edakitere Asaduku.

⁶Kitiyak iŋes Nasaduku ŋin akibois ŋina ka akisyonio ŋina arae egolid bon etiyaunitere; ŋina arae aoyau alosepyon ŋasentimitae amiat ka ŋitomon, torae aoyau alokiŋaren ka neni iteotor ŋasentimitae ŋatomonikanikapei ka ŋikanikapei.

⁷Abu iŋes kitiyau ŋitorubei a Ŋisubuna ŋiarei, kitiyau ke egolid a ŋolo etyekitae ejok nooi, ido kiwuak nawaetin a akibois a ŋina a akisyonio,

⁸kiwuak epei lowae epei ka ŋoloce lowae ŋoloce a akibois a ŋina ka akisyonio. Kiwuak ikes nen etapakina nawaetin a akibois a ŋina a akisyonio.

⁹Apetarito Ŋisubuna ŋabebenuk kec kidiama, arounito ŋabebenuk kec akibois ŋina a akisyonio eteosi Ŋisubuna ŋul eŋoliyarito nakibois ŋina a akisyonio.

¹⁰Abu daŋ Besalel kitiyau emesa anakito ke eewoi. Arae aoyau ke emesa a ŋol alosepyon ŋasentimitae ŋatomonikanikauni ka ŋikanikauni, torae aoyau alokiŋaren ka neni iteotor ŋasentimitae ŋatomoniomwon ka ŋiomwon, ido aoyau alokwap tari kidiama arae ŋasentimitae ŋatomonikanikapei ka ŋikanikapei.

¹¹Toburusik iŋes egolid bon lomesa ŋol, ido kiwuak egolid ece nawaetin a emesa a ŋol alokiŋa.

¹²Kitiyau ŋikelyo a emesa a ŋol erae aoyau kec ŋamilimitae ŋatomonikanikaarei ka ŋikan, ido kiwuak egolid lokelyo ŋul.

¹³Abu iŋes kitiyau ke egolid ŋakejen ŋaomwon ŋuna ikwaan ka akokoro, toenik lokoonae ŋuluomwon ŋulu a ŋakejen a emesa.

¹⁴Kiwuak Besalel ŋakejen ŋuna ikwaan ka akokoro ŋun diyete ŋikelyo ka Asaduku; todaka ŋapetet ŋuna adakeneneere Asaduku.

¹⁵Etiyaunit iŋes anakito ke eewoi ŋapetet ŋuna adakitere emesa ŋol, ido aburusikinit egolid napetet ŋun.

¹⁶Kitiyau Besalel ke egolid bon ŋiboro ŋulu ewuanakinio kidiama emesa, ikwapei ŋasaani ka ŋakijikoi ŋuna isitiyao alomesa a ŋol akicunyia ekinyate, ŋabakulei ka ŋikalaae ikwapei ŋiboro ŋulu einanakinere epiini neni ka Akuj.

¹⁷Abu Besalel kitiyau ke egolid bon awoet ŋina a etaa. Kitiyau kwap ka kidiama awoet ŋin ke egolid a ŋolo etyekitae ejok nooi, ido kitiyak ŋiboro lu nawoet ŋin etapakina erae ibore ipei bon: Ŋitorubei a ŋatur a ŋuna esibito ŋikopoi, ŋitorubei a ŋakwii a ŋuna igaŋito ŋatur ka ŋitorubei a ŋatur a ŋuna ebusak nooi.

¹⁸Kitiyak iŋes ŋaten ŋakanikapei ŋuna apetara nawaetin a awoet, ŋauni epeiwae awoet ka ŋauni lowae ŋoloce.

¹⁹Abu kiwuak naten ŋun ŋakanikapei ŋitorubei a ŋatur a ŋauni a ŋinateni, ekwaan ŋatur ŋun ka ŋuna ke ekitoe a ŋolo enyaritae alimond. Ayakasi daŋ nen ŋitorubei a ŋakwii a ŋuna egaŋito ŋatur ka ŋitorubei a ŋatur a ŋuna ebusak nooi.

²⁰Abu iŋes kiwuak awoet a etaa ŋin ŋitorubei a ŋikopoi ŋiomwon ŋulu ekwaan ka ŋatur a ekitoe a ŋolo enyaritae alimond, toya ŋitorubei a ŋakwii a ŋuna egaŋito ŋatur ka ŋitorubei a ŋatur a ŋuna ebusak nooi.

²¹Kiwuak iŋes ŋitorubei a ŋakwii a ŋun: Epei kwap nakisyakinet a ŋaten a ŋun a ŋaarei a ŋuna esyaunak, epei nabo nakisyakinet a ŋuna alokidiŋ a ŋunaarei ka ŋoloce kwap nakisyakinet a ŋuna esidyok a ŋunaarei.

²²Kitiyak iŋes ŋitorubei a ŋakwii ka ŋulu a ŋaten, totapak nawoet a etaa erae ibore ipei bon ka etyekunitae a egolid bon.

²³Abu iŋes kitiyau a egolid bon ŋiboro lu aŋuna ka awoet a ŋin. Ŋitaae ŋikanikaarei ka ŋasiniyae ta ŋasuwa ŋuna eridere ŋatotol ŋuna inokanakinere ŋitaae ŋul.

²⁴Arae ŋakiloi ŋatomoniuni ka ŋakan ŋuna a egolid bon abu iŋes kisitiya akitiyaunia awoet ke etaa ka ŋiboro daadaŋ ŋulu esitiyao a nen.

²⁵Abu Besalel kitiyaut a ŋakito ke eewoi Namuroet ŋinakicunyet ekinyate. Eriyan ŋiwaetin keŋ daadaŋ ŋuluomwon, arae aoyau alosepyon ŋasentimitae 45 ka arae kiŋaren ka neni iteotor ŋasentimitae 45, ido torae aoyau alokwap tari kidiama ŋasentimitae 90. Kiwuak ŋigug keŋ ŋulu asibito ŋamomwar lokoonae, etapakina Namuroet erae ibore ipei bon.

²⁶Toburusik iŋes egolid kidiama Namuroet ŋin ka nawaetin keŋ daadaŋ kiryam ta neni esibit ŋamomwar alokoonae keŋ, ido kiwuak egolid ece towuau Namuroet ŋin anawaetin a daadaŋ.

²⁷Kitiyau ke egolid ŋikabobooe ŋiarei aŋuna ka Namuroet a ŋin. Toenik ŋikabobooe lowaetin a Namuroet ŋiarei ŋulu eteosi, kwap egolid ŋolo awuat Namuroet anawaetin. Toenikinitetei nakito ŋuna adakitere Namuroet ŋin.

²⁸Arae ŋakito ke eewoi etiyaunitor iŋes Namuroet ŋin, ido toburusik egolid nakito ŋun.

²⁹Abu Besalel kitiyau akimyet ŋina ke etal daŋ ŋina ikwaan ka ŋina enyalunit eketiyan ŋamyeta ejok.