Read ngakarimojong Ŋikiru. 18 Bible Online

Ŋikiru. 18 - ngakarimojong bible

Ŋikiru. 18

¹(Ekiruk a Daudi neni a ŋolo apolokinit aeore. Abu Daudi eketiyan ke Ekapolon toeik eete lo neni ke Ekapolon apaki ŋina aiunia Ekapolon iŋes alomoe keŋ a daadaŋ ka aneni a Saul. Tema iŋes:) Okoe Ekapolon ŋolo irae agogoŋu kaŋ, akamina ayoŋ iyoŋ.

²Ekapolon iŋes erae ataaba kaŋ ŋina kiupala, aduketait kaŋ ŋina ajio alotooma ka ekaiunan kaŋ. Akuj kaŋ, ataaba kaŋ ŋinakiupala neni kon iŋes aiunor ayoŋ, iyoŋ irae aupal kaŋ ka ekaiunan kaŋ, neni kon ayakaun ayoŋ pa eryaŋiryaŋa.

³Anyarae ayoŋ Ekapolon ŋolo emaikina kipuroe, ido akaiunio ayoŋ alomoe kaŋ.

⁴Apotu ŋirotin ŋulu ka atwanare okorapuwasi ayoŋ, apotu ŋirotin ŋulu ka amunyaro kipiiyaun, ekesiiryakis ayoŋ neni aronon,

⁵apotu ŋirotin ŋulu ka akibois a ŋina a ŋikatwak okoena ayoŋ, apotu ŋirotin ŋulu ka atwanare ekerikaut ayoŋ.

⁶Abu ayoŋ alocan kaŋ onyara Ekapolon, abu ekalou neni ka Akuj kaŋ akiŋarakino, Abu Akuj alo Kai keŋ kiira etoil kaŋ, abu iŋes kiira akigworo kaŋ.

⁷Abu nai akwap tomaranik ka kiryaŋiryaŋakin; apotu ŋawoeta a ŋimoru daŋ tomaranikis ka kiryaŋiryaŋakin anerae abu Akuj toŋo.

⁸Abu apuru tolomu alokumes keŋ ka abu akim ŋina anyamuwaran tolomu anakituk keŋ, toneput ŋatotol anakituk keŋ.

⁹Abu Akuj kimyek nakuj bu kwap; apotu ŋidouwon ŋulukiryonok pena kwap ŋakejen keŋ.

¹⁰Abu iŋes todokak esubuna ŋolo a ŋabebenuk kiwuwaun kwap; abu iŋes kiwonyu atipei alokuwuam.

¹¹Abu iŋes min kidiŋ ŋidouwon, apotu ŋidouwon ŋulukiryonok cuc ŋulu ka akiru torapuwasi iŋes.

¹²Alotooma akwaŋis kya ŋina ayai kiŋaren keŋ apotu ŋakako ka akimilya ŋina ekoni akim todout alodowuon a ŋulukiryonok cuc.

¹³Abu daŋ Ekapolon kirworik anakuj, ido aponi kiirarae etoil a Akuj a ŋina alokidiama nooi.

¹⁴Abu iŋes kiyaku akimilya keŋ, kiela ŋimoe, abu kirita ikes a akimilya.

¹⁵Ekaku aŋun, apotu ŋakadipaalae ŋuna ka anam totakanut, tolemarae ibore ŋini arapit akisyakinet ka akwap. Arae apaki ŋin ŋina ikilyakinia iyoŋ ŋimoe kon, okoe Ekapolon, arae ŋin apaki ŋina iŋenyakinia iyoŋ ŋimoe kon iŋoit.

¹⁶Abu Ekapolon bu alokidiama kwap ekekamu ayoŋ, abu ekeriu ayoŋ anakipi aŋuna eleleba neni acukul.

¹⁷Abu okoiu ayoŋ alomoit kaŋ a ŋolo agogoŋon, abu okoiu ayoŋ aneni a ŋulu akaremokino; anerae agogoŋ ikes nooi akilo ayoŋ.

¹⁸Apotu ikes ekesiiryakis ayoŋ neni aronon akoloŋit ŋina ayakar ayoŋ locan, nai abu Ekapolon okoiu ayoŋ.

¹⁹Abu Ekapolon okoyau ayoŋ kiŋa nakibois ŋina aloloman nooi; abu iŋes okoiu ayoŋ anerae abu iŋes tolakar aŋuna kaŋ.

²⁰Abu Ekapolon okorop ayoŋ aŋuna ka akiyookino kaŋ; abu iŋes okorop ayoŋ alopite a ŋolo emamukar ibore ŋini aronon ŋini etiyat ayoŋ,

²¹anerae abu ayoŋ ewuap ŋuna abala Ekapolon, mam ŋuna aronok ŋuna etiyat ayoŋ ŋuna eketeŋerete ayoŋ Akuj kaŋ.

²²Ewuapit ayoŋ ŋikisila keŋ daadaŋ, mam nyimyekina ayoŋ ŋakiro ŋuna atubunit iŋes.

²³Mam ŋakiro aronia ayoŋ alokiŋaren keŋ, mam asecit etiyat ayoŋ.

²⁴Aŋun, akarop ayoŋ Ekapolon aŋuna ka akiyookino kaŋ, akarop iŋes ayoŋ, anerae mam ibore ŋini aronon ŋini etiyat ayoŋ.

²⁵Isiyoonokini iyoŋ ŋakiikinet kon neni a ŋulu ikikinyomito iyoŋ; itiyae iyoŋ ŋuna ajokak neni a ŋulu emam aronis;

²⁶Itoodiunun iyoŋ ijok aneni a ŋulu emam asecit; ido iryenyaanikinit iyoŋ ŋulu isyaaka.

²⁷Iiununi iyoŋ ŋituŋa ŋulu itiditeuna make, nai itiditeununui iyoŋ ŋulu iturosi.

²⁸Okoe Ekapolon, iyoŋ ikiinakinit ayoŋ akiyar; iyoŋ Ekapolon Akuj ilemari aronis aneni kaŋ ikiinak ayoŋ akiyar.

²⁹Anakiŋarakinet kon, apedori ayoŋ amunyar ajore; anakiŋarakinet ka Akuj kaŋ, apedori ayoŋ akikalam arwatata.

³⁰Ani eruwor iyoŋ Akuj, iyookino ŋuna kon; iyookino akiikinet kon; erae iŋes aupal a daadaŋ a ŋulu elosete neni keŋ aiuno.

³¹Ekapolon bon erae Akuj, iŋes bon erae ekaiunan yok,

³²iŋes abu okoinak ayoŋ agogoŋu, iŋes abu kituruwo ŋuna etiyae ayoŋ ŋuna iyookino.

³³Abu Akuj okoinak ayoŋ apiranu lopite ŋolo epirania atili, ido abu ekewuak ayoŋ lomukura oiun a nen.

³⁴Abu iŋes eketatam ayoŋ epite ŋolojiet, ikotere ayoŋ apedori akiketakin akau a ŋikaleŋeleŋe ŋina agogoŋon.

³⁵Idau iyoŋ Ekapolon ainakin ayoŋ aupal kon ŋina akaiuni ayoŋ, Ido eketopoloosi ayoŋ ŋuna ibunio iyoŋ ikiŋarakinia ayoŋ; arubak ayoŋ aiuna aŋuna ka apedor kon.

³⁶Italala iyoŋ neni etori ayoŋ emam ŋace, ikiturubak iyoŋ ayoŋ awoikinit ŋimoe kaŋ.

³⁷Abu ayoŋ ewuap ŋimoe kaŋ orukau; ido abu omunya ikes; nyeboŋoro ayoŋ aneni kec emyek ikes, akitodol apaki ŋina amunyarya ayoŋ ikes.

³⁸Abu omunya ikes jik, nyeboŋokino nabo ikes aponare; abu ayoŋ oreu ikes omunya,

³⁹anerae ibu iyoŋ ikiinak ayoŋ agogoŋu ŋinajiet; ikiinak ayoŋ akiloun ŋimoe kaŋ.

⁴⁰Ibu iyoŋ ikiinak ayoŋ akibwaŋ ŋimoe kaŋ, ido abu ayoŋ omunya ŋulu akaremokino ayoŋ.

⁴¹Apotu ikes kigworo iitanito ikaiunan, nai mam ŋini apedori aiun ikes; apotu ikes kigworonokis Ekapolon, nai abu Ekapolon nyeboŋok ikes ŋakiro ŋadi.

⁴²Abu ayoŋ oreu ikes kielaros ikwa apuwa ŋina ielari ekuwuam; abu ayoŋ ecakicak ka epuda ikes ikwa ecoto ŋolo alorotin a etaun.

⁴³Idau iyoŋ aiun ayoŋ alojiesyo ka ŋituŋa; idau iyoŋ akituruwor ayoŋ ekepukan a ŋakwapin; apotu ŋituŋa ŋulu sek pa ayeni ayoŋ eketiyanakis ayoŋ.

⁴⁴Apotu ŋituŋa ŋulugelae potu toryediko alokiŋaren kaŋ; apaki ŋinapei eiraryata ŋakiro kaŋ, apotu kiwuapa ŋakiro kaŋ.

⁴⁵Apotu ŋitai a ŋituŋa a ŋulugelae tolilimiyosi; potu ikes emaranete neni kaŋ anakiboisyo a ŋuna sek eboiyoto emam akuryanu.

⁴⁶Eyari Ekapolon! Kipuroe ataaba kaŋ ŋina kiupala, kitopolooroe Akuj kaŋ ŋina ka aiuno kaŋ.

⁴⁷Akuj ŋina abu okoinak ayoŋ akinyaŋar ido okoinak ayoŋ akipuka ŋituŋa a ŋakwapin;

⁴⁸Akuj ŋina abu okoiu ayoŋ alomoe kaŋ; ibu iyoŋ ikitopoloo ayoŋ epuka ŋimoe kaŋ, ibu iyoŋ ikiu ayoŋ alotuŋa a ŋulu aryenyaanak.

⁴⁹Aŋun, eserae ayoŋ ŋuna ka ajokis kon neni a ŋulu nyerae Ŋiyudayan, ido aeikini ayoŋ ŋieosyo epur ekiro kon.

⁵⁰Einanakini Akuj erwosit ŋolo abu iŋes toseu akilounun ŋimoe keŋ, Itoodianakini Akuj erwosit ŋolo abu iŋes toseu arimao keŋ, einanakini Akuj ŋun neni a Daudi ka ŋiletok keŋ ŋikaru ka ŋikaru.