Read ngakarimojong Yob 42 Bible Online

Yob 42 - ngakarimojong bible

Yob 42

¹Ekaku aŋun, toboŋok Yob Ekapolon tema,

²“Ekapolon ayeni ayoŋ atemar ipedori iyoŋ akitiya ŋiboro daadaŋ ka emam ibore ikitukuruwori iyoŋ akitiyakin.

³Iŋita iyoŋ ebe, ‘Ŋae ŋin ŋini itukuruworit atukun ŋakiro torae bo ŋini emam aosou?’ Aŋun, adau ayoŋ akirwor ŋakiro ŋuna pa ayeni apolou kec, erwor ayoŋ ŋakiro ŋuna aumokinit ayoŋ nooi, ŋuna pa ayeni ayoŋ apolou kec.

⁴‘Topupok, ido erworikini ayoŋ; ekeŋisi ayoŋ iyoŋ, ido ikilimokini iyoŋ ayoŋ.’

⁵Eira ayoŋ ŋakiro kon ŋuna akalimokinete ŋituŋa ŋuluce, nai tokona ekeŋolik ayoŋ iyoŋ.

⁶Aŋun, ajamuwar ayoŋ bon aŋuna a ŋakiro kaŋ, ido akii ewuakinit apuwa ka ekuron nakuwan kaŋ.”

⁷Kedau Ekapolon akirwor ŋakiro ŋun neni a Yob, tema Ekapolon neni a Elipas a Etemanait, “Anyunyura ayoŋ neni kon ka neni a ŋikonei kon Bilidad ka Sopar, anerae nyirworo iyes aŋuna kaŋ ŋuna iyookino, lopite ŋolo erworitor Yob eketiyan kaŋ.

⁸Aŋun, tolemutu tokona ŋimoŋin ŋikanikaarei ka ŋimeesekin ŋikanikaarei, ido toloto neni a Yob a eketiyan kaŋ, iinakis erae amuronot ŋina epeyo aŋuna kus. Ikilipakini iyes Yob eketiyan kaŋ, acamuni ayoŋ akilip keŋ ŋina akadyekitor iŋes ayoŋ nyetiya neni kus ikwa emaikina aŋuna ka abaŋao kus; anerae ipotu iyes nyirworo ŋuna iyookino aŋuna kaŋ lopite ŋolo erworitor Yob eketiyan kaŋ.”

⁹Aŋun, apotu Elipas ŋolo arae Etemanait kaapei ka Bilidad ŋolo arae Esuit ta Sopar ŋolo arae Enaamasit toloto kitiyata ŋuna alimokini Ekapolon ikes, ido abu Ekapolon tocamu akilip a Yob.

¹⁰Kedau Ekapolon akiirar akilip a Yob aŋuna a ŋikonei keŋ, abu kinyakak Yob ŋiboro ŋulu sek ayakar, kiyatak a ŋolo kimar etiyae ŋolo sek a ekiŋaren.

¹¹Ekaku, potu neni a Yob ŋikaitotoi keŋ, ŋakaitotoi keŋ ka daadaŋ ŋulu sek ayenete iŋes, kimuja kaapei ka iŋes alokai keŋ. Apotu kitoodiut akiyaloloŋ ŋina sek ayakatar ikes aŋuna a Yob ka apotu kisirworiut iŋes aŋuna ka aronis a daadaŋ a ŋina abu Ekapolon yau neni keŋ abu ŋinituŋanan alotooma ŋul inak Yob ŋidisiliŋa ka ekaboboot ŋolo etiyaunitae a egolid.

¹²Abu nai Ekapolon kiterereŋ Yob alorwa keŋ a ŋulu esidyok akilo ŋulu a ekiŋaren; abu Yob toyakaunor ŋamesekin ŋalipyo ŋatomon ka ŋaomwon, ŋikaala ŋalipyo ŋakanikapei, ŋimoŋin ŋalipyo ŋaarei ka ŋisigirya aliput.

¹³Abu daŋ iŋes toyakaunor ŋidwe ŋulusapa ŋikanikaarei ka ŋulupesur ŋiuni.

¹⁴Abu iŋes tolimok ekiro anakoku keŋ a ŋina esyaunan Yemima, ekiro a ŋina a ŋaarei Kesia ka ŋina a ŋauni arae ekiro keŋ Kerenapuc.

¹⁵Anakwap a ŋin a daadaŋ, amam ŋaberu ŋuna ebusak ikwa ŋidwe a Yob ŋulupesur, ido abu papa kec inak ikes ŋiboro ŋulu apotu toruworos ŋulu kec lopite ŋolo aryamunitotor ŋikaitotoi kec.

¹⁶Ekaku a ŋun, abu Yob toyar todol ŋikaru keŋ amiat ka ŋatomoniomwon, abu kiŋolik ŋidwe keŋ ka ŋapapae keŋ todolo ŋanyameta ŋaomwon.

¹⁷Abu nai Yob totwan emojoŋit nooi, ikoŋikoŋit ŋikaru ŋulu alalak.