Read ngakarimojong Yob 9 Bible Online

Yob 9 - ngakarimojong bible

Yob 9

¹Toboŋok nai Yob ŋakiro ŋun tema,

²“Kire ayeni ayoŋ atemar erae ŋun ŋuna a kire; nai, alipite eruworor ituŋanan ŋini iyookino alokiŋaren Akuj?

³Ani keseu ituŋanan apega ka Akuj, nyeboŋokini Akuj ŋakiŋiseta keŋ tari apei alotooma aliput.

⁴Eos Akuj nooi ka erae agogoŋu keŋ ŋina etiron, ŋae mono abu kitiji Akuj, ido kilou?

⁵Eukonori Akuj ŋimoru emam ituŋanan elimokinitae atemar eukoryo, apaki ŋina eukorya ikes aŋuna ka anyunyura keŋ;

⁶iloiloonokini Akuj akwap, ido tomaranikis ŋipirin ŋulu ewoiya akwap,

⁷Epedori Akuj alimokin akoloŋ nyelomu, ido nyelomuni; epedori Akuj akipucar ŋikacer.

⁸Akuj bon iŋes apetakini kidiama, Akuj bon iŋes itidipakini akimorokok a ŋakipi ananam.

⁹Akuj asubuni ŋitopon ŋulu enyaritae ŋiremotom ka etop ŋolo enyaritae Lobiler, iŋes asubuni ŋakanyer ŋuna alalak ka ŋitopon ŋulu enyaritae Akai ka Amosiŋ.

¹⁰Akuj itiyae ŋiticisyo ŋulu apolok nooi ŋulu emam ituŋanan epedori ayenun, Akuj itiyae ŋiboro ŋulu ajokak nooi ŋulu emam ituŋanan epedori akimarun.

¹¹Kiirasi, epedori Akuj akitor diyete kaŋ, ido nyapedori akiŋolikin iŋes, etubonor iŋes alodiyete kaŋ, nai nyapedori ayoŋ ayenun.

¹²Elemanari iŋes, ŋae epedori akiretakin iŋes tojoŋo alemanar? Ŋae elimokini iŋes ebe, ‘Nyo itiyae iyoŋ?’

¹³“Erae iŋes Akuj ŋina nyejoŋoenene anyunyura, ijuuruyete alokwap keŋ tari ŋikeŋarakinitok a Raab. [1]

¹⁴Alipite nai aboŋokinio ayoŋ Akuj? Aseuni ayoŋ ŋakiro kaŋ ŋuna aboŋokini iŋes ikwaani?

¹⁵Tari kemam ŋakiro ŋuna aronok ŋuna etiyat ayoŋ, mam ŋuna apedori ayoŋ aboŋokin iŋes; emaikina ayoŋ eŋit ŋolo ekesitakinit ayoŋ ekesyon ayoŋ.

¹⁶Ani kanyara ayoŋ iŋes, idio okoboŋok iŋes ayoŋ, nyanupit ayoŋ atemar epupokini iŋes ŋakiro kaŋ;

¹⁷anerae epedori iŋes anaryenyeo kec akipudaar ayoŋ, ido kitalala ŋajemei kaŋ emam ŋadi ŋuna aronok ŋuna etiyat ayoŋ;

¹⁸nyekemyekini iŋes ayoŋ eeŋa aryeba, nai akainakini iŋes ayoŋ ŋican ŋulu apipilak.

¹⁹Ani katema ayoŋ akisinda ka Akuj anagogoŋu kaŋ, iŋes eruwor ŋina egogoŋ; ani kerae aŋuna ka akiyookino, ŋae akanyarakini ayoŋ Akuj?

²⁰Tari kemam ŋakiro ŋuna aronok ŋuna etiyat ayoŋ, ekesitakinito ayoŋ ŋakiro ŋuna erworo, tari kemam ŋakiro ŋuna eketoroniyaritere ayoŋ, itoodiuni Akuj ŋakiro ŋuna nyaraakar ayoŋ ŋolo eyookino.

²¹Mam ŋakiro ŋuna eketoroniyaritere ayoŋ; nyayeni ayoŋ ŋuna eya nakuwan kaŋ; aluŋ ayoŋ akiyar kaŋ.

²²Mam ibore ipei daŋ isimukekinit etau kaŋ, aŋun alimu ayoŋ atemar, emunyari Akuj ŋulu nyitoroniyaritae kaapei ka ŋulu aronok.

²³Ani eyakaunete ŋican atwanare ŋina ka atipei, mam ŋuna emitakini Akuj aŋuna a ŋican kec.

²⁴Einakinitae akwap napedor a ŋulu aronok, erapi Akuj ŋatameta a ŋikatubok ŋakiro nyepedosi akitub ŋakiro eriyan. Ani pa kerae Akuj itiyae ŋakiro ŋun, ŋae bo ice?

²⁵“Ekerete ŋirwa a akiyar kaŋ atipei, akilo tari neni ekerya ekakeran ŋolo apiranan; elunyete atipei, mam ajokis eŋolyaanakini ayoŋ anakiyar kaŋ.

²⁶Elunyanarosi ŋirwa a akiyar kaŋ atipei lopite ŋolo eironorotor ŋitubae ananam, eironor lopite ŋolo iuwaunor egole neni a ibore a ŋini ecamit akinyam.

²⁷Ani katema ayoŋ, ‘Emaikina ekemuryakis ayoŋ ŋakiro ŋuna eŋuruŋurar; alemari ayoŋ anyoridid aloreet kaŋ, oruwor ŋolo etoodiunit alakara aloreet kaŋ,’

²⁸ikiyakar ayoŋ ekabule aŋuna atamya ŋuna ka aryeba kaŋ a daadaŋ, anerae ayeni ayoŋ atemar nyitemari iyoŋ Akuj eyookino ayoŋ.

²⁹Akatubokinio ayoŋ; kaanukiro nai etaarar ayoŋ akitiya etojoka aneni kon koŋin?

³⁰Ani keloŋar ayoŋ a ŋakipi esitiyae esabuni, ido eriga ŋakan kaŋ a esabuni,

³¹ibuni iyoŋ akimasakin ayoŋ nakipany locoto, esibunete ŋilowi kaŋ a elope meere ŋulu kaŋ.

³²Meere Akuj ituŋanan ikwa ayoŋ, meere iŋes ituŋanan ŋini emaikina ayoŋ esindau anakitepeg, meere iŋes ituŋanan ŋini emaikina iwon orukosi ka iŋes neni etubere ŋakiro yok ka iŋes.

³³Emam ikatubon ŋakiro kaŋ ka Akuj, ŋini epedori atubun atemar eyookino ayoŋ, kori Akuj.

³⁴Ani kejoŋo Akuj akisican ayoŋ, nyecamak akuryanu ŋina eyaunit iŋes eketubuli ayoŋ,

³⁵abuni nai ayoŋ akirworo pa akuryana aŋuna keŋ, anerae ayeni ayoŋ atemar nyeriŋa ayoŋ arae ituŋanan lopite ŋolo sek atamakinitere.”