Read ngakarimojong Yob 40 Bible Online

Yob 40 - ngakarimojong bible

Yob 40

¹Tema nai Ekapolon neni a Yob,

²“Ijoŋoe tokona iyoŋ akitepeg ayoŋ Akuj ŋina etiron a? Ituŋanan daadaŋ ŋini itepegi Akuj, emaikina toboŋok ŋakiro.”

³Toboŋok nai Yob Ekapolon tema,

⁴“Kiira, arae ayoŋ ecaryoit koŋin, anukiro akaboŋokini ayoŋ iyoŋ? Abuni ayoŋ akituk kaŋ ka akan.

⁵Adau ayoŋ akirwor, aŋun, nyapedori aboŋokin ŋakiro ŋarwa ŋaarei, nai eliliŋi cek.”

⁶Toboŋok nai Ekapolon Yob alokuwuam a ŋolo epiripiri tema,

⁷“Towo tokona ikwa ekile, ekeŋisi ayoŋ iyoŋ ŋakiro, ido itolimok ayoŋ.

⁸Icamit iyoŋ akituruwor ayoŋ ŋolo nyetiyae ŋuna iyookino a? Itemari iyoŋ adyekarit ayoŋ, ikotere ikituruworyo iyoŋ ŋolo iyookino a?

⁹Igogoŋ iyoŋ lopite ŋolo egogoŋio Akuj a? Ipedori iyoŋ agirokin a etoil a ŋolo ikoni ŋolo keŋ a?

¹⁰“Ani kipedori ŋun, tosir tokona toiliilior kitoodiu apolou kon, kidodiu tokona atemar ipol iyoŋ nooi ka ikitopoloorito iyoŋ ŋituŋa.

¹¹Kisileereu aŋoit kon, kiŋolik ŋulu eturok daadaŋ, ido inak ikes kitiditeunos make alokiŋaren kon.

¹²Ee, kiŋolik ŋinituŋanan eturon daadaŋ kitiditeu iŋes, ido tomunya ŋituŋa ŋulu itiyaete aronis,

¹³tonukak ikes daadaŋ nalup; togolok ikes nakibois a ŋikatwak.

¹⁴Ani kitiya iyoŋ ŋun, ageuni ayoŋ daŋ acamun atemar epedor apedor kon a elope akiloun.

¹⁵“Kiŋolik mono etyaŋ ŋolo aburon ŋolo enyaritae Beemos, [4] etyaŋ ŋolo asubuni ayoŋ lopite ŋolo akasubunia iyoŋ, edaka iŋes ŋinya ikwa emoŋ.

¹⁶Eyai agogoŋu keŋ nacir keŋ, eyai apedor keŋ namori ŋuna anakook keŋ.

¹⁷Itenara elado keŋ ikwa ekitoe a Cedar, erucokina ejok ŋamori ŋuna a ŋamuroi keŋ.

¹⁸Egogoŋ ŋakoyo keŋ lopite ŋolo egogoŋio eburonis ka egogoŋ ŋakejen keŋ lopite ŋolo egogoŋioto ŋasuwa.

¹⁹“Erae iŋes etyaŋ ŋolo iloit ibore daadaŋ ŋini abu Akuj tosub; ekasubunan keŋ bon epedori alosit neni keŋ toar;

²⁰anerae erupete ŋinya ŋulu edaka iŋes alomoru, aneni ebolyatar ŋityaŋ daadaŋ ŋulu ka ariet.

²¹Eperi iŋes anamon a ŋuna a ŋikukwa, eperi iŋes alowot ka anasasaka a ŋijomya.

²²Imukorit etolim a ŋamon iŋes, imukorito ŋatetelei ŋuna a ŋayona iŋes.

²³Tari keleleu a ŋolol nooi, nyeryeŋanakin iŋes nyemisit iŋes tari keleleu aŋolol Yorodan ŋakipi nakituk keŋ.

²⁴Eyai mono ituŋanan epedori akikamun iŋes a ekodocet, kori epedori akisurum iŋes kirupak auno lokume keŋ a?