Read ngakarimojong Ŋikiru. 102 Bible Online

Ŋikiru. 102 - ngakarimojong bible

Ŋikiru. 102

¹Okoe Ekapolon, kiira akilip kaŋ; topupok akigworo kaŋ aŋuna ka akiŋarakino.

²Nyikiesik ayoŋ apaki ŋina ayakar locan. Topupok ŋakiro kaŋ; toboŋokinoe ayoŋ atipei apaki ŋina akanyaraa,

³anerae iburiburete ŋirwa kaŋ lopite ŋolo epuripuryaaror apuru; akaryebete ayoŋ ŋakoyo, emwaka pe ikwa ŋatotol ŋuna enepete.

⁴Apapanu ayoŋ, ikikwaanikin ka ŋinya ŋulu ainiyasi; adaun ayoŋ ekimue ŋolo ka akimuj.

⁵Aŋuna aumenio ayoŋ nooi; aruwor ayoŋ koŋin, amuny ka ŋakoyo bon.

⁶Ikikwaanikin ayoŋ ke etula ŋolo ka aloŋisat, ikikwaanikin ka itula ŋini eyai loreŋoroto.

⁷Nyeriŋa ayoŋ aperi ojotoor ikikwaanikin ayoŋ ka ikyeny ŋini erae iŋes bon alokidiama akai a ituŋanan.

⁸Apaaran jwii, ekecenete ayoŋ ŋimoe kaŋ; isitiyaete ŋulu akyenatar ayoŋ ekiro kaŋ akilamar.

⁹Anyami tokona ayoŋ ekuron ikwapei akimuj, ido emoriyanari ŋakiyo ka ibore ŋini amasi,

¹⁰erae ŋun aŋuna ka anyunyura kon ka aŋoit kon, anerae ikilema iyoŋ ayoŋ, ido ikicaka.

¹¹Ekwaanikin ŋirwa kaŋ ke etolim a ibore edoiyori akoloŋ; ainiya ayoŋ ikwa ŋinya.

¹²Nai iyoŋ, okoe Ekapolon irae erwosit ŋolo a ŋikaru ka ŋikaru; erubakini ekiro kon ananyameta a daadaŋ.

¹³Ibuni iyoŋ, ido kisyoni Sion, anerae adolu apaki ŋina isyonio iyoŋ iŋes. Adolu apaki ŋina etemokinitoe,

¹⁴anerae eminasi ŋiketiyak kon Sion; nyelakara ikes aŋuna ka akinyasuno keŋ.

¹⁵Itopoloorete ŋakwapin ekiro ŋolo ke Ekapolon, itopoloorete ŋirwosi ka akwap a daadaŋ apolou kon,

¹⁶anerae edukokini nabo Ekapolon Sion; itoodiun Ekapolon anapolou keŋ.

¹⁷Iirari iŋes akilip a ŋulu a ŋican, ido nyejamuwari akilip kec.

¹⁸Kigira ŋakiro nu aŋuna a ŋanyameta a ŋuna eponito, ikotere ŋituŋa ŋulu eriŋa nyidouno ipurete Ekapolon temasi,

¹⁹“Abu Ekapolon kiŋoliu kwap anakibois keŋ a ŋina asegan a ŋina alokidiama. Abu iŋes kiŋoliu anakuj kwap,

²⁰abu kiira aumen a ŋimabus, ido abu tolacak ŋulu atubokinitae atwanare,”

²¹ikotere iserao ekiro ŋolo ke Ekapolon alo Sion ka kipuroe iŋes alo Yerusalem

²²apaki ŋina ecunakinotor nen ŋakwapin ka ŋapukasinei aŋuna ka akilip neni ke Ekapolon.

²³Anapaki a ŋina ka asoroko kaŋ, abu Ekapolon tolema agogoŋu aneni kaŋ; abu kituuruwuan ŋirwa kaŋ.

²⁴Aŋun, abu ayoŋ otema, “Okoe Akuj kaŋ, nyikilema ayoŋ tokona eriŋa nyemojoŋa; okoe Ekapolon, iyoŋ erubakinete ŋikaru kon ananyameta a daadaŋ.”

²⁵Koloŋo sek, ibu iyoŋ tosub akwap, ido ibu iyoŋ anapedor kon tosub nakuj.

²⁶Edaunosi ikes, nai irubakini iyoŋ iyai; enyamunosi ikes daadaŋ ikwa ŋilowi. ilocokini iyoŋ ikes ikwa ŋilowi, ido edaunosi.

²⁷Nai irubakini iyoŋ ikoni nenipei, ido nyedaun akiyar kon.

²⁸Iboikinoi isua ŋiketiyak kon ka ŋidwe kosi emam ŋace, erubakinete ŋipapae kosi iboiyete emam ŋace.