Read ngakarimojong Yob 10 Bible Online

Yob 10 - ngakarimojong bible

Yob 10

¹Kiyatak Yob erwor keŋ tema, “Aluŋ ayoŋ akiyar kaŋ; alimuni ayoŋ emam akuryanu ŋakiro ŋuna eŋuruŋura ayoŋ; erwori ayoŋ aŋuna ka aŋoit a ŋina ileleba lotau kaŋ.

²Alimokini ayoŋ Akuj atemar, nyikitubok ayoŋ; kimyekinae ayoŋ oyenu ŋuna ikitiŋitor iyoŋ ayoŋ ikiremokino.

³Ejok mono aneni kon akisican ayoŋ a? Ejok mono aneni kon ajamuwar esubuna kon a? Ido kitojok ŋuna eyeete ŋulu aronok a?

⁴Iyakar mono iyoŋ ŋakonyen ŋuna ikwaan ka ŋuna a ituŋanan a? Ite mono iyoŋ lopite ŋolo iteo ituŋanan a?

⁵Imaruna mono ŋirwa kon ikwa ŋulu a ŋituŋa a? Kori imaruna mono ŋikaru kon ikwa ŋulu a ŋituŋa a?

⁶Ŋakiro ŋun mono iwaritor iyoŋ ayenun adyekaret kaŋ ka iripiripiya ayenun asecit kaŋ

⁷tari kiyeni atemar emam ekaile eyai neni kaŋ ka emam ituŋanan epedori alakun ayoŋ anapedor kon a?

⁸Ŋakan kon apotu okoyeut ka eketiyaut ayoŋ; nai tokona ikiŋoik iyoŋ ayoŋ ka ikimunya ayoŋ.

⁹Totamunite atemar ikiyeuni iyoŋ ayoŋ a ecoto, ido icamit mono iyoŋ tokona akituruwor ayoŋ ŋalup nabo a?

¹⁰Meere mono iyoŋ ikiwuakini ayoŋ nakook a toto kaŋ ka ikiyeu ayoŋ a nen a?

¹¹Ibu torapak neni akiriŋ ka amuny ŋina ka akuwan kaŋ, ibu kiwuanak neni kaŋ ŋakoyo ka ŋamori.

¹²Ikiinak iyoŋ ayoŋ akiyar ka amina ŋina nyiryaŋiryaŋa, ido aiun ayoŋ aŋuna iyokiyo iyoŋ akiyar kaŋ.

¹³Kikote neni daŋ, ayeni ayoŋ atemar iwuait iyoŋ ŋakiro ŋun alotau kon; ayeni ayoŋ atemar arae ŋun icamit iyoŋ akitiyakin.

¹⁴Ani aseci ayoŋ, ikite iyoŋ ayoŋ etiyae ŋun, ido nyikilema ayoŋ aŋuna a adyekaret kaŋ.

¹⁵Ani karae ayoŋ ŋolo aronon, aca kaŋ! ani karae ayoŋ ŋolo eyookino, nyemaikina eturokin, anerae ileleba neni kaŋ amamukau ŋina ka ajokis, ido emaikina iyoŋ Akuj kiŋolik epite ŋolo ayakar ayoŋ locan.

¹⁶Idedŋ iyoŋ ikwa eŋatny ikiwarit ayoŋ, iboŋonokini iyoŋ akican ayoŋ ikimanit.

¹⁷Iyakar iyoŋ a ŋinapaki ŋisuudae ŋulu kitet aŋuna ka aremokin ayoŋ, ido iyata aŋoit kon neni kaŋ jik; iyaununui iyoŋ ŋiketijikinok ŋulu kitet akitijiore ayoŋ.

¹⁸“Kaanukiro ikimyekinia iyoŋ ayoŋ ekedoun? Kerae bo daŋ otwanite eriŋa idiotuŋanan nyiŋolikina ayoŋ,

¹⁹katakan ayoŋ esibit pa kayai nakwap, katakan ayoŋ arae ŋolo aponi okolemun anakook ekewuakin nalyal.

²⁰Nyekudyoko mono ŋirwa a akiyar kaŋ a? Kimyekinae ayoŋ bon, ikotere ayakaunor adiolakara,

²¹eriŋa nyeloto neni nyaboŋunio nabo, nakwap ŋina ka akiyaloloŋ ka ŋina eyai akiryonut ŋinakiryonon cuc,

²²nakwap ŋina ka akiyaloloŋ ka ŋina eyai egurigur, neni emam akica, neni erae akiryonut bon ileleba.”