Read ngakarimojong Yob 1 Bible Online

Yob 1 - ngakarimojong bible

Yob 1

¹Keyai koloŋ ekile ŋolo kenyaritae Yob, kiboi iŋes anakwap a ŋina anyaritae Us. Arae Yob ituŋanan ŋini amam ŋuna etoroniyaritere, ido etiyae ŋuna eyookino, etopoloorit Yob Akuj ka aŋerit ŋuna aronok.

²Ayakar Yob ŋidwe keŋ ŋulusapa ŋikanikaarei ka ŋulupesur ŋiuni.

³Ayakar iŋes ŋamesekin ŋalipyo ŋakanikaarei, ŋikaala ŋalipyo ŋauni, ŋimoŋin aliput, ŋisigirya ŋamiae ŋakan ka ŋiketiyak ŋulu alalak nooi. Aŋun arae Yob ekile ŋolo abarit nooi akilo ŋituŋa daadaŋ ŋulu a ŋakwapin a ŋuna alo Kide Yorodan.

⁴Etiyaeneneete ŋidwe a Yob ŋulusapa ŋasuban anakais kec, acunanarosi ikes kai a ipei eboonokin, ido anyaraeneneete ikes ŋakaitotoi kec ŋunauni akimuj ka akimat kaapei ka ikes.

⁵Ani elunyar ŋirwa ŋulu a ŋasuban, anyaraenene Yob ŋidwe keŋ akitaleun; taparacu sek, inak Akuj ŋainakineta ŋuna epeyo, ŋainakineta ŋuna erae ekimar a ŋidwe keŋ a daadaŋ, anerae abu Yob tema, “Acepaki aseca ŋidwe kaŋ, ecieno Akuj alotai kec.” Erae ŋun ŋuna etiyaenene Yob a ŋinakoloŋit.

⁶Akoloŋit apei, tocununos ŋisubuna ŋulu anakuj kiŋaren Ekapolon, abu Satan daŋ bu neni acunakina ikes.

⁷Kiŋit Ekapolon Satan tema, “Ai ibunio iyoŋ?” Toboŋok Satan tema, “Abuni ayoŋ anakirimit akwap, atubonor ayoŋ ŋiwaetin ka akwap daadaŋ.”

⁸Kiŋit Ekapolon Satan tema, “Anu itami iyoŋ aŋuna a eketiyan kaŋ a Yob? Mam ituŋanan anakwap ŋini ikwaanatar Yob, erae iŋes ituŋanan ŋini emam ŋuna itoroniyaritere ka erae iŋes ŋolo iyookino, ekile ŋolo itopoloorit Akuj, ŋolo eŋerit ŋuna aronok.”

⁹Toboŋok nai Satan Ekapolon tema, “Nyekerit Yob Akuj ikoŋin.

¹⁰Iuryarit iyoŋ iŋes alowaetin a daadaŋ kaapei ke ekal keŋ ka ŋiboro daadaŋ ŋulu eyakar iŋes, iterereŋ ŋiticisyo keŋ, ido alalata ŋiboro ŋulu eyakar iŋes anakwap.

¹¹Tolema ceni iyoŋ ŋiboro ŋulu eyakar iŋes, ikiceni iŋes iyoŋ.”

¹²Tolimok Ekapolon Satan tema, “Iyookino, ŋiboro daadaŋ ŋulu eyakar iŋes eyakasi napedor kon, nai ipei bore bon, nyitiya aronis adio nakuwan keŋ.” Abu nai Satan torotok alokiŋaren Ekapolon.

¹³Akoloŋit apei ŋina emujata ka amasyata epiini ŋidwe a Yob ŋulusapa ka ŋulupesur alokai alokaato kec a ŋolokiyae,

¹⁴bu ekiyakia neni a Yob tema, “Apaki ŋina etaata ŋimoŋin ka todakasi ŋisigirya daŋ alodiyete nen,

¹⁵apotu Ŋisabean potu toremo ka tomeasi ŋibaren ŋul daadaŋ, ido apotu toara a ŋileŋia ŋiketiyak; ayoŋ bon abu osi ainun iyoŋ ŋakiro ŋuna apotu kitiyakin.”

¹⁶Ani eriŋa iŋes irworo, todolu ece tema, “Abu akim ŋina ka Akuj totiyaun alokidiama, tonomiya ŋamesekin ka ŋiketiyak, tomunya ikes daadaŋ, ayoŋ bon abu osi ainun iyoŋ ŋakiro ŋuna apotu kitiyakin,”

¹⁷Ani eriŋa ŋol irworo, todolu ece tema. “Apotu Ŋibabiloniyae kicodut eyakatar ŋakodeta ŋauni, toremo ŋikaala tomeasi, ido apotu toara a ŋileŋia ŋiketiyak, ayoŋ bon abu osi ainun iyoŋ ŋakiro ŋuna apotu kitiyakin.”

¹⁸Ani eriŋa ŋol irworo todolu ece tema, “Apaki ŋina ayakatar ŋidwe kon ŋulusapa ka ŋulupesur kai alokaato kec a ŋolokiyae ŋina emujata ka amasyata epiini,

¹⁹apotu ikes atipei tonaŋakin ekutuni ekuwuam ŋolo agogoŋon itorunit lowae ŋolo ka aloŋisat, abu ekuwuam ŋol tonaŋ ŋikoonae ŋuluomwon ŋulu ka akai, ido abu akai toritakin losorok ŋul ka atwaka; ayoŋ bon abu osi ainun iyoŋ ŋakiro ŋuna apotu kitiyakin.”

²⁰Abu nai Yob tonyou, tocil ekaaso keŋ, tobanya ŋitim anakou keŋ, toramakin kwap ido kilip.

²¹Tema, “Ekedounio ayoŋ anakwap a na pa anapit idiobore ka aŋopiyari anakwap a na pa anapit idiobore, abu Ekapolon okoinak, ido enyaka Ekapolon; kipuroe ekiro ke Ekapolon.”

²²Anakisicaneta a ŋun a daadaŋ abu Yob nyesec, kori nyitoroniya Akuj.