Read ngakarimojong Yob 13 Bible Online

Yob 13 - ngakarimojong bible

Yob 13

¹“Kiirasi, eŋolik ayoŋ ŋakiro ŋun daadaŋ, eira ayoŋ ŋakiro ŋun ka ayenu ayoŋ ikes.

²Ŋuna iyenete iyes, ayeni ayoŋ daŋ; nyadit ayoŋ aneni kus.

³Nai apedori ayoŋ akirwor neni ka Akuj a ŋina etiron, acamit ayoŋ akirwor ŋakiro kaŋ neni ka Akuj, etoodik iŋes atemar mam ŋakiro ŋuna aronok ŋuna etiyat ayoŋ.

⁴Nai iyes, irworosi ŋakiro ŋuna erae alyokonu itojokasi; ikwaan iyes daadaŋ ka ŋimurok ŋulu erae ŋicaryo.

⁵Okoe, kerae ca topedorete iyes akililiŋ, kitoodiu nen atemar iyakatar iyes aosou.

⁶Kiirasi tokona ŋakiro ŋuna eketepega ayoŋ iyes, topupokisi ŋakiro ŋuna adyekanaror ayoŋ erworo.

⁷Nyo ikiinakinit iyes akirworo alyokonu aŋuna ka Akuj, nyo ikiinakinit iyes akirworo amodiyo aŋuna keŋ?

⁸Ikatakinito mono iyes atemar iyookinit Akuj a? Ipedorete mono iyes akiwo aŋuna ka Akuj aloikiiko a?

⁹Ejokunete mono ŋakiro aneni kus erae ketema Akuj aripiripi ŋakiro kus a? Kori ipedorete mono iyes amodikin iŋes lopite ŋolo emodikinia ituŋanan ŋinice a?

¹⁰Kire jik, ikiŋenyakini iŋes iyes, erae kitoodiunosi anakimunono atemar ipolok akilo Akuj.

¹¹Nyikitubuli mono iyes ailiil keŋ ka nyeyakaun mono akuryanu nooi neni kus ŋina ebunit aneni keŋ a?

¹²Erae ŋakiro kus ŋunaŋorok ŋakitadapeta koŋin, ikwaan ka ekuron, erae ŋakiro ŋuna ikitepegeta iyes ayoŋ ŋacaryo ikwaan ka apuwa.

¹³“Kililiŋa mono iyes, ido erworik ayoŋ, kimyekisi kitiyakin neni kaŋ ŋuna itiyakin.

¹⁴Acamu ayoŋ ŋuna etiyakin nakuwan kaŋ, ewuak ayoŋ akiyar kaŋ napedor kaŋ a elope.

¹⁵Kiirasi akaari ayoŋ Akuj; mam akigeno ayakar ayoŋ, nai alimori ayoŋ alokiŋaren keŋ epite ŋolo etiyator ayoŋ emam asecit.

¹⁶Eruwor ŋakiro ŋun aiuno kaŋ, anerae nyepedori ituŋanan ŋini nyiwuapit ŋakiro ŋuna ka Akuj akiwo alokiŋaren Akuj.

¹⁷Topupokisi ejok ŋakiro kaŋ, kiirasi ejok ŋuna alosi ayoŋ alimokin iyes.

¹⁸Adau ayoŋ akitemokin ŋakiro ŋuna apegar anakisitakino kaŋ, ayeni ayoŋ atemar ekemyekino ayoŋ.

¹⁹Ŋae eyakaun nen ŋini itepegi ŋakiro kaŋ? Ani kasecit ayoŋ, atenit ayoŋ akililiŋ ka atwanare.

²⁰Akuj, inakinae ayoŋ ŋiboro ŋiarei bon, ido nyaŋopi ayoŋ alokiŋaren kon.

²¹Ŋakiro ŋun ikes nu: Tojoŋo akisicanit ayoŋ ka tojoŋo ayaunun akuryanu nooi neni eketubul ayoŋ.

²²Ekaku aŋun, tonyarae ayoŋ, ido akaboŋokini ayoŋ iyoŋ, kori kimyekinae ayoŋ erworik, ido ikiboŋok iyoŋ ayoŋ.

²³Okoe Akuj, ŋaai mono ŋadyakanareta kaŋ ka ŋasecisya kaŋ? kimyekinae ayoŋ oyenu adyakaret ka asecit kaŋ.

²⁴Kaanukiro iwuitor iyoŋ ereet kon ka ikimaritor ayoŋ arae emoit kon?

²⁵Ipedori mono iyoŋ akitukuryan ŋolo ikikwaan ka akuyon ŋina iwokit ekuwuam a? Ipedori mono iyoŋ akiwuapit ayoŋ ŋolo ikikwaan ka amilot ŋina eonit a?

²⁶Anerae igirit iyoŋ ŋakiro ŋuna apipilak ikiremokino ayoŋ, ido ikiteryamu ayoŋ ŋican anakiro aŋuna etiyat ayoŋ anasoroko kaŋ.

²⁷Idau iyoŋ akiroc ŋakejen kaŋ, imitakinit iyoŋ akitere ayoŋ a ŋinapaki isyeme iyoŋ tari ŋikukus a ŋakejen kaŋ.

²⁸Emunaanar ituŋanan lopite ŋolo ebosunia ibore, enyamunun ituŋanan lopite ŋolo enyamunor elou ŋolo enyamit abebe.