Read ngakarimojong Ŋikiru. 143 Bible Online

Ŋikiru. 143 - ngakarimojong bible

Ŋikiru. 143

¹Okoe Ekapolon, kiira akilip kaŋ, topupok akigworo kaŋ aŋuna ka akiŋarakino! Alotooma akikinyoma ka akiyookino kon, toboŋokinoe ayoŋ.

²Nyikitubok ayoŋ eketiyan kon, anerae mam alotuŋa a ŋulu eyarete ŋini iyookino alokiŋaren kon.

³Adau emoit akiwuap ayoŋ, adau areun ayoŋ eketopapanu, akainaki ayoŋ akiboi anakiryonut ikwa ŋulu ketwakete koloŋ sek.

⁴Aŋun, apapanu ayoŋ; amin akadakinit tooma lotau kaŋ.

⁵Atamunit ayoŋ ŋirwa ŋulu koloŋ sek; atamatamae ŋuna a ŋiticisyo kon a daadaŋ, atamatamae ayoŋ ŋuna ibu iyoŋ kitiya.

⁶Ekyaarit ayoŋ ŋakan kaŋ neni kon eteunit neni kon; ekeburit ayoŋ nooi aanyun iyoŋ, lopite ŋolo iburitor alaro aryamun ŋakipi.

⁷Okoe Ekapolon, toboŋokinoe ayoŋ atipei; apapanu ayoŋ. Nyiwua ereet kon aneni kaŋ, ani kiwua iyoŋ ereet kon, ayakaun ayoŋ nakibois a ŋulu adaut atwakare.

⁸Kimyekinae ayoŋ a ŋinataparacu eira ŋuna ka amina kon a ŋina nyiryaŋiryaŋa, anerae ekekinyomit ayoŋ iyoŋ. Kitoodikinae ayoŋ ŋuna emaikina ewuap, anerae neni kon iŋes elipi ayoŋ.

⁹Okoe Ekapolon, toiunae ayoŋ alomoe kaŋ, anerae abu ayoŋ neni kon aiuno.

¹⁰Kitatamae ayoŋ etiya acamit kon, anerae irae iyoŋ Akuj kaŋ; elipi ayoŋ okorik etau kon nyaloma natyokisyo.

¹¹Okoe Ekapolon, aŋuna ke ekiro kon, kiyokoi ayoŋ; anakiyookino kon, toiunae ayoŋ alocan.

¹²Alotooma amina kon ŋina nyiryaŋiryaŋa, toar ŋimoe kaŋ; tomunya daadaŋ ŋulu akaremokino ayoŋ, anerae arae ayoŋ eketiyan kon.