Read ngakarimojong Yob 17 Bible Online

Yob 17 - ngakarimojong bible

Yob 17

¹“Nyeriŋa ayoŋ eeŋa ejok aapuu akiyar kaŋ adaun, etenit akipany aŋuna kaŋ.

²Kire jik, eyakasi nawae kaŋ ŋulu akajamuwarito ayoŋ, ka ete ayoŋ ikes ededeŋ ecamito akitijikin ayoŋ.

³“Okoe Akuj, toruwor ekalakunan ayoŋ anakitac ibore idio ŋini alakunor ayoŋ; ŋae ituŋanan ice epedori akitac ibore idio aŋuna ka alakun ayoŋ?

⁴Aŋuna igolokinio iyoŋ ŋatameta kec ikotere nyeyenut, aŋun nyicamakini iyoŋ ikes toruwor ŋikelounak.

⁵Ŋituŋa ŋulu esyomatar ŋikonei kec aŋuna ka aryamunia ibore idio, eryamunete ŋidwe kec ŋican aŋuna aŋakiro aŋuna etiyato ŋikauruunak kec.

⁶“Eketuruwo Akuj ayoŋ ŋolo ekerworotor ŋituŋa, aruwor ayoŋ ŋolo ekemwanarete ŋituŋa.

⁷Amuumu ŋakonyen kaŋ aŋuna ka akiyaloloŋ, adiimyata ŋakan ka ŋakejen kaŋ ekwaanikin ka ŋalelei.

⁸Ebulit ŋituŋa ŋulu iyookino iŋolikinete epite ŋolo ayakar ayoŋ, akyenatar ŋituŋa ŋulu nyiwuapito ŋuna ka Akuj ŋituŋa ŋulu emam ŋuna eyenete.

⁹Nai erubakinito ŋituŋa ŋulu iyookino imiidikina nakiyookino kec ka ikes ŋulu emam aronis itiyato, erubakinit akikinyomit kec Akuj iata jik.

¹⁰Nai iyes, toloto toboŋut nabo daadaŋ, nyaryamuni ayoŋ tari ipei alokidiŋ kus ŋini irworo ŋuna ka aosou.

¹¹“Adaun ŋirwa kaŋ, amunaar ŋakiro ŋuna ayeunit ayoŋ amunaar ŋakiro ŋuna acamit ayoŋ alotau kaŋ akitiya.

¹²Eturuwosi ŋikonei kaŋ akuwar apaaran. ebasi ikes, ‘Apauu iyoŋ akieŋar ŋican’ ka ebasi, ‘Aapuu iyoŋ ajokun, eketeete bo ikes ayoŋ aryamunit ŋican.’

¹³ani kewar ayoŋ alosit nakibois a ŋikatwak ikwapei akibois kaŋ, ani katamak ayoŋ apetakin ibore ŋini aperyo nakibois ŋina a ŋican ŋin,

¹⁴ani katema ayoŋ neni ka akipany ebe, ‘Irae iyoŋ papa kaŋ,’ ido ani katema ayoŋ neni a ekurut ebe, ‘Irae iyoŋ toto kaŋ, kori nakaato kaŋ,’

¹⁵Ai nai eyai akigeno kaŋ? Ŋae eyenuni neni eyai akigeno kaŋ?

¹⁶Elomari mono ibore daadaŋ ŋini egeno ayoŋ togolokin nakibois a ŋikatwak a? Elomaryo mono isua daadaŋ nalup a?”