Read ngakarimojong Yob 33 Bible Online

Yob 33 - ngakarimojong bible

Yob 33

¹Tema nai Eliu “Okoe Yob, kiira tokona ŋuna alimuni ayoŋ, topupok ŋakiro kaŋ daadaŋ.

²Kiŋolik, ageu tokona ayoŋ akirworo, ageu aŋajep kaŋ akirworo.

³Elimorito ŋakiro kaŋ akiyookino ŋina eyai lotau kaŋ, ido ŋuna ayeni ayoŋ, ikes alosi ayoŋ alimun erae ŋuna a kire.

⁴Erae etau ŋolo ka Akuj iŋes ayakar ayoŋ arae ituŋanan, ekieŋanu ŋolo ka Akuj a ŋina etiron iŋes akainakinit ayoŋ akiyar.

⁵Toboŋokinoe ayoŋ erae kipedori, kisibakiyana ŋakiro kon ejok; towo itenit alokiŋaren kaŋ.

⁶Kiira, ikiriyan iwon daadaŋ alokiŋaren Akuj; ayoŋ daŋ akayeunio a ecoto.

⁷Mam akuryanu adio daŋ emaikina iyoŋ iyakar aŋuna kaŋ; nyemaikina ayakau kaŋ ne ikitubul iyoŋ.

⁸“Kire jik, idau iyoŋ akirworo ŋakiro apupi ayoŋ, adau ayoŋ akiirar ŋuna ilimu iyoŋ.

⁹Ilimu iyoŋ ebe, ‘Emam ŋuna eketoroniyaritere ayoŋ, emam ekisil abilit ayoŋ;

¹⁰nai eryamununui Akuj aneni kaŋ ŋakiro ŋunakisicanet ayoŋ, ido ekemanit ayoŋ arae emoit keŋ;

¹¹eenikinit iŋes ŋiriko nakejen kaŋ, ite iŋes neni daadaŋ etori ayoŋ.’

¹²“Nai nyiyookinit iyoŋ anakiro a ŋun, Akaboŋokini ayoŋ iyoŋ; epol Akuj akilo ŋinituŋanan daadaŋ.

¹³Kaanukiro itepegia iyoŋ Akuj? Irworo iyoŋ ebe, ‘Emam ŋakiro daŋ eboŋokini Akuj.’

¹⁴Epedori Akuj alimun ŋakiro alorot a ŋolo esyaunan ka a ŋolo a ŋiarei tari kemam ituŋanan ecamit ayenun ŋuna irworo iŋes.

¹⁵“Erae apaki ŋina irujaa ituŋanan, apaki ŋina iteo ŋitorubei irujae, apaki ŋina etikokinotor ŋajo lotuŋa ka apaki ŋina ilurakinor ituŋanan,

¹⁶ŋapakio ŋun ikes eŋaarya Akuj ŋaki a ŋituŋa, ido tolimok ikes ŋakiro ŋuna etubulok ŋuna nyecamit ŋituŋa kiwuapa;

¹⁷ikotere nai Akuj iteesikini ŋituŋa akitiya aronis, kitojoŋo ikes akituro,

¹⁸toiu akiyar kec nyelomasi nakibois ŋina a ŋikatwak ka toiunos anatwanare.

¹⁹“Itatami Akuj ŋituŋa ŋice anainakin aryeba alokitaadae kec, kiwuak aryeba ŋina nyedaunun nakoyo kec,

²⁰ikotere eŋeryoto ikes akimuj ka tomamukaun ekibure ŋolo ka akimuj aneni kec.

²¹Emunaun nai ŋawat kec tojoŋoi akitere erae ŋuna ajokak, ileereunete ŋakoyo anawat kec ŋuna sek pa atakanete.

²²Eapiyari akiyar kec nakibois a ŋikatwak eapiyari akiyar kec neni a ŋulu earete ŋituŋa ŋuluce.

²³Ani nai kebu neni a ipei emalaika ekesirworiunan epei alotooma ŋulu erae aliput, ŋolo elimori atemar iyookino ituŋanan,

²⁴ido torimaaniar emalaika ŋol aneni a ituŋanan tema, ‘Toiu kare ca iŋes nyeloma nakibois a ŋikatwak, adau ayoŋ aryamun ibore ŋini elakunia iŋes akiyar keŋ,

²⁵emaikina akuwan keŋ kikwaanikin ka epite ŋolo ayakar esorokana iŋes, emaikina iŋes toboŋo kikok neni ayakar esorokana egogoŋ.’

²⁶Ani nai kilip iŋes neni ka Akuj, ido tocamu Akuj akilip keŋ, bu nai iŋes neni ka Akuj alotooma alelyanu, ido kinyakak Akuj iŋes akiyookino daadaŋ lopite ŋolo ayakar ekiŋaren;

²⁷eikini ituŋanan ŋin iŋes alokiŋaren ŋituŋa ebe, ‘Abu ayoŋ osec ka oŋer akitiya ŋuna iyookino, nai nyisicana Akuj ayoŋ aŋuna abu ayoŋ etiya.

²⁸Alaku iŋes akiyar kaŋ anakibois a ŋikatwak, ido eŋolikini ayoŋ anakiyar kaŋ akica.’

²⁹Kire, itiyae Akuj ŋakiro ŋun daadaŋ, ŋarwa ŋaarei, kori ŋauni neni a ŋituŋa,

³⁰aŋuna ka akinyakun akiyar kec anakibois a ŋikatwak, ikotere ŋituŋa elelyanete aŋuna eyaryata.

³¹“Okoe Yob topupok, kiira ŋakiro kaŋ, kililiŋ, kimyekinae ayoŋ erwor.

³²Ani kiyakar iyoŋ ŋadikiro ŋuna icamit alimun, tolimokinae ayoŋ, kirworik, anerae acamit ayoŋ acamun iyoŋ irae ŋolo iyookino.

³³Ani kemam, topupok ŋakiro kaŋ, kililiŋ, ido eketatamikini ayoŋ iyoŋ ŋuna ka aosou.”