Read ngakarimojong Ŋikiru. 19 Bible Online

Ŋikiru. 19 - ngakarimojong bible

Ŋikiru. 19

¹Isileereunit kidiama apolou ŋina ka Akuj; ido itoodiunit ariwo ŋina alokidiama etic ŋolo abu iŋes kitiya.

²Aŋinakoloŋit iŋolyanakinete ŋituŋa apolou ŋina ka Akuj; aŋinakoloŋit nakwaare iŋolyanakinete ailiil ŋina ka Akuj.

³Mam ŋakiro irworosi kidiama ka ariwo, eta ikes cek.

⁴Nai ielakina ŋuna isileereunito ikes akwap daadaŋ, edolito ŋakiro kec nakisaleta ŋuna ka akwap. Adau Akuj akiwuakin neni iboiyo akoloŋ alokidiama.

⁵Elomununui akoloŋ a nen lopite ŋolo elomunia ekile ŋolo iita, epeleununui akoloŋ a nen lopite ŋolo epeleunio ekakeran ŋolo ebobokinit akerit anabolobolo.

⁶Epeleununui akoloŋ alowae ke epei, ido todoiyo lowae ŋoloce; emam ibore eŋopikini amwanis keŋ.

⁷Iyookino ŋikisila ŋulu ke Ekapolon, ikisimukyanakinete anakiyar. Ikinyoma ŋakiciketa ŋuna ke Ekapolon, einanakinete aosou neni a ŋulu emam ŋuna eyenete.

⁸Iyookino ŋikisila ŋulu ke Ekapolon, einakinito alakara neni a ŋulu iwuapito ikes. Ileerete ŋakiciketa ŋuna ke Ekapolon, itacaununeete ŋatameta.

⁹Ejok akitopoloorit Ekapolon ka arubakin itopolooritae iŋes ŋikaru ka ŋikaru. Iyookino ŋatubokineta ŋuna ke Ekapolon; erae ikes daadaŋ ŋuna iyookino.

¹⁰Emaikina ikiburite nooi amina ikes akilo egolid, akilo tari egolid ŋolo eliuna ejok nooi; ebobok daŋ ikes akilo ao akilo tari ao ŋina eliuna bon anakap keŋ.

¹¹Akainakinito ikes ayoŋ eketiyan kon acoikinit ŋakiro; aryamuni ayoŋ eropit ŋolo apolon nooi anakiwuapit ikes.

¹²Nai ŋae epedori aanyun ŋuna edyakarit iŋes? Kisyoni ayoŋ anadyakanareta kaŋ a ŋuna nyayeni.

¹³Kiuryarae daŋ ayoŋ eketiyan kon anakiredanakin asecenen; ekelipit kiurya nyekepukata ayoŋ ŋasecisya; ikotere oruwor ayoŋ ŋolo emam ŋuna eketoronitere, ŋolo nyabilit ŋikisila ŋulu alalak nooi.

¹⁴Kimyek ŋakiro ŋuna erworo ayoŋ ka ŋuna eomomoe etau kaŋ toruworos ŋuna icamit iyoŋ, okoe Ekapolon, ekaiunan kaŋ ka ekalakunan kaŋ.