Read ngakarimojong Awos. 5 Bible Online

Awos. 5 - ngakarimojong bible

Awos. 5

¹Ani ekaku, toloto Moses ka Aron neni a Parao temasi, “Ŋakiro ŋuna irworo Ekapolon Akuj a Isirael ikes nu ebe, ‘Kimyek ŋituŋa kaŋ toloto, ikotere kitiyata ŋasuban aŋuna kaŋ analoŋisat.’ ”

²Nai abu Parao kiŋit ikes tema, “Ŋae erae Ekapolon, ŋolo emaikina ayoŋ ewuap ŋakiro keŋ emyek Ŋisirael toloto? Nyayeni ayoŋ Ekapolon ŋol, ido nyemyekini ayoŋ Ŋisirael toloto.”

³Temasi ikes neni a Parao, “Adau Akuj a Ŋiburaniyae atakanun neni kosi. Kimyekinae isua tolotoi naloŋisat alosit kosi ŋina a ŋirwa a ŋiuni, ikotere einakinio ŋamuronisya neni a Ekapolon Akuj kosi; ani pa kikokis nen, epedori iŋes akiar isua a ŋidekesyo, kori a ekileŋ.”

⁴Nai kiŋit erwosit a Ijipit ikes tema, “Moses ka Aron, kaanukiro icamitotor iyes akiya ŋituŋa aloticisyo kec? Toboŋosi loticisyo kus!”

⁵Toropak Parao irworo tema, “Kiirasi iyes, alalata ŋituŋa kus nooi akilo ŋituŋa ŋulu ka akwap a Ijipit, ido icamito iyes akitojoŋore ikes etic.”

⁶Akoloŋit ŋinapei, abu Parao kicik ŋikapolok ŋulu esitiyaete ŋituŋa ka ŋulu apolokinito etic tema,

⁷“Nyiinakis nabo ŋituŋa ŋanya ŋuna kinyalet ecoto toramere ŋamatapali, lopite ŋolo sek iinanakiniata. Kimyekisi ŋinituŋanan kiwara ŋanya keŋ a ilope.

⁸Nai emaikina iyes taanyut atemar itiyaete ikes etyae a ŋamatapali ŋolopei ŋoon sek etiyaete; nyitiditeut ekimar a ŋamatapali, anerae ekalanyaka ŋituŋa ŋul. Akalanyo ŋin iŋes igworotor ikes ebasi, ‘Kimyekinae isua tolotoi, ikotere einakinio ŋamuronisya neni ka Akuj kosi.’

⁹Inakisi ikes etic ŋolo alalan nooi, ikotere itumori ikes etic ŋol tojoŋoto akipup ŋakiro ŋuna ka amodiyo ŋun.”

¹⁰Aŋun, apotu ŋikapolok ŋulu esitiyaete ŋituŋa ka ŋulu apolokinito etic toloto neni a ŋituŋa temasi, “Ŋakiro ŋuna irworo Parao ikes nu ebe, ‘Nyakainakini ayoŋ iyes ŋanya.

¹¹Apesi iyes ŋikulepek toŋerut ŋanya ŋuna isitiyaete aneni daadaŋ iryamuniata, nai nyitiditeunio etic kus jik.’ ”

¹²Aŋun, apotu ŋituŋa kielakin Ijipit daadaŋ aŋerun ŋanya.

¹³Kibunyakis ŋikapolok ŋulu esitiyaete ŋituŋa ikes temasi, “Kitiyata etic kus lotyae ŋolopei sek, lopite ŋolopei ŋoon sek itiyaata ikiinanakinio ŋanya.”

¹⁴Apotu ikes tolomakis akibuŋa Ŋisirael ŋulu alemunito ŋikapolok a Parao ŋulu esitiyaete ŋituŋa apolokin etic. Kiŋitae Ŋisirael ŋulu apolokinito etic ebe, “Kaanukiro nyitiyaunitotor iyes nakoloŋit na, kori bien ŋamatapali ŋuna etya ŋuna sek?”

¹⁵Tonyout nai Ŋisirael ŋulu apolokinito ŋiticisyo, toloto neni a Parao kigworokis iŋes kiŋita temasi, “Kaanukiro itiŋitor iyoŋ ŋiketiyak kon ikona?

¹⁶Mam ŋanya ikiinanakinio isua ŋiketiyak kon, nai ebasi ŋikapolok ŋulu isitiyaete ŋituŋa neni kosi ebe, ‘Kitiyautu ŋamatapali!’ Kiŋolik iyoŋ epite ŋolo ikibuŋaere isua ŋiketiyak kon! Nai ŋituŋa kon a elope edyakarito.”

¹⁷Tema Parao, “Ŋikalanyanotin! Kire irae ŋikalanyanotin; ŋakiro ŋun irubakinitotor iyes ibasi, ‘Kimyekinae tolotoi, ikotere einakinio amuronot neni a Ekapolon.’

¹⁸Toboŋosi lotic. Mam ŋanya ikiinakinio iyes, nai emaikina iyes kitiyaut ŋamatapali ŋuna etya ŋunapei ŋoon sek.”

¹⁹Kiŋolikis Ŋisirael ŋulu ainakinitae apolokin etic atemar eyakasi ikes locan apaki ŋina alimokinere ebe, “Nyemaikina iyes kitiditeut ekimar a ŋamatapali alokimar a ŋolo ŋoon sek etiyaununuyo.”

²⁰Ani erotokinete ikes aneni a Parao, kiryamun ka Moses ta Aron ŋulu edarito ikes.

²¹Temasi ikes neni ata Moses, “Ikimaimai isua Ekapolon pena ŋakiro nu nakyes kus ka ikitubok iŋes iyes! Ikisiman iyes isua Parao ka ŋiketiyak keŋ ka ikitaar iyes ikes isua.”

²²Kirworik nai Moses nabo neni a Ekapolon kiŋit tema, “Okoe Ekapolon, kaanukiro isicania iyoŋ ŋituŋa lu? Kaanukiro ikiyakiyarya iyoŋ ayoŋ neni kec?

²³Ŋinapei abunio ayoŋ neni a Parao erwor aŋuna kon, isicanit iŋes ŋituŋa lu, ido nyitiyakina iyoŋ ŋadi ŋuna ka alakun ŋituŋa kon.”