Read ngakarimojong Yob 19 Bible Online

Yob 19 - ngakarimojong bible

Yob 19

¹Toboŋok nai Yob ŋakiro a Bilidad tema,

²“Apaki ŋina etya ai iyaete iyes ikisicanito ayoŋ ka ikimunaarito a ŋakiro kus a ŋun?

³Ŋarwatin tokona ŋatomon ikisitakinito iyes ayoŋ; nyikirumito mono iyes ŋileec akiteryamun ayoŋ ŋican anakiro kus a?

⁴Tari kerae kire atemar adyekarit ayoŋ, erae adyekaret kaŋ nakou kaŋ.

⁵Ani kire kitopolooro iyes aŋuna ka aremokin ayoŋ, ido ani kituruworito ŋican kaŋ ŋulu ikitepegeta ayoŋ ikiremokino,

⁶toyenutu atemar Akuj ekewuak ayoŋ locan lu, iŋes akagoloki ayoŋ tooma atibae.

⁷Tari kegwor ayoŋ eoroe abala, ‘Toiunae!’ Mam ŋini ebuni aiun; tari kanyaraanar ayoŋ acela, mam ŋini itiyae ŋuna iyookino aŋuna kaŋ.

⁸Agoloki Akuj erot kaŋ, ikotere edaun ayoŋ neni etori, ewuak Akuj akiryonut neni sek emaikina ayoŋ oiunor.

⁹Alema Akuj aneni kaŋ abaru ŋina sek ikiyakar ayoŋ, alema Akuj aneni kaŋ akitopoloorit ŋina sek eketopolooritotor ŋituŋa ayoŋ.

¹⁰Ekeimimaa Akuj ayoŋ alopitesyo a daadaŋ, ido apapanu ayoŋ, aruto Akuj aneni kaŋ akigeno kaŋ lopite ŋolo erutorere ekitoe.

¹¹Etirirau Akuj anyunyura keŋ aneni kaŋ aŋuna akaremokinor ayoŋ, ekemarak iŋes ayoŋ arae emoit keŋ.

¹²Eyakuu Akuj ŋasigarya keŋ kaapei akitijikin ayoŋ, ekerikaut ayoŋ ŋun etenito akitijikin.

¹³“Eteeka Akuj ŋituŋa a ekal kaŋ aneni kaŋ, ido aruwor ŋituŋa daadaŋ ŋulu sek akayenete ayoŋ ŋigelaanotin aneni kaŋ.

¹⁴Akaesikis ayoŋ ŋiyeneta kaŋ ka ŋikonei kaŋ ŋulu sek ikirukitor;

¹⁵nyeriŋa ŋipeyok ŋulu sek ekepeyononokinete ayoŋ akamisito ayoŋ; aruwor ayoŋ egelaanot aneni a ŋaketiyak kaŋ; eketeete ikes ayoŋ arae egelaanot.

¹⁶Ani anyarae eketiyan kaŋ, nyakaboŋokini iŋes ayoŋ; aruwor adyekanar emaikina ayoŋ odyekanar aneni keŋ.

¹⁷Abosyar ekieŋanu kaŋ aneni ka aberu kaŋ, akaluŋa ayoŋ ŋituŋa a ekal kaŋ.

¹⁸Akajamuwasi ayoŋ tari ŋidwe ŋulu cicik; ani anyouni ayoŋ, kisyakis akirworor ayoŋ.

¹⁹Akaŋero ayoŋ ŋikonei kaŋ ŋuluminan, akaremokin ayoŋ ŋituŋa ŋulu sek amina ayoŋ nooi.

²⁰Aoniki amuny ŋina ka akuwan kaŋ nakoyo kaŋ ka aoniki akiriŋ ŋina ka akuwan kaŋ namuny akuwan kaŋ, eapi ayoŋ atwanare, idoŋit iwadio ca.

²¹Okoe ŋikonei kaŋ, kisyoni ayoŋ, kisyoni ayoŋ, anerae ekesican Akuj ayoŋ anapedor keŋ!

²²Kaanukiro ikimasikinitotor iyes ayoŋ lopite ŋolo akamasikinitor Akuj ayoŋ? Kaanukiro irubakinitotor iyes irworosi neni kaŋ ŋakiro ŋuna aronok?

²³“Okoe, kerae ca kigir ituŋanan ŋakiro kaŋ! Okoe kerae ca kigir ituŋanan ŋakiro kaŋ lokitaabo!

²⁴“Okoe kerae ca kiciek ituŋanan ŋakiro kaŋ a amoru nataaba! Okoe kerae ca kiciekinae ikes nataaba kidoŋo eyakasi nen ŋikaru ka ŋikaru!

²⁵“Anerae ayeni ayoŋ atemar eyari ekalakunan kaŋ ka ayeni ayoŋ atemar apaki ŋina esidyon ebuni iŋes nakwap akitub ŋakiro kaŋ akaikinit ayoŋ.

²⁶ido tari kemunaunit edeke amuny a akuwan kaŋ, eŋolikini ayoŋ Akuj eriŋa ayakar ekuwane lo,

²⁷eŋolikini ayoŋ iŋes erae ŋina ikiriit ka ayoŋ, eŋolikini ayoŋ iŋes pa egelaana aneni kaŋ, tari kapapanunit anakiyar kaŋ.

²⁸Ipedorete iyes alimun ebe, ‘Alipite ikiteryamunia iwon iŋes ŋican nooi? Iŋes elope eyaunit ŋican nakuwan keŋ’;

²⁹tokerito aaro a ekileŋ, anerae ebuneeneaaro a ekileŋ ananyunyura a ŋina ka Akuj, ikotere iyes iyeunete atemar eyai atubokinio.”