Read ngakarimojong Ŋikiru. 139 Bible Online

Ŋikiru. 139 - ngakarimojong bible

Ŋikiru. 139

¹Okoe Ekapolon, idau iyoŋ aripirip ayoŋ, ido ikiyenu iyoŋ ayoŋ.

²Iyeni iyoŋ ŋuna etiyae ayoŋ daadaŋ iyeni iyoŋ ŋatameta kaŋ tari daŋ kilwana iyoŋ.

³Iyeni ŋuna etiyae ayoŋ aneni alosi daadaŋ, iyeni iyoŋ tari ŋuna etiyae ayoŋ eeŋuni iyeni iyoŋ ŋakiro kaŋ daadaŋ.

⁴Ani eriŋa ayoŋ nyelimuno akirot, iyeni iyoŋ Ekapolon ŋuna acamit ayoŋ alimun daadaŋ.

⁵Ikiyoki iyoŋ ayoŋ anawaetin a daadaŋ ikiyoki iyoŋ ayoŋ a apedor kon.

⁶Aosou ŋina ikoni ŋin, erae ŋina ka aumokin aneni kaŋ; epol nooi, nyapedori ayoŋ aryamun.

⁷Apedori mono kire ayoŋ akisi aneni kon, kori apedori mono ayoŋ akiem aneni kon a?

⁸Ani kalot ayoŋ nakuj, iyai iyoŋ inaa; ani kalot ayoŋ nakibois a ŋikatwak iyai iyoŋ neni daŋ.

⁹Ani kalot ayoŋ neni elomununuya akoloŋ, kori keboi ayoŋ aneni edoiyonori akoloŋ,

¹⁰ikiriki iyoŋ ayoŋ a apedor kon. Ikiŋarakini iyoŋ ayoŋ a apedor kon.

¹¹Ani katema ayoŋ ebe, “Kire, ekewuai ayoŋ akiryonut, ido iryoniar akica ŋina eyai neni ayai ayoŋ,”

¹²nyerae akiryonut aneni kon akiryonut. ecai aneni kon akuwar ikwa apaaran; anerae ikwaan aneni kon akiryonut ka akica ite iyoŋ ibore daadaŋ.

¹³Iyoŋ ibu tosub ŋinerin ŋulu eya tooma kaŋ; ibu iyoŋ itoyeu ayoŋ anakook a toto kaŋ.

¹⁴Ekepuri ayoŋ iyoŋ, anerae ikisubunit iyoŋ ayoŋ eloit ŋisubuna ŋuluce daadaŋ ka arae ŋini ajok nooi; erae ŋiticisyo kon ŋulu ka aumokin, ayeni ayoŋ ŋun nooi.

¹⁵Pa ewua aneni kon epite ŋolo ikiyeunia iyoŋ ayoŋ, epite ŋolo ikiyaa iyoŋ ayoŋ anakook atoto kaŋ. Apaki ŋina ikiyaa iyoŋ ayoŋ a nen pa atakani, iyeni iyoŋ atemar ayai ayoŋ nen.

¹⁶Aris iyoŋ kikiŋolik ayoŋ eriŋa ayoŋ nyidouno. Aris kigiri lokitaabo ŋirwa daadaŋ ŋulu ekemarakinitae ayoŋ, eriŋa tari apei daŋ nyimarakina.

¹⁷Okoe Akuj, etya ajokis ŋina a ŋatameta kon aneni kaŋ ai? Etya ekimar kec ai?

¹⁸Kerae emarenenee ayoŋ ikes, kelal ekimar kec akilo asinyon; ani akyenyuni ayoŋ, aryamuni atemar eriŋa ayoŋ ikirukit ka iyoŋ.

¹⁹Okoe Akuj, agasi ayoŋ atemar toar iyoŋ ŋulu aronok, agasi ayoŋ atemar kiritarae aneni kaŋ ŋituŋa ŋulu iburit akiar ŋuluce.

²⁰Agasi ayoŋ atemar kiritarae ŋituŋa ŋulu irworosi ikitoroniarito iyoŋ, ido kirworos ŋuna aronok elimito ekiro kon.

²¹Okoe Ekapolon, nyaremokino mono ayoŋ ŋituŋa ŋulu ikiremokino iyoŋ a? Nyaŋerit mono ayoŋ ŋulu ikiŋerito iyoŋ a?

²²Aremokino ayoŋ ikes nooi akilo; emarit ayoŋ ikes erae ŋimoe kaŋ.

²³Toripiripae ayoŋ, okoe Akuj, ido toyenu ŋuna eya lotau kaŋ; kikatakinae ayoŋ, ido toyenu ŋatameta kaŋ.

²⁴Toanyu erae keyai aronis eyai neni kaŋ, ido torikoe ayoŋ ewuap ŋipitesyo ŋulu a akiyar a ŋina a ŋikaru ka ŋikaru.