Read ngakarimojong Yob 39 Bible Online

Yob 39 - ngakarimojong bible

Yob 39

¹“Iyeni iyoŋ apaki ŋina euriyata ŋityaŋ ŋulu a ŋimoru ŋulu ikwaan ka ŋamee a? Iŋolikinit iyoŋ atili apaki ŋina euriya a?

²Ipedori iyoŋ akimar ŋilapyo ŋulu eayete ikes eriŋa nyeurya a? Iyeni iyoŋ apaki ŋina euriyata ikes a?

³Iyeni iyoŋ apaki ŋina euryanikinotor ikes aŋuna ka akidinyakin, ido touryata a?

⁴Epolounete ŋitak kec anariet togogoŋioto, imyekinete atatoto kec kepolout ikes, ido nyeboŋorete nabo neni atatoto kec.

⁵“Ŋae epedori akimyekin esigirya ŋolo atironon kipasa bon? Ŋae epedori bon alacar ŋarukanes ŋuna eenitere esigirya ŋolo atironon?

⁶Abu ayoŋ oinak esigirya ŋol aloŋisat toruwor akibois keŋ, abu oinak iŋes kiboi anadipo a ŋina eyai acumbi.

⁷Ejamuwarit iŋes ecelet ŋolo a etaun, nyecamit akiirar ecelet a ekameton keŋ.

⁸Edak lomoru neni eyakasi ŋinya keŋ, iwarit iŋes neni daadaŋ eya ŋinya ŋulu alibak.

⁹“Ecamunit mono emoŋ ŋolo atironon akitiya aŋuna kon a? Ecamuni mono iŋes akiper nakwaare tamanawi a?

¹⁰Ipedori mono iyoŋ akien iŋes a ŋaunoi kitiŋak iŋes akiriyar emeleku a? Kori epedori mono iŋes akitare neni sek itato ŋimoŋin ŋuluce a?

¹¹Ipedori iyoŋ akikinyom iŋes bon, anerae egogoŋ iŋes a? Ido ijalakini iyoŋ iŋes kitiya ŋiticisyo aŋuna kon a?

¹²Iyakar iyoŋ anupit ŋina ka atemar eboŋuni emoŋ ŋol neni kon ka iriuni ŋikinyom kon nalos a?

¹³“Iwuakiwuaki ekalees ŋabebenuk keŋ eŋaara nooi, nai nyepedorete ŋakopir keŋ akitoporor iŋes ikwa acolikokot.

¹⁴Imyekini ekalees ŋabeyei keŋ alokwap, ikotere inakis ŋalup ikes amwanis,

¹⁵nyetamunit iŋes atemar epedori ibore ice akicak, kori atemar epedori ityaŋ ŋini ka ariet akicak ikes tobwaŋ.

¹⁶Eryanyanikinit iŋes ŋicwi keŋ esibit meere ŋulu keŋ, nyemisit iŋes tari keruwor ŋuna itiyae iŋes aŋuna a ŋicwi keŋ ŋuna emam ibore eryamunia iŋes,

¹⁷anerae Akuj elemarit aosou aneni keŋ, Akuj nyeinakinit iŋes toyakaunor ayenut.

¹⁸Nai kepeta iŋes ŋabebenuk keŋ kisyak akerit, imyekini iŋes ŋaŋolei a nen ka ŋikametok kec, ido ekyenar ikes.

¹⁹“Yob, iyoŋ mono ibu inak aŋole agogoŋu keŋ a? Iyoŋ mono ibu inak iŋes esigirigir ŋolo alomosiriŋ keŋ a?

²⁰Iyoŋ mono iinakini aŋole akipor ikwa emaase a? Erae epite ŋolo erwor aŋole ŋolo ailiilon ŋolo ikitubuli.

²¹Icakacakaete ŋaŋolei akwap eryenyaaka ka elelyanete nooi, ekerete ikes lojie a agogoŋu kec a daadaŋ.

²²Ejamuwarito ikes akuryanu ka nyekadakinit ikes. Nyenapanar ŋaŋolei alojie.

²³Erae kidiama ŋaŋolei erwotor ŋikaleŋeleŋe anatorosya, ŋaŋolei ikes iwokito ŋakwaaras ka ŋibitiyek.

²⁴Icaki a ŋole akwap atipei ededeŋ ka eryenyaana nyerubakini a ŋole ewoi aiwapei iirari eruye a arupepe.

²⁵Apaki ŋina eruunio arupepe, eruuni aŋole esibit ebala, ‘Kiteryamunae.’ Iŋuuni iŋes ejie eriŋa elwana, iirari iŋes ŋikarikok a ŋajorei iworoete ka ŋituŋa ecelasi.

²⁶Iyoŋ mono iinakinit atanawi aosou ŋina eporyoto alokidiama nooi a? Apedor ŋina epetaritotor ŋabebenuk kec ewosete lowae ŋolo alo Kwap a?

²⁷Iyoŋ mono ilimonokini ŋigolei aporor kidiama, ido toduko ŋakais kec kidiama ŋimoru a?

²⁸Eduki egole akai keŋ nagolo a ataaba ŋina eyai kidiama nooi, iboi iŋes anauni a ataaba a ŋina ecurut.

²⁹Epedori iŋes a nen akiŋolikin ibore ŋininyamat; epiiryaka ŋakonyen keŋ iŋolikinete ibore aneni alwanan.

³⁰Erae ŋaokot a ibore ijujuyete ŋicwi keŋ, neni etwanikinit ibore, eyakaun egole nen.”