Read ngakarimojong Yob 34 Bible Online

Yob 34 - ngakarimojong bible

Yob 34

¹Torubak nai Eliu irworo tema,

²“Kiirasi ŋakiro kaŋ, iyes ŋikilyok lu ŋulu aosok, topupokinae ayoŋ, iyes ŋikilyok lu ŋulu iyenete ŋakiro.

³anerae iirari akit ŋakiro toyenu atemar erae ŋuna a kire, kori erae alyokonu, lopite ŋolo iirya aŋajep akimuj.

⁴Oseutu ŋuna iyookino; otubutu iwon ŋikulepek ŋakiro ŋuna ejokak;

⁵“Anerae alimu Yob ebe, ‘Emam aronis ayeni ayoŋ atemar etiyat, ido alema Akuj ajokis ŋina emaikina ayoŋ ikiyakar;

⁶akilo ayoŋ araakau ŋolo eyookino, ekemarakin ayoŋ arae ekalyokonon; nyeeŋununui ayoŋ akisicanio, tari kemam ŋikisila abilit ayoŋ.’

⁷Eyai ituŋanan ikwaan ka Yob ŋolo emasi ŋiyany lopite ŋolo emasya akwap ŋakipi a?

⁸Emina iŋes arukit kaapei ka ŋituŋa ŋulu itiyaete aronis, emina iŋes alosit alorot ka ŋulu aronok.

⁹Adau iŋes alimun ebe, ‘Emam ibore eryamuni ituŋanan analelakinit Akuj.’

¹⁰“Aŋun, topupokinae ayoŋ, iyes ŋulu epatana ayenun ŋakiro, nyiryamasi ca Akuj ka akitiya ŋuna aronok, nyiryamasi ca Akuj ŋina etiron ka akitiya ŋuna nyiyookino,

¹¹anerae eropi Akuj ŋituŋa lopite ŋolo itiyatotor ikes ka itiyakin neni a ŋituŋa ŋakiro ŋunapei sek iwuapito ikes.

¹²Ŋulu itiyaete ŋuna a kire, nyitiyae Akuj ŋuna aronok neni kec, nyeŋeri Akuj ŋina etiron akitiya ŋuna ka akiyookino.

¹³Ŋae abu inak Akuj akipuka akwap? Ŋae abu kiwuak akwap daadaŋ napedor ŋina ka Akuj?

¹⁴Ani ketubu Akuj akinyakar neni eyai iŋes ekieŋanu keŋ ŋolo ka akiyar, tocuna neni keŋ alope ekieŋanu keŋ,

¹⁵etwakete ŋituŋa daadaŋ, ido eboŋorete ŋituŋa daadaŋ toruwor nabo ŋalup.

¹⁶“Ani kiyakatar iyes ayenut, kiirasi ŋakiro nu; topupokisi ŋakiro ŋuna erworo ayoŋ.

¹⁷Epedori mono ituŋanan ŋini eremokino akiyookino akipuka a? Ipedorete iyes akitoroniyar ŋini iyookino ka etiron a?

¹⁸ŋini elimokini erwosit ebe, ‘Iyoŋ ekasyaat!’ Ŋini elimokini ŋikepukak ebe, ‘Iyes ŋikilyok ŋulu aronok!’

¹⁹Ŋini nyeriito ka ŋikepukak, kori nyemina ŋikabarak akilo ŋikulyakanotin, anerae erae ikes daadaŋ ŋisubuna keŋ a?

²⁰Epedorete ŋikabarak ka ŋikulyakanotin atwakare atipei, epedoryo ŋituŋa akitamaranikin nakwaare, ido totwaka, epedori Akuj alemar ŋikadedeŋak pa itijikinit.

²¹Ite Akuj ŋakiro daadaŋ ŋuna itiyaete ŋituŋa ka ite neni daadaŋ elosete ikes.

²²Emam neni iryono cuc, kori auwuat ŋina iryono cuc, neni epedoryata ŋulu itiyaete aronis a ŋopya.

²³Nyelimokinit Akuj ituŋanan idio apaki ŋina elosyo neni keŋ atubokino.

²⁴Elemari Akuj ŋikadedeŋak pa iikikito ka iŋes, ido ilunyonokini ŋituŋa ŋice lokicoloŋo kec kipukata.

²⁵Aŋuna eyenia iŋes ŋiticisyo kec, elemari iŋes ikes nakwaare kitoŋopiya jik nyetakanut.

²⁶Eari Akuj ikes aŋuna ka aronis kec eari Akuj ikes iteete ŋituŋa,

²⁷anerae apotu ikes toŋero akiwuapit ŋuna ka Akuj ka aŋuna aponiata nyemitakis akiwuapit ŋadi ŋuna ka Akuj.

²⁸Apotu ikes kisigworo ŋikulyak todol akigworo kec neni ka Akuj, ido abu Akuj kiira akigworo a ŋituŋa a ŋulu esicanitae.

²⁹Ani kerubaki Akuj ililiŋi, ŋae epedori akitoroniyar Akuj? Ani kiwua iŋes ereet keŋ, ŋae epedori akiŋolikin iŋes?

³⁰Itiyae Akuj ŋun, ikotere nyipukata ŋulu eŋerito Akuj, kori ŋulu iteryamunito ŋituŋa ŋuluce ŋican.

³¹“Eyai mono ituŋanan idio alimoki neni ka Akuj ebe, ‘Adau ayoŋ akidaŋidaŋ akisicanio; nyaboŋokini nabo ayoŋ akitiya aronis;

³²kitatamae ayoŋ ŋuna nyayeni ayoŋ, ani ketiyat ayoŋ ŋuna ka asecit, nyaboŋokini nabo akitiya a?’

³³Nai aŋuna iŋeryo iyoŋ ŋuna itiyae Akuj, itami iyoŋ atemar kerae ekesican Akuj a? Iyoŋ emaikina toseu ŋuna kitiya, meere ayoŋ. Aŋun, tolimu ŋuna iyeni iyoŋ.

³⁴Ŋinituŋanan eyakar aosou akalimokini ayoŋ ka ŋinituŋanan ŋini eos ŋini epupi ŋakiro kaŋ etemari,

³⁵‘Irworo Yob emam ayenut, erae ŋakiro ŋuna irworo iŋes daadaŋ ŋuna emam apolou.’

³⁶Emaikina Yob kikatakinae ejok anakiro keŋ a daadaŋ, anerae irworo iŋes ŋakiro ŋuna irworosi ŋituŋa ŋulu aronok.

³⁷Iyasi iŋes eŋerenu nasecit keŋ, ibapibapi iŋes daŋ ŋakan alokidiŋ yok, ido iyasi nooi ŋakiro keŋ ŋuna ka aremokino Akuj.”