Read ngakarimojong Yob 24 Bible Online

Yob 24 - ngakarimojong bible

Yob 24

¹“Kirworik nai Yob tema, Kaanukiro nyiwuakinitor Akuj ŋina etiron apaki ŋina etubio ŋakiro a ŋituŋa? Kaanukiro nyiteoto ŋulu eyenete Akuj ŋirwa ŋul?

²Isiyotonorete ŋituŋa ŋulu aronok ŋiboorei ŋulu ipimitere ŋikukorin, ekokoyete ŋamesekin ido iyokiyete esibit ŋuna kec.

³Eramanarete ŋisigirya a ŋikokyok; ekodeneneete emoŋ a apuserut aŋuna a ibore a ŋini eikinitae ikes.

⁴Ijukanarete alorot ŋulu eyakatar akiitanit; einakinito ikes ŋikulyak daadaŋ anakwap akiŋop aŋuna kec.

⁵Lopite ŋolo ipasatotor ŋitukoi analoŋisat, eloseneneete ŋikulyak akipas nariet akiwarit akimuj; isyokanakinete ikes nariet akiwarit akimuj ka ani eboŋ, kiwarasi akimuj adio ŋina einakinete neni a ŋidwe kec.

⁶Elemete ikes ŋamanat ŋuna nyerae ŋuna kec, isokataete ikes ŋaraito a epiini anamanat a ŋikaronok.

⁷Eperete ŋikulyak akuwar kya elerete emam ŋilowi, emam ibore imukotor ikes elilimuni.

⁸Etepi ikes akiru ŋina a ŋimoru, ido edapanakin ikes natabab iwarito neni emecete.

⁹(Eyakasi ŋikaronok ŋulu elemanarete ŋikokyok aneni ata toto kec itanakio, ido eyaanarete ŋiŋwea a ŋulu a ŋican atacakin nibore ŋini eikinitae ikes.)

¹⁰Irimito ŋikulyak elerete emam ŋilowi, eminasi ikes akiwokit ŋaeneta a ŋikinyom enyamit akoro.

¹¹Ecuyete ŋikulyak akimyet anaraito ka Olipa alokidiŋ ŋikito ŋulu eya neni iboiyoto ikes, ecuyete ikes epiini anaraito a epiini ipudaete, nai erubakinit akure enyamit ikes.

¹²Eumenete alotaun ŋulu iridete iworoete ŋulu ewanana ecamito akiŋarakino; nai nyemisit Akuj akiirar akilip kec.

¹³“Eyakasi ŋituŋa ŋulu eŋerito ŋakiro ŋuna ka akica ŋulu nyeyenikinito akiwuapit ŋuna ebala Akuj kiwuapa ka ŋulu nyepedorito arubakin iwuapito ŋuna Akuj.

¹⁴Enyoununeete ŋikaarak apaki ŋina iryonunia akwap daadaŋ aŋuna ka akiar ikulyakit ka ŋini a ŋican, elosete ikes nakwaare ikwapei ŋikokolak.

¹⁵Ŋikalomak daŋ, idarununeete apaki ŋina edoiyorya akoloŋ, ebasi ikes, ‘Emam ituŋanan ikiŋolikini’; ido epedori ikaloman akimukor ereet keŋ nyeyeni iŋes.

¹⁶Epedepedeete ŋikokolak ŋarwatatain a ŋakais nakwaare, ani naparan togolokinos neni eŋopyata; nyeyenete ikes akica ŋina ka apaaran.

¹⁷Erae akiryonut cuc aneni kec a daadaŋ ataparacu; anerae nyeriŋa ikes ebulenene iryoniar akwap.

¹⁸“Sopar, irworo iyoŋ ebe, ‘Iwokonorete ŋakipi atipei ŋulu itiyaete aronis, icenit Akuj neni iboiyoto ikes, mam eketiyan eapiyari lomanikorin kec ŋulu ke epiini.

¹⁹Ikwaŋina eŋopiyaryata ŋakako emwanuni akwap, itoŋopiyari akibois a ŋikatwak ŋikasecak.

²⁰imuryakin ikes tari aneni a ŋini kidouni ikes, ebobokini ŋikur akinyam ŋawat kec; nyerubakinio etamunitae ikes, aŋun, itoŋopiyaryo aronis ikwa ekitoe.’

²¹“Isicanito ŋikaronok ŋaberu ŋuna nyidoete, emam ŋuna ajokak ŋuna itiyaete ikes neni ka apuserut.

²²Nai kikote neni daŋ, elemanari Akuj anapedor keŋ akiyar a ŋulu etirok; epedorete ikes akiturokin, nai emamukatar neni eyarikinito aŋuna ka akiyar kec.

²³Einanakini Akuj ikes akiboi emam ŋace, ido iŋarakinitae ikes; nai ite Akuj ŋuna itiyaete ikes.

²⁴Itopoloonoryo ŋikaronok apaki ŋina euruwuana, ido toŋopiyasi atipei; epuripuryaar apolou kec towiyo, lopite ŋolo elemere ŋakyes a ŋikinyom.

²⁵Ani pa kikote ŋakiro neni, ŋae elimuni atemar erae ŋakiro ŋuna erworo ayoŋ alyokonu, ka alimun atemar emam apolou eyai nakiro ŋuna erworo ayoŋ?”