Read ngakarimojong Yob 32 Bible Online

Yob 32 - ngakarimojong bible

Yob 32

¹Aŋun, apotu ŋikilyok ŋuluuni ŋul tojoŋoto aboŋonokin Yob ŋakiro, anerae arae Yob ituŋanan ŋini eyookino anatameta keŋ.

²Abu nai Eliu lokoku a Barakel a ŋolo anateker a Bus a ŋolo alokal a Ram toŋo. Abu iŋes toŋoik Yob, anerae abu kitogogoŋ erwor itojoka iŋes bon akilo tari akitojokit Akuj.

³Aŋoit daŋ iŋes aŋuna a ŋikonei a Yob a ŋuluuni, anerae apotu ikes nyiyookis ŋakiro ŋuna aboŋonokinete ikes Yob, tari daŋ ŋina alimunitotor ikes atemar edyakarit Yob.

⁴Sek ekiŋaren, eliliŋi Eliu, edarit akisirworikin Yob, anerae adit iŋes aneni a ŋikonei a Yob.

⁵Ani eyenuni Eliu atemar nyeboŋokino ŋikilyok ŋuluuni ŋul ŋakiro ejok, abu iŋes toŋo.

⁶Toboŋok Eliu lokoku a Barakel a ŋolo anateker a Bus ŋakiro tema, “Adit ayoŋ, ido imojoŋito iyes; aŋun, abu ayoŋ okuryaniar ka abu okobul alimokin iyes ŋuna atami ayoŋ.

⁷Abu ayoŋ otamak alotau kaŋ bon ebe, ‘Emyekini ŋikasikou kirworo, emyekini ŋulu elalak ŋikaru kec akitatam ŋuna ka aosou.’

⁸Nai erae etau ŋolo ka Akuj ŋolo eyai neni a ituŋanan, erae ekieŋanu ŋolo ka Akuj a ŋina etiron ikiini ayenun ŋakiro.

⁹Meere ŋikasikou eosok, kori meere ŋulu elalak ŋikaru eyenete ŋuna iyookino.

¹⁰Aŋun, abala ayoŋ, ‘Topupokisi ŋakiro kaŋ; kimyekinae olimu ayoŋ daŋ ŋuna eya lotau kaŋ.’

¹¹“Kiirasi, abu ayoŋ ekedar iyes kirikakis akirworo ŋakiro kus, abu ayoŋ opupok ŋakiro ŋuna ka aosou ŋuna irworosi iyes apaki ŋina iwaritotor ŋuna ilimunete.

¹²Abu ayoŋ opupok ejok ŋuna irworosi iyes, nai kire, mam ipei daŋ ŋini abu kitocamu Yob ŋakiro, mam ipei daŋ alokidiŋ kus ŋini abu toboŋok ejok ŋakiro ŋuna erworo Yob.

¹³Aŋun, nyemaikina iyes temasi, ‘Ikiryamu isua aosou; emaikina Akuj kilou Yob meere ituŋanan.’

¹⁴Emam nyirworo Yob ŋakiro keŋ neni kaŋ, ido nyaboŋokini ayoŋ ŋakiro keŋ alopite a ŋolo iboŋokinito iyes.

¹⁵“Akadaki ikes, emam aboŋokinet ace eyakatar, adaun ŋakiro elimunete;

¹⁶Idio emaikina mono ayoŋ edar ikes, aŋuna nyirworotor ka aŋuna ewuatar a nen emam ŋakiro eboŋokinete a?

¹⁷Ayoŋ daŋ aboŋokini ŋuna ikiyakar; ayoŋ daŋ alimuni ŋuna atami;

¹⁸anerae elalak ŋakiro aneni kaŋ; nyapedori ayoŋ akidaŋidaŋ akililiŋiyar ŋuna eya lotau kaŋ.

¹⁹Kiirasi, ekwaanikin ŋakiro ileleba lotau kaŋ ka epiini ŋolo ibuusikinit anibore a ŋini nyepeded, ekwaanikin ikes ka ibore ŋini eapi epiini akituduwokin.

²⁰Emaikina ayoŋ erworik, ikotere tojoŋoto ŋakiro akitibitib etau.

²¹Alimuni ayoŋ ŋakiro pa ariit neni a idiotuŋanan, kori nyerwori ayoŋ ajamuwarit idio,

²²anerae nyayeni ayoŋ ajamuwanar ŋuluce, ido ani kajamuwa, eketasaluni ayoŋ ekasuban kaŋ atipei.”