Read ngakarimojong Ŋikiru. 108 Bible Online

Ŋikiru. 108 - ngakarimojong bible

Ŋikiru. 108

¹(Eete kori ekiruk a Daudi.) Okoe Akuj, nyiryaŋiryaŋa etau kaŋ, nyiryaŋiryaŋa etau kaŋ, aeikini ayoŋ ekepuro iyoŋ.

²Akyenyuni ayoŋ, akyenyuni ayoŋ oramak agita ka aduŋgu ka akenyuni ayoŋ eriŋa akide nyereŋuna.

³Alakar ayoŋ neni kon, okoe Ekapolon alokidiŋ ŋituŋa a ŋakwapin; aeikini ayoŋ ŋieosyo ŋulu ka akipuro neni kon alokidiŋ ŋituŋa a ŋakwapin,

⁴anerae epol nooi amina kon ŋina nyiryaŋiryaŋa eyai tari kidiama; edolit akikinyoma kon tari lodouwon.

⁵Okoe Akuj, emaikina kipuroe ekiro kon alokidiama nakuj; kimyek apolou kon min nakwap daadaŋ.

⁶Toiunae isua anagogoŋu kon, kiŋarakinae isua, ikotere elakunio ŋulu imina iyoŋ.

⁷Adau Akuj akirwor ŋakiro nu anakibois keŋ a ŋina asegan ebe; “Analelyanu kaŋ, atyakatyakae ayoŋ Sekem, ido okora akadipaalat ŋina a Sukos.

⁸Erae Gilead ŋina kaŋ, erae Manase ŋina kaŋ; erae Epuraim ekabila ŋolo iretakini ŋimoe alotuŋa kaŋ, ido erae Yudaya ekabila ŋolo ipukae ŋituŋa kaŋ.

⁹Erae Moab akwap ŋina erae akoŋinait aneni a ŋituŋa kaŋ, ayoŋ epukat akwap a Edom. Aceluni ayoŋ aŋuna elounia ayoŋ akwap a Pilistia.”

¹⁰Ŋae akayai ayoŋ lotaun ŋolo eya ŋaduketa ŋunajiet? Ŋae akarikori ayoŋ Edom?

¹¹Nyeŋero mono iyoŋ isua, okoe Akuj a? Okoe Akuj nyeriŋa iyoŋ irukonorete lojie ka ŋasigarya kosi.

¹²Kiŋarakinae isua anakitijiore ŋimoe kosi, anerae erae akiŋarakinet a ŋituŋa akoŋinait.

¹³Anarukit ka Akuj, ikiji isua ikidedeŋ nooi, erae Akuj iŋes ilouni ŋimoe kosi.