Read ngakarimojong Awos. 8 Bible Online

Awos. 8 - ngakarimojong bible

Awos. 8

¹Tema nai Ekapolon neni a Moses, “Ape neni a Parao tolimok iŋes atemar ŋakiro ŋuna irworo Ekapolon ikes nu, kimyek ŋituŋa kaŋ toloto, ikotere ilipete neni kaŋ.

²Ani pa kicamak iyoŋ ikes toloto, ekesicani ayoŋ iyoŋ, elelebikini ŋakidodoka nakwap kon daadaŋ.

³Eburusiyarete ŋakidodoka aŋolol; epete tari kai kon ŋina ka apukan, epete tari nagule kon ka lokitaada kon. Epete tari nakais a ŋikapolok a ŋulu ipukatotor iyoŋ ka nakais ŋuna a ŋituŋa kon; epete tari lokenoi ka loboro ŋulu emunaere ŋakirya.

⁴Ikidokakinete iyoŋ ŋakidodoka ka edokakinete tari neni a ŋituŋa kon ka neni a ŋikapolok a ŋulu ipukatotor iyoŋ.”

⁵Tema Ekapolon neni a Moses, “Tolimok Aron atemar kikyaa akan keŋ etiŋit ebela keŋ alokidiama ŋaŋololin, ŋakitelesyo ka ŋataparin, ikotere tolomut ŋakidodoka a nen toyakaun nakwap a Ijipit. ”

⁶Aŋun, abu Aron kikyaa akan keŋ kidiama ŋakipi ŋuna aya nakwap a Ijipit; ido apotu ŋakidodoka tolomut a nen pena nakwap a Ijipit.

⁷Nai apotu ŋikekukujak daŋ kitiyata ŋakujuwuanisya ŋunapei ŋun aloticisyo kec a ŋulu pa apatana ayenun; kitolomut ŋakidodoka anakwap a Ijipit.

⁸Abu nai Parao tonyarau Moses ka Aron tema, “Kilipa neni a Ekapolon tolema ŋakidodoka aneni kaŋ ka alotuŋa kaŋ, ido emyekini ayoŋ Ŋisirael toloto kitiyata amuronot neni a Ekapolon.”

⁹Tema Moses neni a Parao, “Anarimao kon, tolimokinae ayoŋ apaki ŋina emaikina elipya aŋuna kon ka aŋuna a ŋikapolok a ŋulu ipukato ka iyoŋ ta ŋituŋa kon, ikotere elemaryo ŋakidodoka aneni kon ka anakais kus, kidoŋo eya naŋolol Nile bon.”

¹⁰Tema Parao, “Moi taparacu.” Tema Moses, “Etiyae ayoŋ ikwapei ilimunio iyoŋ! Aŋuna ka akitaanyun iyoŋ atemar, mam ituŋanan epedoryo akisikwaanikin ka Ekapolon Akuj kosi.

¹¹Erotokinete ŋakidodoka aneni kon ka anakais kus aneni a ŋikapolok a ŋulu ipukatotor iyoŋ ka alotuŋa kon, nai idoŋete eyakasi naŋolol Nile bon.”

¹²Torotokis nai Moses ka Aron aneni a Parao; kigworonok Moses Ekapolon aŋuna a ŋakidodoka a ŋuna abu Ekapolon yau neni a Parao.

¹³Abu nai Ekapolon kitiya ŋuna eŋita Moses ka apotu ŋakidodoka totwaka anakais ka anenilapat alokidiŋ ŋakais ta alomanikorin.

¹⁴Totukonokis ŋituŋa ŋakidodoka ŋuna apotu kitobosut akwap ŋin tul.

¹⁵Nai ani eanyuni Parao atemar eeŋa iŋes alocan a ŋul, abu kitogogoŋ akou keŋ; nyepupok ŋakiro ŋuna erworosi Moses ka Aron ka abu kitiya lopite ŋolo sek alimunitor Ekapolon.

¹⁶Tema nai Ekapolon neni a Moses, “Tolimok Aron atemar kikyaa ebela keŋ, toram ŋalup topuruu apuwa, ikotere apuwa ŋin eruwor ŋilac anakwap a Ijipit a daadaŋ.”

¹⁷Apotu ata Moses kitiyata ŋun; abu Aron kikyaa akan keŋ etiŋit ebela keŋ, toram ŋalup topuruu apuwa ŋina abu toruwor ŋilac ŋulu apotu pena lotuŋa ka lobaren daŋ toruwor apuwa a akwap a Ijipit a daadaŋ ŋilac bon.

¹⁸Kikatakis ŋikekukujak a Ijipit aloticisyo kec a ŋulu pa apatana ayenun akitiya akujuwuanut ŋinakitolomunet ŋilac, nai apotu nyepedosi. Apotu ŋilac pena lotuŋa ka lobaren daŋ.

¹⁹Temasi ŋikekukujak neni a Parao, “Akuj etiya ŋakiro nu a akan keŋ!” Nai abu Parao torubak itogogoŋit akou keŋ, abu nyepupok ŋakiro ata Moses ka abu kitiya lopite ŋolo sek alimunitor Ekapolon.

²⁰Tema nai Ekapolon neni a Moses, “Tonyou moi taparacu eriŋa ataparacu kitoodiyar neni a Parao apaki ŋina elomarya iŋes kiŋa nakipi a aŋolol Nile, tolimok iŋes atemar ŋakiro ŋuna irworo Ekapolon ikes nu, kimyek ŋituŋa kaŋ toloto, ikotere ilipete neni kaŋ.

²¹Ani pa kicamak iyoŋ ikes toloto, eyakuuni ayoŋ ŋicuc ŋulu alalak nooi neni kon, neni a ŋikapolok a ŋulu ipukato ka iyoŋ, lotuŋa kon, ka nakais kus; ilelebun ŋicuc ŋulu alalak nooi nakais a Ŋijipitian ka akwap kec daadaŋ neni iboiyoto ikes.

²²Nai akoloŋit ŋin, nyepete ŋicuc ŋul nakwap a Gosen, neni iboiyoto ŋituŋa kaŋ, ŋun nai ikitoodikinete iyoŋ atemar ayoŋ Ekapolon ayakar apedor anakwap.

²³Eketaanyikini ayoŋ iyoŋ atyeketait ŋina eyai kidiŋ ŋituŋa kaŋ ka ŋulu kon. Etakanuni akujuwuanut ŋin moi taparacu.”

²⁴Abu Ekapolon kitiya ŋun, toyakaun ŋicuc ŋulu alalak nooi kai a Parao ka nakais a ŋikapolok a ŋulu epukatotor iŋes, tomunaut ŋicuc akwap a Ijipit daadaŋ.

²⁵Tonyarau nai Parao Moses ka Aron tema “Apesi inakisi amuronot neni ka Akuj kus. Kitiyata ŋun anakwap anapei a na.”

²⁶Nai abu Moses tema neni a Parao, “Nyemaikina isua akitiya ŋun; anerae ŋamuronisya ŋuna einanakinio isua neni a Ekapolon Akuj kosi, erae ibore ŋini nyitalakarit Ŋijipitian. Ani kelemun isua ŋamuronisya ŋun, inakinae neni ke Ekapolon Akuj kosi iteete Ŋijipitian ikicakete isua Ŋijipitian a ŋamoru.

²⁷Emaikina isua kisyakinae alosit kosi ŋina a ŋirwa a ŋiuni analoŋisat, ido oinakisi ŋamuronisya neni a Ekapolon Akuj kosi ikwapei ikicikakinitere isua.”

²⁸Aŋun, abu Parao tema, “Ekemyekini ayoŋ iyes toloto inakis ŋamuronisya neni a Ekapolon Akuj kus analoŋisat, erae ca pa kiloto iyes neni elwana nooi. Kilipakinae ayoŋ.”

²⁹Tema nai Moses, “Arotokin ayoŋ aneni kon bon, elipi ayoŋ neni a Ekapolon, ikotere ŋicuc torotokis moi taparacu aneni a Parao, aneni a ŋikapolok a ŋulu ipukatotor iŋes ka alotuŋa keŋ. Nai emaikina iyoŋ Parao nyilyokon, towou akimyekin Ŋisirael toloto ainakin ŋamuronisya neni a Ekapolon.”

³⁰Aŋun, abu Moses toloma kiŋa aneni ayai Parao, ido kilip neni a Ekapolon.

³¹Abu nai Ekapolon kitiya lopite ŋolo eŋitar Moses: Tolema ŋicuc aneni a Parao, aneni a ŋikapolok a ŋulu epukatotor Parao ka alotuŋa a Parao; mam epei daŋ abu kidoŋ.

³²Nai abu Parao apaki daŋ ŋin kitogogoŋ akou keŋ, nyecamak Ŋisirael toloto.