Read ngakarimojong Yob 3 Bible Online

Yob 3 - ngakarimojong bible

Yob 3

¹Ekaku a akililiŋ a ŋin, togeik Yob akirworo kicen akoloŋit ŋina edounere iŋes.

³“Elipi tojoŋoi atamunit akoloŋit ŋina ekedounere ayoŋ ka tojoŋoi atamunit akuwar ŋina akapotiunere ayoŋ.”

⁴Emaikina akoloŋit ŋin erae ŋina ka akiryonut, elipi nyetamu nabo jik Akuj akoloŋit ŋin, kori nyebu akica akoloŋit ŋin.

⁵Elipi toruwor akoloŋit ŋin ŋina ka akiyaloloŋ ka ŋina iryonia akwap cuc, elipi torapuwasi ŋidouwon akwap akoloŋit ŋin; elipi toyakaun akiryonut ŋina etubulon akoloŋit ŋin.

⁶Elipi torebuwa akiryonut ŋinakiryonon cuc akuwar ŋin, nyemaikina alelyanu adio eyakaun akoloŋit ŋin, lopite ŋolo eyakar ŋirwa a ekaru ŋuluce; elipi akuwar ŋin nyeyakaun lorwa ŋulu a ŋalipyo.

⁷Ee, elipi nyepotiun ikoku idio akuwar ŋin, elipi nyirar etoil ŋolo ka alelyanu ŋolo igworor ikoku ŋini idounio akoloŋit ŋin.

⁸Elipi kiceno ŋulu icenete anam akuwar ŋin, kiceno iŋes ŋikekukujak ŋulu eyenete emun ŋolo enyaritae Lepiasan.

⁹Elipi kiryoketa ŋitopon ŋulu a akiwalaret akuwar a ŋin, ido kiitan akuwar ŋin atemar kerae toryamu akica, nai mam ŋina eryamuni, elipi nyetakanut akuwar ŋin ŋikoi a koloŋ ŋulu iwalarya,

¹⁰anerae abu akuwar ŋin nyegol akook atoto kaŋ ka nyekewua ayoŋ nyeŋolik ŋican.

¹¹“Kaanukiro pa atwania ayoŋ apaki ŋina ekedounere? kaanukiro pa asalunia ayoŋ apaki ŋinapei alomunia anakook?

¹²Kaanukiro aponiata ŋakesidook toryedikioto akigagaun ayoŋ, kori kaanukiro aponiata ŋakile toyakaun lokisin ŋulu anaki ayoŋ?

¹³Kaperi ca tokona ayoŋ analyal atakina cek, kaperi ca tokona ayoŋ pa ayeni ŋadi; ido keeŋunit,

¹⁴kaperi kaapei ka ŋirwosi ta ŋulu epukato ka ikes akwap, ŋituŋa ŋulu apotu toduko nabo ŋakiboisyo ŋuna sek amunaara kituruwosi ŋuna kec,

¹⁵kori kaperi ca tokona ayoŋ ka ŋirwosi ŋulu ayakatar egolid, ŋulu elelebito ŋakais kec a esilipa.

¹⁶Kori kaanukiro pa akanukere ayoŋ arae ikoku ŋini iyecunitae, ikwa iŋiwe ŋini etwani nyiŋolikina akica.

¹⁷Ejoŋoete ŋikaronok ayaunit ŋican elomarete nalyalin, ieŋunete ŋulu eupit akitiya.

¹⁸Ieŋunito kaapei analyalin ŋituŋa daadaŋ ŋulu sek erae ŋienan; nyiiranarete ikes a nen ŋitoilon a ŋulu sek areikinito ikes akitiya.

¹⁹Eyakasi nalyalin ŋicaryonotin kaapei ka ŋikarwok, ido nyepolokinito ŋikapolok ŋipi kec a nen.

²⁰“Kaanukiro isiŋolikinere ituŋanan ŋini eryamunit ŋican akica kaanukiro einakinere akiyar neni a ituŋanan a ŋini iyaloloŋi a ŋinapaki,

²¹a ŋini iitanit atemar kerae otwan, nai nyitiyakin ŋun ka a ŋini iwarit nooi epite ŋolotwanet akilo tari neni iwaritere ebari?

²²Elelyani ituŋanan ŋin apaki ŋina e apuunia atwanare neni keŋ ka elakar apaki ŋina iridakinia.

²³Kaanukiro isiŋolikinere akica neni a ituŋanan a ŋini nyepedorit aryamun epite ŋoloyaret, a ituŋanan a ŋini agolo Akuj aneni keŋ epite ŋoloyaret?

²⁴Anerae akisuta kaŋ akimuj kaŋ, eropiunit aumen aneni kaŋ lopite ŋolo eropiyoto ŋakipi.

²⁵Kire jik, etiyakin neni kaŋ ŋakiro ŋuna akerit ayoŋ nyitiyakin neni kaŋ ka ŋuna eketukuryanete ayoŋ nooi, akadolokis ayoŋ.

²⁶Akakadakinit ayoŋ, mam alakara eyai neni kaŋ, mam akieŋun aryamunit ayoŋ; nai ŋican bon eropiunito neni kaŋ.”