Read ngakarimojong Yob 4 Bible Online

Yob 4 - ngakarimojong bible

Yob 4

¹Togeik nai Elipas Etemanait tema,

²“Yob, ani mono kirworik ituŋanan neni kon iŋoi iyoŋ a? Nai epedori mono ituŋanan akililiŋ anakiro a nu a?

³Kiira, idau iyoŋ akitatam ŋituŋa ŋulu alalak, idau iyoŋ akisimukekin ŋituŋa ŋulu epalag.

⁴Adaut ŋakiro kon akisirworiun ŋituŋa ŋulu pa eleere epite ŋolo eyaryata, ido idau akisimukekin ŋulu apalag.

⁵Nai tokona adolut ŋakiro ŋun neni kon ka nyipedorit iyoŋ akidaŋidaŋ; ani ikidolokinete iyoŋ ŋakiro ŋun, itokadak iyoŋ.

⁶Meere mono akitopoloorit Akuj iŋes ikinyomit iyoŋ ka meere mono akiyookino aloticisyo kon igeno iyoŋ a?

⁷“Totamak tokona, ŋae idiotuŋanan ŋini eyookino ŋini abu totwan? Kori ŋinapei wori amunyarere ŋulu iyookino?

⁸Lopite ŋolo eŋolikinia ayoŋ, eyakasi ŋituŋa ŋulu etiŋiyara anakitiya aronis lopite ŋolo etiŋiyaror ituŋanan anakitare ka eyakasi ŋulu a ŋican, eryamunete ŋituŋa ŋul aronis ka ŋican pei.

⁹Itoŋopiyari Akuj ŋikaronok a ekuwuam keŋ ka emunyari ikes anaryenyeo a ŋina ka aŋoit keŋ.

¹⁰Adaun apedor ŋina irurumaata ŋikaronok lopite ŋolo irurumaa eŋatuny, adaun akireta ŋina ka adedeŋu kec lopite ŋolo edaunor ŋina a eŋatuny, abilibilaar agogoŋu kec lopite ŋolo ebilibilaarotor ŋikyal a ŋiŋatunyo a ŋulusorok.

¹¹Etwani eŋatuny ŋolo agogoŋon aŋuna eŋopikinia ibore ŋini enyami, ido ielar ŋitak keŋ nariet.

¹²“Abu ayoŋ eira akirot ŋina ekesileerekinio anakimunono, ido abu eira ŋuna ekeŋaiŋakinio.

¹³Etamatamaete ŋatameta ŋakiro ŋuna a ŋakisileerekineta aŋuna ka akuwar, aŋuna eyakaunun apaki ŋina ejotonorootor ŋituŋa nooi,

¹⁴abu akuryanu nooi min neni kaŋ, ido abu omaranik abu akuwan kaŋ daadaŋ tomaranik.

¹⁵Apaki ŋin, totubor ekuwuam ŋolo epilipili aloreet kaŋ, abu ekuwuam ŋol kitonyou ŋitim ŋulu anakuwan kaŋ.

¹⁶Abu ayoŋ eŋolik ibore ewoi, nai nyayen ayoŋ atemar arae nyo. Ete ayoŋ etorube ŋol alokiŋaren kaŋ ka ata akwap cek, abu nai ayoŋ eira etoil ŋolo erworo ebala,

¹⁷‘Alipite mono epedoryata ŋituŋa aruwor ŋulu iyookino alokiŋaren Akuj? Alipite mono epedoryata ŋituŋa aruwor ŋulu emam aronis alokiŋaren ekasuban kec?

¹⁸Nyikinyomit Akuj tari ŋiketiyak keŋ, elimonokini tari ŋimalaikan keŋ, akitiya ŋuna nyiyookino.

¹⁹Anu nai itiyakini Akuj neni a ŋituŋa a ŋulu erae ŋalup esubunitere, a ŋituŋa a ŋulu erae apuwa koŋin itiyaunitere, a ŋulu epedoryo akipudaar lopite ŋolo ipudaarere esipiran.

²⁰Epedori ituŋanan akiyar taparacu, ani eboŋ totwana; etwakete ikes toŋopiyasi jik tojoŋoi amitakinit.

²¹Elemario ibore daadaŋ ŋini sek eyarikinito ikes, ido totwaka ikes pa eyenete aosou ŋina ebunit aneni ka Akuj.’ ”