Read ngakarimojong Awos. 39 Bible Online

Awos. 39 - ngakarimojong bible

Awos. 39

¹Abu Besalel kisitiyau ŋipiiryanotin ŋul ŋilowi ŋulupusiyek, ŋulu kipura-areŋak ka ŋulu areŋak, ŋulu ke esacaradoti ŋulu itiyaa anakibois a ŋina Asegan. Apotu ikes kitiyaut ŋilowi ŋulu ka asacaradotonu, aŋuna ka Aron, lopite ŋolo ecikitor Ekapolon Moses.

²Abu nai Besalel kitiyau arapet ŋina ewuakinitae egolid, torae ŋina aya ŋiraŋgi lu: Ŋolopus, ŋolo kipurat-areŋan areŋan ka ŋolo areŋan torae ŋina amilimilan ŋina adonyuno ejok.

³Kityeku iŋes egolid ŋolobenen kiwuanak narapet ŋina aya ŋiraŋgi lu: Ŋolopus, ŋolo kipurat-areŋan ka ŋolo areŋan narapet ŋina amilimilan ŋina adonyunit ituŋanan ŋini eyeni akidony ejok nooi.

⁴Todonyok arapet ŋin ŋaraco ŋaarei ŋuna ikacakina loseketa alocileta a arapet.

⁵Ekwaan arokoba ka arapet a ŋin isibusitae a ŋiboro lu a ŋulu etiyaunitere arapet: Egolid, ŋanaŋgae ŋunapusiyek, ŋunakipura-areŋak ka ŋuna areŋak ta ŋuna amilimilak ŋuna adonyuno ejok; lopite ŋolo ecikitor Ekapolon Moses.

⁶Kitemonok Besalel ŋamoru ŋuna areŋak puu ŋuna enyaritae onikis, toenianak loriko ŋulu ke egolid; ecienakinitae namoru ŋun ejok nooi ŋirorwa a ŋidwe a Yakob a ŋulusapa.

⁷Kiwuak iŋes ŋamoru ŋun naraco ŋuna aya narapet aloseketa. Toruwor ikes ŋuna etamunitere ŋidwe a Yakob ŋulusapa; lopite ŋolo ecikitor Ekapolon Moses.

⁸Todonyu Besalel eboli ŋolo ka atorobu ŋolo adonyuno ejok nooi, ŋolo ekwaan edonyuno ejok ka arapet ŋina ewuakinitae egolid, torae ŋolo aya ŋiraŋgi lu: Ŋolopus, ŋolo kipurat-areŋan areŋan ka ŋolo areŋan torae ŋolo amilimilan ŋolo adonyuno ejok.

⁹Ariyan ŋiwaetin ŋuluomwon ke eboli a ŋol daadaŋ, irotakina ŋarwa ŋaarei.

¹⁰Kiwuak iŋes ŋilaino ŋiomwon ŋulu a ŋamoru a ŋuna epol egyelit, elain ŋolo esyaunan ayakasi ŋamoru nu: Ŋuna areŋak puu, ŋuna enyaritae Karinelian ka ŋuna enyaŋiyarito ŋuna enyaritae Topas ta ŋuna alibak nooi ŋuna enyaritae Karisolite.

¹¹Elain ŋolo a ŋiarei ayakasi ŋamoru nu: Ŋuna inyalal ŋiraŋgi ŋuna enyaritae Yasiper ka ŋunapusiyek ŋuna enyaritae Sapire ta ŋuna alibak nooi ŋuna enyaritae Emerald.

¹²Elain ŋolo a ŋiuni ayakasi ŋamoru nu: Ŋuna inyalal ŋiraŋgi ŋuna enyaritae Jacinis ka ŋuna egogoŋ nooi ŋuna enyaritae Agate ta ŋunapusiyek-areŋak ŋuna enyaritae Amesist.

¹³Elain ŋolo a ŋiomwon ayakasi ŋamoru nu: Ŋuna enyaŋiyarito ŋuna enyaritae Karisolite ka ŋuna areŋak puu ŋuna enyaritae onikis ta ŋuna inyalal ŋiraŋgi ŋuna enyaritae Yasiper. Aenianakinitae ŋamoru ŋun iwapei isibakitae a ŋiriko a ŋulu etiyaunitae ke egolid.

¹⁴Arae ŋamoru ŋun ŋatomon ka ŋaarei, a ŋinamoru egiritae ekiro epei a ŋidwe a Yakob a ŋulusapa; ŋolokiro imarit ekabila epei alotooma ŋikabilae ŋulutomon ka ŋiarei.

¹⁵Kitiyau iŋes ke egolid bon ŋiriko ŋulu asonyitae ikwa ŋaunoi, kiwuak loboli ŋolo ka atorobu ŋol.

¹⁶Kitiyau iŋes ke egolid ŋiriko ŋiarei ka ŋikabobooe ŋiarei, ido toenik locileta ŋuluarei ŋulu ke eboli a ŋol.

¹⁷Toenik iŋes ŋiriko ŋuluarei ŋul lokabobooe ŋulu alocileta ke eboli,

¹⁸ido toenia iŋes epeiwae ŋiriko locileta ŋuluarei ŋulu alokidiama eboli, totapakin naraco ŋuna ka arapet ŋuna aya kidiama ŋiseketa.

¹⁹Kitiyau iŋes ke egolid ŋikabobooe ŋiarei, toenik locileta ŋuluarei ŋulu alokwap eboli, toenik alokwap alodiyete arapet.

²⁰Kitiyau nai iŋes a egolid ŋikabobooe ŋice ŋiarei, toenik kwap ŋaraco ŋuna a ŋiseketa neni iryamyata eboli ka neni isibusitae anarapet.

²¹Toenik iŋes ka ausi a ŋinapus ŋikabobooe a eboli lokabobooe a arapet, toenik ausi ŋinapus ŋin narokoba ŋina ka acir; ikotere nyidalidala eboli anarapet, anerae ecikit Ekapolon Moses kitiya ŋun.

²²Abu Besalel kitiyau ekaaso ŋolopus ŋolo ani enapyo kidokokino arapet alokidiama, ŋolo adonyunit ituŋanan ŋini eyeni akidony ejok.

²³Topedok kidiŋ keŋ neni itori akou enapyo, ido totokok nen a ŋiusyo a ŋulu asonyony ejok nooi kiryam; kikwaanikin ka neni etokere abilet ka anaŋga. Arae ŋun ikotere nyecila nen.

²⁴Kiwuak iŋes neni iwasi alokwap a elou ŋikatelitel ŋulu ekwaan ka ŋaraito ke ekitoe a ŋolo ikwaan ka ekacikicikit. Arae ŋiraŋgi a ŋikatelitel a ŋul ŋulupusiyek, ŋulu kipura-areŋak ka ŋulu areŋak, ido adonyonokinitoe ŋiusyo ŋulu amilimilak kwap ekaaso ŋol.

²⁵Kitiyau iŋes ke egolid tari ŋitworoi ŋulu cicik ŋulu ewuakinitae nakidiŋon a ŋikatelitel a ŋul.

²⁶Abu Besalel nyitutupanak ŋitworoi make, kori ŋikatelitel make aneni iwasi alokwap ke ekaaso a ŋol, a ŋolo etiyaare etic ke Ekapolon, ikwapei ecikitor Ekapolon Moses.

²⁷Todonyu Besalel tari ŋisatyo ananaŋga a ŋina amilimilan aŋuna ka Aron ka ŋidwe keŋ ŋulusapa.

²⁸Todonyu nabo ananaŋga a ŋina amilimilan akopiya, ŋakitambarae ŋuna enapyo anakou ka ŋisiriwali ŋulu ajokak nooi ŋulu edonyuno ejok,

²⁹ta arokoba ŋina aya ŋiraŋgi lu: Ŋolopus, ŋolo kipurat-areŋan ka ŋolo areŋan; torae ŋina adonyuno ejok, lopite ŋolo ecikitor Ekapolon Moses.

³⁰Kitiyau iŋes ke egolid bon akaparaparat ŋina ka akou, ido kiciek nen ŋakiro nu: “Itesegunitae aŋuna ke Ekapolon.” Arae ŋun ŋuna ecikit Ekapolon Moses kitiya.

³¹Toenik iŋes ausi ŋinapus nakaparaparat ŋin, ikotere eeniyarya akaparaparat nakopiya lopite ŋolo ecikitor Ekapolon Moses

³²Aŋun, aponi kirikakinae etic daadaŋ ŋolo ke Eema ŋolo iryamununoi aŋuna ke Ekapolon. Apotu Ŋisirael kitiyata etic daadaŋ lopite ŋolo ecikitor Ekapolon Moses.

³³Yaut nai ikes neni a Moses Eema ŋolo iryamununoi, yaut Eema kaapei ka ŋiboro keŋ daadaŋ, ŋikodoce keŋ, ŋakito keŋ, ŋalodoi keŋ, ŋipirin keŋ ka ŋakito ŋuna epesyo kwap keŋ;

³⁴ŋilowi a ŋimeesekin ŋulu kimukokina kidiama, ŋijamu a ŋaatuk ŋulu kimukokina kidiama ŋulu adaitae ka anaŋga ŋina atyakitere Eema ŋol alokidiŋ;

³⁵Asaduku ŋina ka Acamunet ka ŋipirin keŋ ta akibois ŋina a akisyonio;

³⁶emesa keŋ ka ŋiboro daadaŋ ŋulu isitiyao alomesa a ŋol ta amugati ŋina ka ayakau ke Ekapolon.

³⁷Yaut ikes awoet ŋina ke etaa ka ŋitaae keŋ iwuakinitae kidiama keŋ ta ŋiboro daadaŋ ŋulu isitiyao a nen, ikwapei akimyet ŋina a ŋitaae.

³⁸Yaut ikes Namuroet ŋina arae egolid bon etiyaunitere, yaut akimyet ŋina ke etal, akimyet ŋina itoboboere eure ŋolo ke ekinyate ka yaut anaŋga ŋina ke epuke ke Eema a ŋolo iryamununoi;

³⁹yaut Namuroet ŋina arae eburonis bon etiyaunitere ka ŋalodoi keŋ, ŋipirin keŋ ka ŋiboro daadaŋ ŋulu isitiyao a nen; ikwapei abesen ka awoet keŋ.

⁴⁰Yaut ikes ŋanaŋgae ŋuna ineneo nalapatu ŋina alokiŋa Eema ŋolo iryamununoi, ŋipirin a alapatu a ŋin ka ŋakito ŋuna epesyo kwap nalapatu ŋin, anaŋga ŋina ke epuke a alapatu a ŋin, ŋaunoi, ŋases ka ŋiboro daadaŋ ŋulu isitiyao a nen apaki ŋina itiyaere alotooma Eema ŋol ŋolo iiryamununosi ŋituŋa.

⁴¹Yaut ikes ŋilowi ŋulu edonyitoe ejok ŋulu itiyaere anakibois a ŋina asegan, ŋilowi ŋulu ke etal ŋulu ka Aron ke esacaradoti ka ŋulu a ŋidwe keŋ a ŋulusapa a ŋulu itiyaete ikwapei ŋisacaradotin.

⁴²Apotu Ŋisirael kitiyata etic daadaŋ lopite ŋolo ecikitor Ekapolon Moses.

⁴³Ani eanyuni Moses atemar erikakis ikes etic daadaŋ lopite ŋolo ecikitor Ekapolon iŋes, abu kiterereŋ ŋituŋa.