Read ngakarimojong Yob 16 Bible Online

Yob 16 - ngakarimojong bible

Yob 16

¹Kedau Elipas erwor toboŋok Yob tema,

²“Eirarit sek ayoŋ kaŋorot ŋakiro ŋuna alalak ŋuna ikote ŋun; Irae iyes daadaŋ ŋikesirworok ŋulu acakarak.

³Irubakinete mono iyes jik irworosi ŋakiro kus ŋuna ecaryooko ŋun tari ori? Kori nyo mono ikiinakinit iyoŋ Elipas akirworo ŋakiro ŋun jik?

⁴Emaikina ayoŋ daŋ erworik ikwapei irworor iyoŋ; ani kerae toyakas iyes lopite ŋolo ayakar ayoŋ, kerwor ayoŋ ŋakiro ŋuna alalak etoropiunit akaremokino iyes, kemuŋumuŋu akou kaŋ aŋuna kus.

⁵Kekesirworiu ayoŋ iyes a ŋakiro a ŋuna alimuni, kekemaima ayoŋ iyoŋ a ŋakiro a ŋuna alimuni, toŋopiya aryeba kon.

⁶“Ani kerwor ayoŋ, nyelemar aryebo kaŋ, ido ani kedaŋidaŋ ekililiŋat, eyai mono aryebo elemar aneni kaŋ a?

⁷Kire tokona adau Akuj akitapapanun ayoŋ; adau Akuj amunyar ŋituŋa a ekal kaŋ daadaŋ.

⁸Adau Akuj akiroc ayoŋ ka erae ŋin akitoodiunet ŋina ekemanitere ayoŋ; etoodiu ekikaranu kaŋ atemar ekemanitae ayoŋ, erae nen daŋ ete ayoŋ esuuda aneni kaŋ atemar ekemanit ayoŋ Akuj.

⁹Eketapapanu ayoŋ Akuj ananyunyura keŋ, ido akaremokin ayoŋ; etoodiu aŋoit keŋ neni kaŋ; eketeete ayoŋ ŋimoe kaŋ neni aronon.

¹⁰Akaŋaamikin ikes ayoŋ akajutuyanarete; ekebapabapata ikes ayoŋ lokeli aŋuna akajamuwaritotor; ipopoonorosi ikes aŋuna ekemanitotor ayoŋ.

¹¹Akainaki ayoŋ Akuj neni a ŋituŋa a ŋulu nyiwuapito ŋuna ka Akuj, ekewuak iŋes ayoŋ napedor a ŋituŋa a ŋulu aronok.

¹²Eboi sek ayoŋ emam ŋace, nai eketeryamu ayoŋ Akuj ŋican; ekekamu iŋes ayoŋ esibit ecamit akijulumiyar alomosiriŋ; ekewuak iŋes ayoŋ esibit ibore ŋini ecamit iŋes akipim a ekaleŋeleŋet.

¹³ekerikaunito ayoŋ ŋituŋa keŋ ŋulu erae ŋikagumak a ŋikaleŋeleŋe. Akagum iŋes ayoŋ a ŋikaleŋeleŋe loŋalur emam akisyon, ido abukoki iŋes apid alomany kaŋ nalup.

¹⁴Erubakinit Akuj eboŋonokini awanawana ayoŋ; ipumunun iŋes neni kaŋ lopite ŋolo ipumakinor ekajion ŋinice.

¹⁵Anapit ayoŋ ŋilowi ŋulu kigworet, adaun agogoŋu kaŋ jik, aruwor ekeboiyon anapuwa.

¹⁶Aseca ereet kaŋ aŋuna ka akigworo, areŋiata ŋakonyen kaŋ nyeriŋa ete ejok,

¹⁷nai emam ŋakiro ŋuna aronok ŋuna etiyat ayoŋ ka etopoloorit ayoŋ Akuj anakilip kaŋ.

¹⁸“Okoe ikikwaanikin ayoŋ ka ituŋanan ŋini adaun akiar, nyemaikina kimunoniyarae ŋun; nyemaikina ituŋanan idio ekesililiŋ ayoŋ aŋuna ka akiŋita akiyookino.

¹⁹Kiirasi, tari tokona, eyai esuuda kaŋ nakuj, ee, ebuni esuuda kaŋ ŋolo eyai nakuj akirwor aŋuna kaŋ ka atemar eyookino ayoŋ.

²⁰Akajamuwarito ayoŋ ŋikonei kaŋ; ebwaliyasi ŋakiyo ŋakonyen kaŋ adyekit Akuj ekeŋarak ayoŋ.

²¹Okoe kerae ca toyai ituŋanan ŋini edyeki Akuj aŋuna a ituŋanan, lopite ŋolo edyekanaror ituŋanan aŋuna a ekidunyet keŋ,

²²Kelunyar ŋikaru ŋidikudyo, alosi ayoŋ neni nyaboŋunio nabo.”