Read ngakarimojong Ŋikiru. 105 Bible Online

Ŋikiru. 105 - ngakarimojong bible

Ŋikiru. 105

¹Tolakaros neni ke Ekapolon, tonyarata ekiro keŋ; kiteyenikisi ŋituŋa a ŋakwapin ibore ŋini etiya iŋes.

²Toeikisi neni keŋ, toeikisi ŋieosyo ŋulukipuret iŋes; tolimosi ŋiticisyo keŋ daadaŋ ŋulu ka aumokin.

³Tolakaros aŋuna ikiraakar iwon ŋulu keŋ; tolelyana iyes daadaŋ ŋulu ilipete neni keŋ.

⁴Kiwara Ekapolon ka kiwara agogoŋu keŋ, kiwara ayakau neni keŋ jwi jwi.

⁵Totamunito ŋiticisyo ŋulu ka aumokin ŋulu etiya iŋes, totamunito ŋakujuwuanisya ŋuna etiya iŋes ka ŋatubonokineta ŋuna abu iŋes tolimununu.

⁶Totamunito ŋun iyes ŋiletok ka Aburaam a ŋolo arae eketiyan keŋ, totamunito ŋun iyes ŋidwe a Yakob a ŋolo abu iŋes toseu.

⁷Erae iŋes Ekapolon Akuj yok; erae ŋatubokineta keŋ ŋuna ka akwap a daadaŋ.

⁸Etamunit iŋes acamunet keŋ ŋikaru ka ŋikaru, acamunet keŋ ka ŋituŋa ŋina abu iŋes tolimu aŋuna a ŋanyameta a aliput.

⁹Etamunit iŋes acamunet ŋina abu iŋes tocamunos ka Aburaam ka akiikinet keŋ ŋina abu kikoŋ neni ka Isaka.

¹⁰Abu Ekapolon kisiyook aŋuna a Yakob ŋuna aris iŋes ketubu, ka neni a Isirael acamunet ŋina a ŋikaru ka ŋikaru.

¹¹Tema Ekapolon neni a Yakob, “Akainakini ayoŋ iyoŋ akwap ŋina a Kanaan, ikwapei atutubet ŋina eruwor ŋina kon.”

¹²Apaki ŋina akudyokyoto ŋituŋa ka Akuj; ŋina araakatar ŋikudyo nooi, ŋina araakatar ikes ŋigelae anakwap a Kanaan,

¹³apaki ŋina erimitotor ikes anakwapin ka a anapukasinei.

¹⁴Abu Akuj nyecamak ikes kisicanae; aŋuna kec, abu Akuj kitoŋoiya ŋirwosi a ŋakwapin,

¹⁵tolimok ikes ebe, “Nyitapa ŋituŋa kaŋ ŋuluseuna, nyitiyata aronis adio neni a ŋikadwarak kaŋ.”

¹⁶Abu Ekapolon yau eron nakwap kec, togolo ŋirotin daadaŋ ŋulu eryamununuyata ikes akimuj.

¹⁷Nai aris iŋes kisiŋareniyo ituŋanan ice neni amaikina ikes toloto, arae ituŋanan ŋin Yosepu ŋolo aponi togyelarae toruwor epito.

¹⁸Aponi towanae ŋakejen keŋ a ŋiriko, toenikinae asuwat lomosiriŋ keŋ,

¹⁹akitodol ŋina eyookinotor ŋuna sek adwarit iŋes. Abu akirot ke Ekapolon kituruwo ŋakiro keŋ ŋuna kiyookino.

²⁰Abu erwosit kiyakiya ituŋanan neni keŋ, ido aponi tolacakinae iŋes; abu ekepukan a ŋakwapin aŋuna alalak tolacak iŋes.

²¹Abu kituruwo iŋes ekapolokiniton akai keŋ, kituruwo iŋes ekapolokiniton ibore daadaŋ ŋini ayakar iŋes,

²²abu erwosit inak iŋes kitatam ŋulu epukatotor erwosit lopite ŋolo italakarit iŋes, abu inak iŋes kitatam ŋakiro ŋuna ka aosou neni a ŋikasikou.

²³Abu nai Yakob bu nakwap a Ijipit kiboi iŋes anakibois a ŋina anyaritae Am erae egelaanot.

²⁴Abu nai Ekapolon inak ŋituŋa keŋ ŋidwe ŋulu alalak, abu kitogogoŋ ikes akilo ŋimoe kec.

²⁵Abu Ekapolon kisiman Ŋijipitian ŋituŋa keŋ, abu inak Ŋijipitian totiŋa ŋiketiyak keŋ lopite ŋolo aronon.

²⁶Ani ekaku, abu kiyakiya eketiyan keŋ Moses, kaapei ka Aron ŋulu aris iŋes keseu.

²⁷Apotu ŋul kitiyata ŋaumonokineta ka Akuj neni a Ŋijipitian, apotu kitiyata ŋakujuwuanisya anakibois a ŋina ka Am.

²⁸Abu Akuj kiyaku akirwonut, kirwoniar akwap a Ijipit cuc, nai apotu Ŋijipitian toŋero ŋakiro ka Akuj.

²⁹Abu Akuj kituruwo ŋakipi ŋuna ka akwap kec ŋaokot, ido apotu ŋikolya totwaka.

³⁰Apotu ŋakidodoka toburusiyasi akwap kec, tolomasi tari nagulei ŋuna aperete ŋikapolok a Ijipit.

³¹Abu Akuj kirworik, ido apotu ŋicuc ŋulu alalak nooi ka ŋikamicirwa kilelebun nakwap ŋin daadaŋ.

³²Abu Akuj kiyakik ikes akiru ŋina arae ŋakako bon, toyakaun akimilyaa nakwap kec daadaŋ.

³³Abu Akuj tobilibiliya ŋikito kec ŋulu ke epiini ka ŋiboboryo, tobilibiliya ŋikito daadaŋ anakwap kec.

³⁴Abu Akuj kirworik, ido abu emaase bu, kilelebun nakwap kec emaase ŋolo alalan nooi;

³⁵kirika emaase ibore daadaŋ ŋini arupunit anakwap kec, kirika ŋaraito daadaŋ ŋuna ka akwap kec.

³⁶Abu Akuj toar ŋikiyae daadaŋ anakwap kec, ŋikiyae daadaŋ a ŋolokal alo Ijipit.

³⁷Ekaku, abu yau Ŋisirael alo Ijipit eyakatar esilipa ke egolid, amam ipei daŋ a ŋikabilae kec ŋini apalag.

³⁸Apotu Ŋijipitian tolakaros erotokinete Ŋisirael, anerae abu sek kiil ikes aŋuna a Ŋisirael.

³⁹Abu Akuj kiŋarenik ŋituŋa keŋ esibit edou naparan, ido abu kiŋarenik ikes esibit arira a akim nakwaare.

⁴⁰Apotu Ŋisirael kiŋita Akuj akimuj, ido abu Akuj inak ikes ŋalurui, abu inak ikes akimuj ŋina anakuj kisimwon ikes.

⁴¹Abu Akuj toped ataaba, ido apotu ŋakipi toleleut kiŋa; toleleyasi analoŋisat lopite ŋolo elelyaa aŋolol;

⁴²anerae abu Akuj totamu akiikinet keŋ ŋina asegan, neni ka Aburaam a eketiyan keŋ.

⁴³Aŋun, abu Akuj yau ŋituŋa keŋ elelyanete, yau ŋituŋa keŋ ŋuluseuna eosi.

⁴⁴Abu Akuj inak ikes ŋakwapin a ŋituŋa a ŋice, apotu ikes kituruwosi ebari a ŋituŋa a ŋulu sek keya nen ŋolo kec.

⁴⁵Abu Akuj kitiya ŋun, ikotere iwuapete Ŋisirael ŋakiro ŋuna etubunit Akuj ka ŋikisila keŋ. Kipuroe Ekapolon!