Read ngakarimojong Ŋikiru. 16 Bible Online

Ŋikiru. 16 - ngakarimojong bible

Ŋikiru. 16

¹Okoe Akuj kiyokoi ayoŋ, anerae neni kon aryamunia ayoŋ aiuno.

²Abala ayoŋ neni ke Ekapolon, “Irae iyoŋ Ekapolon kaŋ, emam ibore ejok aneni kaŋ mati iyoŋ bon.”

³Ejokak nooi ŋituŋa ŋulu ikinyomito Ekapolon, akajoikinit ayoŋ nooi arukit ka ikes.

⁴Ikes ŋulu eseunete akiwuap ŋakujo ŋace iasete ikes akiyaloloŋ kec; nyalosi ayoŋ neni emurotor ikes; nyelipi ayoŋ neni a ŋakujo kec.

⁵Iyoŋ bon Ekapolon ayakar ayoŋ, iyoŋ ikiinanakini ayoŋ ibore daadaŋ ŋini acamit; nakan kon eyai akiyar kaŋ.

⁶Iwuak iyoŋ ŋikorin a akwap kaŋ nakiboisyo ŋuna akajoikinit ayoŋ eya; kire jik ayakar ayoŋ akwap ŋina ajokan nooi.

⁷Epuri ayoŋ Ekapolon ŋolo eketatami ayoŋ ŋakiro ŋuna emaikina ewuap; nakwaare daŋ eketatami ayoŋ etau kaŋ ŋakiro ŋuna emaikina ewuap.

⁸Ŋirwa daadaŋ ewuakinit ayoŋ ŋatameta kaŋ neni ke Ekapolon; eapi iŋes aneni kaŋ, aŋun eboi ayoŋ emam ŋace.

⁹Aŋun elelyani etau kaŋ ka ikipuro iyoŋ etau kaŋ, ayakaun daŋ ayoŋ emam ŋace;

¹⁰anerae nyikimyekini iyoŋ ayoŋ anakibois a ŋikatwak, kori nyicamakini iyoŋ eketiyan kon ŋolo seuna ebosi.

¹¹Ikitoodik iyoŋ ayoŋ erot ŋolo elosi nakiyar; alelyani ayoŋ nooi aŋuna ikirukitor ka ayoŋ; ani iapi iyoŋ aneni kaŋ, alakara ayoŋ ŋirwa daadaŋ ŋulu ka akiyar kaŋ.