Read ngakarimojong Yob 8 Bible Online

Yob 8 - ngakarimojong bible

Yob 8

¹Ani edauni Yob erwor, togeik nai Bilidad ŋolo abunit alo Su erwor tema,

²“Yob, tari ori irubakinit iyoŋ irworo ŋakiro nu, irworo iyoŋ ŋakiro ŋuna alalak, ido ŋuna irworo iyoŋ itoropiunit, ikwaan ka neni eropiunitor ekuwuam?

³Iloconokini mono Akuj ŋakiro ŋuna iyookino a? Kori iloconokini mono Akuj ŋina etiron akitiya ŋuna iyookino a?

⁴Ani kesecito ŋidwe kon aneni keŋ, abu Akuj kipotok ikes nakisicanio aŋuna a ŋaronisya a ŋunapei etiyato ikes.

⁵Ani tokona, kiwar iyoŋ ŋuna ka Akuj, ido todyekanar aneni a ŋina etiron,

⁶Ani kirae iyoŋ ituŋanan ŋini iyookino ka ŋini itiyae ŋuna iyookino, kire jik, ebuni iŋes akiŋarakin iyoŋ, ido ikinyakak iyoŋ ŋituŋa a ekal kon ka ebari kon ŋolo pei sek iyakar ekiŋaren.

⁷Tari kekudyoko ŋiboro ŋulu iyakar iyoŋ anakisyakinet, ikiinakini iyoŋ Akuj abaru ŋina alalan nooi alorwa kon a ŋulu esidyok.

⁸“Ekemaimai ayoŋ iyoŋ, kiŋitanar mono iyoŋ ŋakiro ŋuna a ŋanyameta a ŋuna alunyar, totamak ŋakiro ŋuna koloŋ apotu atapapaa kec toryamut anakiŋitanar ŋakiro,

⁹anerae ikiya iwon tokona ikipolok, nai eriŋa ikidisyak, ido emam ŋuna ikiyeni ejok, ikwaan ŋirwa yok anakwap ka etolim.

¹⁰Nyepedorete mono ŋakiro a ŋulu a koloŋ akitatam iyoŋ ka alimokin ŋadi a? Nyepedorete ŋuna alimununeete ikes akitatam iyoŋ a? Ŋakiro ŋuna abasi ikes,

¹¹“Erupete mono ŋasasaka aneni emam ejom a? Epedori mono eot alomun aneni emam ŋakipi a?

¹²Kikote neni daŋ, kijuwasi ŋakipi, einiyarete ikes atipei eriŋa ŋikito ŋuluce daadaŋ.

¹³Erae ŋol epite ŋolo eyakaunotor ŋituŋa ŋulu nyikinyomito Akuj; edaun akigeno a ŋituŋa a ŋulu nyikinyomito Akuj.

¹⁴Etesem akikinyomit a ŋituŋa a ŋul, ikwaan akikinyomit kec etesem ka akai ka asimokok.

¹⁵Ani kegwaŋakin ituŋanan kai a asimokok, nyerubakini akai a asimokok eyai neni sek ayai, ani kikam ituŋanan akai a asimokok aŋuna ka aiunor, nyerubakini akai ŋin eyai nen.

¹⁶Eyakasi ejok ŋituŋa ŋulu itiyaete aronis, ikwaan ikes ejokak ka ŋinya ŋulu etakanete ejokak alomanikor apaki ŋina imadakinia akoloŋ ikwaan ikes ka edowan ŋolo epetakin amana kiryam.

¹⁷Epetakin ŋataagor a edowan a ŋol nakidiŋon a ŋamoru aŋuna etukonoro, imiidikinosi ikes natabab.

¹⁸Ani kemunyar ŋituŋa ŋul aneni sek eya, etakanuni esibit pa keyakasi ikes nen, ido etemarete, ‘Emam sek pa ayakasi ikes nen.’

¹⁹Kiirasi, epite ŋol iŋes eyakar alakara a ŋituŋa a ŋulu aronok, ido anakwap, epote ŋikaronok ŋice kilunyokinos nakiboisyo kec,

²⁰“Kiirasi, nyeŋeri Akuj ituŋanan ŋini iyookino, kori nyepedori akiŋarakin ŋulu itiyaete aronis.

²¹Ilelebikin nabo nakitukwa kus akyena, ilelebikin nabo lopon kus ecelet ŋolo ka alelyanu.

²²Irumete ŋileec ŋulu ikiremokino iyoŋ, ido emunaaryo ŋakais a ŋikaronok.”