Read ngakarimojong Ŋikiru. 10 Bible Online

Ŋikiru. 10 - ngakarimojong bible

Ŋikiru. 10

¹Okoe Ekapolon, kaanukiro iyakar iyoŋ neni alwanan? Kaanukiro iŋopiyanarya iyoŋ anapakio aŋuna ikiyakar isua locan?

²Alotooma akituro, isicanito ŋulu aronok ŋulu a ŋican, kimyek ŋulu aronok kikamut ŋakiro kec ŋuna itiyaete;

³anerae iturosi ŋulu aronok aŋuna a ŋakiro a ŋuna iitanito ŋitai kec, ilamasi ŋirorokanotin ka ejamuwarito Ekapolon.

⁴Iturosi ŋulu aronok, mam ŋuna ke Ekapolon ŋuna iwarito ikes; emam ŋadi daŋ ŋuna ka Akuj anatameta kec a daadaŋ.

⁵Eryamununeete ikes ibore ŋini ecamito ŋapakio daadaŋ, nyemisito ikes ŋikisila kon; ejamuwarito ikes ŋimoe kec daadaŋ.

⁶Etamete ikes alotai kec ebe, “Mam ŋakiro ikiteryaŋakinete; ikirubakini ikilakara ananyameta kec a daadaŋ, mam ŋican ikiryamuni.”

⁷Ileleba ŋilam nakituka kec ka amodiyo ta adedeŋu; etenito ikes a ŋinapaki alimun ŋakiro ŋuna etidiŋakinak ka ŋuna aronok.

⁸Iboiyonokin ikes iwadio alorerya adapit ŋuluce, earete ikes a nen ŋituŋa ŋulu emam ŋakiro itiyato, eŋoleŋoleete ikes a nen imukekinito aryamun ŋulu epalag.

⁹Eperete aneni eŋopitotor ikwa eŋatuny ŋolo elemarit; eperete a nen idarito akikamun ŋulu epalag; ikamete ikes ŋulu epalag, ido yaasi nakibois kec.

¹⁰Etikonokin ikes ŋulu epalag kiumiyasi nooi; eryamunito ŋulu epalag ŋican a ŋuna ka agogoŋu a ŋulu aronok.

¹¹Etamete ikes alotai kec ebe, “Nyemitakinit Akuj ŋakiro ŋun, adau akiwua ereet, nyepedori iŋes akiŋolikin ŋakiro ŋun.”

¹²Tonyou, okoe Ekapolon, okoe Akuj, kisican ikes; toiu ŋulu epalag.

¹³Kaanukiro eŋeritotor ŋulu aronok Akuj? Ido etamete alotai kec ebe, “Nyikinyarae Akuj isua ikisican aŋuna ikitiyat?”

¹⁴Nai ite iyoŋ! Kire iyeni iyoŋ ŋican ka aryeba a ŋituŋa, ido itenit iyoŋ aŋuna ka akiŋarakin, einakina ŋulu epalag neni kon, iyoŋ iŋarakini ŋikokyok a ŋinapaki.

¹⁵Tolema agogoŋu a ŋulu aronok ka ŋikasecak, tolema aronis kec akitodol ŋina edaunor jik.

¹⁶Erae Ekapolon erwosit ŋolo a ŋikaru ka ŋikaru, isunyarosi ŋituŋa a ŋakwapin anakwap keŋ alo Isirael.

¹⁷Okoe Ekapolon, iira iyoŋ akiitanit a ŋituŋa kon a ŋulu itiditeuna make. Isimukekini iyoŋ ŋitai kec, ipupokini iyoŋ ŋakiro kec.

¹⁸Kitiya ŋuna iyookino aŋuna a ŋikokyok ka aŋuna a ŋulu iteryamunitae ŋican, ikotere kikoŋosi ŋituŋa anakwap akiteryamunit ŋuluce ŋican.