Read ngakarimojong Yob 12 Bible Online

Yob 12 - ngakarimojong bible

Yob 12

¹Tema nai Yob,

²“Kire, iyes ŋituŋa ŋulu iworosi aŋuna a ŋituŋa a ŋuluce, ido itwanikinete iyes naosou.

³Nai, ayakar ayoŋ daŋ ayenut lopite ŋolo pei eyakar neni kus; nyadit ayoŋ aneni kus. Ŋae nyeyeni ŋakiro ŋuna irworosi iyes?

⁴Aruwor ayoŋ ŋolo akakyenatar ŋikonei kaŋ; ayoŋ ŋolo sek eŋisenene Akuj ekeŋarak, ido abu ekeŋarak ayoŋ ŋolo sek eyookino, ŋolo amam ŋuna eketoroniyaritere, aruwor tokona ŋolo akakyenare.

⁵Ŋituŋa ŋulu iboiyete emam ŋace, ekyenatar ŋulu eyakasi locan, ecamito ikes akicedar ituŋanan ŋini eryamunit ŋican.

⁶Iboiyete ŋikokolak anakais kec a ekisil ka iboiyete ŋulu itoŋoeneneete Akuj emam ŋace, ŋituŋa ŋul ikes ŋulu ituruworito agogoŋu kec akuj ŋina ikinyomito ikes.

⁷“Nai kiŋit ŋityaŋ ikiteyenikis iyoŋ ŋuna ka Akuj, ido ikiteyenikinete ikes iyoŋ; kiŋit ŋikyeny ikiteyenikis iyoŋ ŋuna ka Akuj, ido ikiteyenikinete ikes iyoŋ,

⁸kori kiŋit ŋikito, ikiteyenikis iyoŋ ŋuna ka Akuj, ido ikiteyenikinete ikes iyoŋ, ka kiŋit ŋisubuna ŋulu eya nakipi, ikiteyenikis iyoŋ ŋuna ka Akuj, ido ikiteyenikinetes ikes iyoŋ.

⁹Alu alosubuna a ŋul a daadaŋ, emamukatar ayenut atemar Akuj iŋes eyakatar ikes.

¹⁰Napedor ŋina ka Akuj iŋes eyai akiyar a ŋinibore a daadaŋ a ŋini eyari ka ekieŋanu ŋolo eyaryata ŋituŋa daadaŋ, erae neni ka Akuj ebunitor.

¹¹Nyiiranari mono akit ŋakiro ka toyenu atemar erae ŋuna a kire kori alyokonu, lopoite ŋolo iirya a ŋajep akimuj a?

¹²Ŋulu mono emojoŋito eyakatar aosou make ka eyakatar ayenut aŋuna eboiyoto ŋirwa ŋulu alalak a?

¹³“Akuj eyakar aosou ka agogoŋ, eyakar iŋes ŋuna eŋarakinak alokiŋaren ka ayenut.

¹⁴Ani kinyasu Akuj idiobore, mam ituŋanan iwuakini ibore ŋin nen nabo; ani keya Akuj idiotuŋanan mam ituŋanan elakuni.

¹⁵Ani pa kecamaki Akuj kilim akiru, eoni neni sek eya ŋakipi; ani kecamaki Akuj akiru kilim, eburusiyarete ŋakipi akwap.

¹⁶Eyakar Akuj agogoŋu ka aosou; erae ŋulu keŋ ŋulu emodikinitae ka ŋulu emodyanakinete.

¹⁷Elemari aosou aneni a ŋulu iŋarakinito ekepukan akipuka ejok, ituruwonori ŋikatubok ŋakiro ŋibaŋaanotin.

¹⁸Elemanari Akuj ŋirwosi alokicoloŋo kec a ŋulu ipukatotor, kitanap ikes ŋaraco anacirin.

¹⁹Elemanari iŋes ŋisacaradotin anapolou a ŋina erikitotor ŋituŋa anakilip, elemanari iŋes ŋikagogoŋok tojoŋoto araakau ŋikepukak.

²⁰Isililiŋi Akuj ŋulu ikinyomitae anakirworo, elemanari aneni ŋikasikou aosou ŋina eyeniata ŋuna ajokak ka ŋuna aronok.

²¹Ebukununui Akuj aŋoit keŋ neni a ŋikagogoŋok, elemanari agogoŋu aneni a ŋikagogoŋok.

²²iwuanakini Akuj ajokis nakiboisyo ŋuna eya ŋican ŋulu ikote ŋulu akibois a ŋikatwak, ido isitorununui ajokis naryamunit ŋican.

²³Ituruwonori Akuj ŋakwapin ŋuna egogoŋ, ani ekaku tomunya ikes; enyae iŋes ŋakwapin, ani ekaku kitoŋopiya.

²⁴Elemanari Akuj ayenut aneni a ŋikarikok a ŋituŋa anakwap, kimyek ikes irimito anariet pa eyenete neni itorete.

²⁵Imudumudosi ikes anakiryonut, pa iteete neni itorete; einanakini Akuj ikes akiteritero esibit ŋikamerak.