Read ngakarimojong Yob 14 Bible Online

Yob 14 - ngakarimojong bible

Yob 14

¹“Erae ŋituŋa daadaŋ ŋikidouno anaberu; euruwuaka ŋirwa a akiyar kec ka elalak ŋican kec.

²Euruunio ituŋanan ibus ikoni aturot, ido toiniya ikwa aturot, ekeri akiyar a ituŋanan ikwa etolim, ido nyerubakini eyari.

³Imitakinit mono iyoŋ Akuj akitere ayoŋ a? ikiyai mono iyoŋ ayoŋ loikiiko, ido itotubok ayoŋ a?

⁴Ŋae epedori alemun ibore ŋini asegan anibore a ŋini nyeseg? Mam ŋini epedori.

⁵Aŋuna etubunitere ŋirwa ŋulu a akiyar a ituŋanan ka aŋuna iyenia iyoŋ ŋilapyo ŋulu ka akiyar a ituŋanan ka aŋuna iwuakinia iyoŋ neni isalakini ituŋanan,

⁶kimyek ŋituŋa bon, ido toesik akisicanit ikes, ikotere ikes eryamunete alakara alorwa kec ikwa ŋiketiyak.

⁷“Eyai akigeno lokitoe, erae keyepar, akigeno keŋ iŋes atemar ijojouni iŋes ka nyedaun jik ŋaten keŋ ŋuna ijojounete.

⁸Tari kemojoŋa ŋataagor a ekitoe a ŋol alokwap ka kebosiya atorom keŋ analup,

⁹nai ani elelekinete ŋakipi nen, ijojouni ekitoe ŋol toyakaun ŋaten ikwa ekitoe ŋolo keriŋa erupuni.

¹⁰Nai etwaneneete ŋituŋa, ido tobokakinae kwap; emojoŋeneneete ŋituŋa, ido ai eyakasi ŋulu a ekiŋaren?

¹¹Lopite ŋolo ijuwaryata ŋakipi ananam ka lopite ŋolo ijuwaryata ŋakipi anaŋolol toono a ŋolol,

¹²ituŋanan daŋ ebokakinio kwap nyetakanu nabo; akitodol ŋina edaunor kidiama, nyeyarunete jik ŋulu atwaka, kori nyitonyounio ikes jik anajo kec.

¹³Okoe kerae ca ikiwua iyoŋ ayoŋ anakibois a ŋikatwak, kerae ca ikililiŋiya iyoŋ ayoŋ a nen akitodol ŋina edaunor anyunyura kon, kerae ca kiwuakinite iyoŋ ŋirwa ŋulu ayakar ayoŋ nakibois a ŋikatwak, ido nai totamu atemar ekedarit ayoŋ iyoŋ a nen.

¹⁴Ikwapei etwakeneniata ŋituŋa, eyarunete mono ikes nabo a? Edaruni ayoŋ ikwapei emaikina edarunia, akitodol ŋina ebunio idio okolaku ayoŋ.

¹⁵Ipedori iyoŋ anyarare ayoŋ, ido akaboŋokini ayoŋ iyoŋ; ikiburakini iyoŋ akiŋolikin esubuna kon.

¹⁶Ekaku ikiyoki nai iyoŋ ayoŋ, nyimitakini iyoŋ ŋasecisya kaŋ.

¹⁷Isyoni nai iyoŋ ŋasecisya kaŋ ikimuryakis iyoŋ jik, iwuai iyoŋ ŋadyakanareta kaŋ.

¹⁸“Nai ŋimoru daŋ eritanakin kwap topuripuryaar, tojoŋoto ŋatabab ayakau neni sek aya.

¹⁹Ecakununeete ŋakipi ŋamoru, tonyamun ikokoriun kwap, iwokeneneete ŋakalele ŋalup; aŋun, ilemanari iyoŋ akigeno a ŋituŋa.

²⁰Ilouni iyoŋ ŋituŋa ŋikaru ka ŋikaru ka iritari ikes, ido totwaka; iinanakini iyoŋ ikes ŋireetin ŋulu eŋotor eapuuni akiridakin; ido toar.

²¹Eryamununete ŋidwe a ŋikatwak a ŋul apolou, nai nyeyenete ŋikauruunak kec ŋun; tari kelemar ŋidwe ŋul anapolou, nyeyenete ŋikauruunak kec ŋun.

²²Aryeba ŋina a ŋawat kec bon enomorit ikes, ido igworosi ikes aŋuna a ŋawat kec.”